2 Kronika 20 - NTSHOB NSI

Bo kam Yuda ntsha: Le'te Nsi Yosafat

¹ Yen nà lo be tôge, tse nshum Moab, tse nshum Ammon boa tse Maon tam manze nenèn ma' Yosafat ntsho.

² Bo se' nsoṅ Yosafat ntshob ndù: Mo' bwoṅ benntùn yàm tshwèt nse' num o fe mo' yoṅ dibantse, fe Siria. Bo b'a Hatsatson-Tamar z'a En-Guédi là.

³ Ntùm bwôg Yosafat nabte wul i nediag Tshùaben, ngù njoṅ ngô Yuda fa tswe nziku'u.

⁴ Yuda tse'te num netsiaṅ lén Tshùaben. Bo fete ntùm mi ntusô Yuda fa nse' ndiag Tshùaben.

⁵ Yosafat se' netèt mbumte bon Yuda boa bon Yérusalém ntùm ndà Tshùaben, mbwe bam ntshundà nswe.

⁶ Ntshob ndù: Tshùaben, Nsi tà tshag, o ke' b'a Nsi mfe kamànyam ké? O ke bèn nke ntô njoṅ nufen ngôngô fa ké? O ke bèn ngù neta bo ngù' ké? A ke b'a wù là ze mèn ke' ku'ni netùn mbwe o là ké?

⁷ A ke b'a wù Nsi yag na' mbèn nta' ben tse bo na' mbe ntùm yen ngô li mbwe yu nzwit mèn Israél ké? O lo fà ngô nzwit Abraham matmat nummb'a lo ke nkô o.

⁸ Bo lo tswe bwe, nkut ta' dù' nelàn bwe num lén so, ntshob ndù:

⁹ A be ze mo' nu tsho yag là, ṅwi, netsho'te, keya' ke nziku' lo, mba bag nsi se' mbwe yen ba' li, mbwe o, nummbe lén so num ntùm yen ndà li; bag nsi kua' wù ntùm nge' yag, o ju' njôg yage!

¹⁰ Ndonni tshù tse nshum Ammon, tse nshum Moab boa ben tse bo num mbat Seir ts'o na' mbe ke bam Israél tsho bwe ndùs'a ke ntum Egipto là, nummb'a lo tam i mvèn i ke sate yube,

¹¹ tshù bo là bo se' late yage, nse' neta' yag num ntsi' mu là. O na' mbam ndù bag be num men ntsi' là.

¹² Wù Nsi yag, o ke so ntsha o num bo ké? Nummbe bag ke' ghù neta mbwe tshen bwoṅ benntùn ni ts'a tshwèt nse' num bag là. Bag ke' lèn mba bag ghù là, nda' ndù miag mag te à num o.

¹³ Ba Yuda fa lo tsinte mbwe Tshùaben boa bontsit bon tshobe, zwi tshob boa nshumnshum tshobe.

Tshùaben ghù ba Yuda tshùa ntsho

¹⁴ Ndùlala ywèt Tshùaben ghom Yakaziél nshum Sakaria, nshum Benaya, nshum Yeiél, nshum Mattania netèt mbumte. A na' mb'a ze mèn Lévi netèt tse nshum Asaf.

¹⁵ Yakaziél tshob ndù: Ba Yuda, bin ba Yérusalém mba wù mfen Yosafat, bin kù' ntoṅ nju'u. Tshù ju ze Tshùaben tshob li: Kà bin bwôg, ke vètte mbwe tshen bwoṅ benntùn nà, nummb'a b'a Nsi bèn ma' ntsho, ke b'a bin.

¹⁶ Bin swe' ndamnjù nèn num bo; bo a' tshùa à kônga Hatsits kà nko' nène; bin nsi tèt yub tu tômbo'o, mbwe kônkwa Yéruél.

¹⁷ Bin ke nsi lab wut num yen nu là. Bin nèn ntsin bwe, njen mba Tshùaben nsi tshu' zin nà. Yuda bo Yérusalém, kà bin bwôg ke vètte, njù ndàn bin tum nèn num bo. Bin à Tshùaben nsi bèn be!

¹⁸ Yosafat vù nsi kabkab, njoṅ ba Yuda boa ba Yérusalém fa vùte nsi mbwe Tshùaben.

¹⁹ Ben Lévi tse bo tum netèt tse nshum Kéhat mba netèt tse nshum Koré lote nsi nyàmte Tshùaben Nsi Israél neta, ntshag nze yub tù.

