2 Kronika 22 - NTSHOB NSI

Nufen Akazia

¹ Ba Yérusalém lo' Akazia ngom fen yi num dù' Yoram. Akazia na' nke' à metshab i, nummbe bwoṅ ba Arab tse bo se' ntsho mbàn nà lo zwite njoṅ nshum Yoram fa tse bo ku' là. A tshùa ndùlala Akazia nshum Yoram mfen Yuda tô ngô.

² Akazia lo be jù fen ndù a ghù ngu'njù ntshob bàa ṅam nkuà. A tô ngô tamngu', nke ntswe Yérusalém. Lén màab na' mb'a Atalia, mbe ngon Omri.

³ A zin num tse nze tunndà Akab, nummbe màab lo ke mfà ntag kebwô yi.

⁴ A ghù nukebwô num miag Tshùaben mba tunndà Akab là, ndùse tàab kwù là, tse ghafà ntag tum à tunndà Akab kà ngù à mbi.

⁵ Bo soṅt'é ntùm ntag mub k'a nèn tshwèt ntsho bo Yoram nshum Akab, mfen Israél. Bo ma' Hazaél mfen Siria ntsho Ramot, b'a dù' tsha' z'a Galad là. Ba Siria ma' mfaṅ num Yoram.

⁶ Yoram bèn Yizréel netshwinte mfaṅ ba Siria ma' num i Rama ndùs'a ke ma' Hazaél mfen Siria ntsho là. Akazia nshum Yoram, mfen Yuda swe' nèn lôte Yoram nshum Akab Yizréel, nummb'a lo ke ngone.

⁷ A tshùa mba Nsi kô là, Akazia nèn mbaṅ Yoram, nenèn bi ndùlala. Ndùs'a kum bwe là, bo Yoram nèn mbwe Yéhu nshum Nimshi ze Tshùaben na' njo' num nebiagte tunndà Akab là.

⁸ Mba Yéhu ke ngù nunetsine tunndà Akab là, a tèt fenfen Yuda boa tse nshum fèt Akazia tse bo ke mfa' Akazia là, nzwite yube.

⁹ A diag Akazia, bo ghom i Samaria dù' z'a lem nà. Bo lo' i nse' yi mbaṅ Yéhu, nzwi i bwe. Yen nà be tôg bo tshoṅ i, nke ntshob ndù: A b'a nshum Yosafat z'a ke ndiag Tshùaben njoṅ ntù i fa là. Sàm mèn ke bèn mbe ntùm tunndà Akazia ze b'a tô là.

Atalia kwé ngù' netô

¹⁰ Atalia mà Akazia be yen mba nshum i kwù là, ndo nsi, mbiagte njoṅ nzwit fen tunndà Yuda fa.

¹¹ Là Yoshéba, ngon mfen, lo' Yoas nshum Akazia, nsô i netèt tse nshum mfen ndùse bo ke nzwite yub là. A fà i nz'é ntùm to'ndà nkunndà. A tshùa ndùlala Yoshéba ngon mfen Yoram, nzwi Yéhoyada ngafà tshule'te sô Yoas ntshu vùkob, Atalia ke zwi i. Yoshéba na' mb'a mfèt Akazia ze mènnzwi.

¹² Yoas tswe ntùm Ndà Nsi boa bo ngu'njù ntôge, nke ndeme. Atalia na' mbèn nke ntô ntùm ngô.