2 Kronika 2 - NTSHOB NSI

Salomon nabte mba bo kut ndà Nsi là

¹ Salomon tsho' benntùn ntsha' ṅam sammbàa num neke nket lèt, benntùn ntsha' ṅam fome num neke ntshua'te ndoṅ num mbale, benntùn ntsha' tat nkù ntôg num neke ndôte fa'.

² Salomon tum bo nèn ntshob Huram mfen Tiro ndù: Ghù me mb'o na' ngù tàa David là, nummb'o lo tum sédra yi a kut ta' ba' tswe yi.

³ Tshù, m'a' kut ta' ba' num lén Tshùaben Nsi àm, mfà yen ba' là yi, nke nton labinda nelamte yi, nke mfà bàn le'te bwe njoṅ ntshùa ṅwù boa njùa Tshùaben Nsi be, kua' mb'a ntùm ntshù' Israél z'a tswe matmat là.

⁴ Ba' ze m'a' kut là b'a ze ndùb, nummbe Nsi be ghu' ntshùa njoṅ tsemo' nsi fa.

⁵ Là, we z'a ku'ni nekut ta' ba' yi à? Mba kua' ba nkamànyam kag mb'a b'a tswe ntùm bwe là. Me yôg mb'a we nekut ta' ba' yi à? Mb'a b'a nda' neke nton ba labinda mbwe i.

⁶ Ndùlala tum ta' nkum ngave me num tshu gol, silba, tùn fôgtab bo tùne, num ba nzwe nto'nto' meba, z'a b'a nzwe'nzwe' bo ze nenàfi là. A bwô ndù a lèn nekom ju mebwô; a nsi fa' boa kum ghave tse bo mbaṅ àm Yuda mba Yérusalém nà. Tàa David na' mbèn ntsho' tshen ben nà.

⁷ Tum mba ba ntshwèn tù sédra ts'a fe Liban nà, ba ntshwèn tù bù bo ze sandal; nummbe me lèn mbe ghafa' tsho lèn tu yub num nekeb ntù Liban. Tshàm ghafa' nsi bèn ywimte yube.

⁸ A bwô bo ghù ntshwèn me a yàme, nummbe ba' ze me tshwèt ndiag nekut là a' zi mbèn mbwô neshu.

⁹ Me nsi fà ntsi ngefet ndùb ntsha' ṅam mbàa, ntsi nkun ndùb ntsha' ṅam mbàa, mban ndu' ntsha' ṅam mbàa boa mban mfèt ghafa' tsho tse bo ke' ntù mbèn nkebte là.

¹⁰ Huram mfen Tiro bùnte ntùm ta' ṅwa'ni z'a tum Salomon nà ndù: Tshùaben ghom o fen num ze nzwit mèn à nummb'a num nkô yube.

¹¹ Huram bèn ntshob ndù: Ghamte be Tshùaben, Nsi Israél z'a nabte kamànyam bo tsha' là; nummb'a fà ta' nzenu nshum David. A b'a ngazete, mbe ngasiaṅte, mbe ndù a nsi kut ta' ba' Tshùaben, bèn kut ta' ba' z'a b'a ze là.

¹² Tshù ta' nkum mèn mbe ngasiaṅte là me tum wù là. A b'a Huram-Abi,

¹³ mbe nshum mo' mènnzwi z'a tum à netèt ngonngon Dan nà. Tàab b'a ze Tiro. A b'a nkum ngave num tshu gol, silba, tùn fôgtab bo tùne, num ndoṅ boa ntshwèn, num ba nzwe nto'nto' meba, ba nzwe nenàfi, nzwe bisus bo ze karmin; a lèn tu i num nzenze tshu nekome tse be bo bètte ndù a fa' là. A nsi fa' boa tsho kum benntùn, boa tse kum benntùn tshùaben àm David, z'a be tàan nà.

¹⁴ Ndonni a bwô ndù tshùaben àm tum ngefele, nkun, mfèt bo ndu' mi a na' ntshob là ghafa' tse.

¹⁵ Mba bag là, bag nsi keb ntù Liban njoṅ z'o nsi kô là. Bag nsi latte ntù ma' dibantse a swe' nkum Yafo, o lo' nko' nèn yi Yérusalém.

¹⁶ Salomon siaṅ ghùn tse bo ke ntswe ntùm ngô Israél, tse tàab David na' nsiaṅ yub là. Bo be ntùm ngô ntu ntsha' ntshob tat bon tàn nkù ngù ben nkù ntôge.

¹⁷ A nèn netèt bo ndo' benntùn bwe ntsha' ṅam sammbàa num mfa' neket lèt. Tse ntsha' ṅam fom be num netshua'te ndoṅ num mbale. Tse ntsha' tat nkù ntôg nke ndôte fa' mbèn nke ngù ngô mfa'a.