²⁰ Njù làn bo tam nze mà nkebnjù nèn kônkwa Tékoa. Bo be nèn Yosafat tsin mbwe bo ntshob ndù: Bin ju' me Yuda bo Yérusalém! Bin yab ntù num Tshùaben Nsi zin ndù bin ghù tànntù; bin yab ntù num ghatshob ntshob Nsi ndù tsin nu vù lag.

²¹ Yen nà be tôg bo ngô be ntshu ntshù' ntsho' ghayobkwi, bo ma' tshu kwi wut tse nelàne, nke nzin mbwe ntshu ntsho, nke nyàmte Tshùaben ntshob ndù: Ghamte be Tshùaben, nummbe kondèn i be ntswe matmat!

²² A lo ke mbe ndùse bo to' neyob nkwi, nke ngamte Nsi là, Tshùaben bùn nkù num tse nshum Ammon, tse nshum Moab boa ben tse bo num mbat Seir, nse' ma' Yuda ntsho là. Yen ngelaṅ nà bo vù ntsho.

²³ Tse nshum Ammon boa tse nshum Moab tsho' ngwù num ben tse bo num mbat Seir là, nzwite yube, mbiagte yube; ndùse bo miagte nezwite ben tse bo num mbat Seir là, bo biagte yub tu wut bo bo.

²⁴ Ndùse Yuda kum num mbù'mbù', dù' z'a ke njen kônkwa là, a lôte bag dù' bwoṅ benntùn be là, njen ba fe ben ndù bo nyit nsi, sàm mèn ke tum ntshu vù netèt bo.

²⁵ Yosafat bo ngô i nèn diag ntsha'. Bo tèt ntsha' yàm netèt fe ben nà, tshunkàb boa tshu tanjoṅ yàme. Bo lag ntsha' kà ke ku'ni neket fa. Bo lag ntsha' mum lé'njù tat, nummbe ntsha' lo gha' mbu.

²⁶ A be mbatte lé'njù kuà, bo kùmte tômbo' Béraka, ngamte Tshùaben bwe; a ndùlala ze bo tsiaṅ dù' là ndù tômbo' Béraka là. A b'a be sen lén nà bèn nke' tà nkum sènni.

²⁷ Njoṅ ba Yuda boa ba Yérusalém fa tse Yosafat ke mbèn ntô yub là bèn njam Yérusalém ntùm tsiaṅte, nummbe Tshùaben lo fà tsiaṅte bo, ntshu' yub mbu ghakeban tshobe.

²⁸ Bo tsho Yérusalém ntùm ndà Tshùaben ntùm nze ndoṅe, ndoṅ nse' boa ba nta.

²⁹ Nebwôg Tshùaben ghom njoṅ nufen ngô fa ntùm tsemo' ngô, ndùse bo ju' ndù Tshùaben ma' ghakeban Israél ntsho là.

³⁰ Ze nufen Yosafat tswe mbétni, Nsi i fà fite yi num njoṅ bag tse fa.

Miagte nufen Yosafat

³¹ Yosafat tô Yuda. A lo be jù fen ndù a ghù ngu'njù ntshob tàn ṅam ntat. A tô num ngu'njù ntshob tàn ṅam mbàa, nke ntswe Yérusalém. Lén màab na' mb'a Azuba, mbe ngon Shilki.

³² A lo ke nzin à num manze tàab Asa, ke sô wul i bwe, nke ngù nu ndaṅndaṅ num miag Tshùaben.

³³ Nda' ndù ba mbwe' ke mi ntùm ngô; ngô lo ke yoṅ nsô ntù i num Nsi tà tse kua' mebwô.

³⁴ Tshé' mfa' Yosafat, mbwe mfa' mi boa mi njam, bo kite ntùm ṅwa'ni nekwimte nu Yéhu nshum Hanani, nkite njoṅ tshen nà fa ntùm ṅwa'ni fenfen Israél.

³⁵ Yen nà lo be tôg Yosafat mfen Yuda so wul i num mfen Israél, Akazia, ze nzin mi na' mbag neshu là.

³⁶ Bo yi tamte nabte nsitima mi a ghù nèn Tarsis là. Bo nabte nsitima Esion-Guéber.

³⁷ Ndùlala Eliézer nshum Dodava ze Marésha tshob ntshob ngatshob ntshob Nsi num Yosafat ntshob ndù: Mb'o tamte bin Akazia là, Tshùaben nsi bagte fa' so. Bo be'te nsitima; a ke bèn nku'ni nenèn Tarsis.