2 Kronika 19 - NTSHOB NSI

Yosafat yab ghasa'kam Yuda

¹ Yosafat mfen Yuda bèn njam ntùm ndà i Yérusalém mum fite.

² Yéhu nshum Hanani, ngatshob ntshob Nsi nèn mbwe i. A tshob mfen Yosafat ndù: Be bo ywimte ngatshùagntù ké? O kô ndù bo ywimte ben tse bo num mban Tshùaben nà ké? A tshùa ndùlala Tshùaben ya ntù num o.

³ Là, o ghù bon tshu ntùn num bwe ts'o ghù là. Nummb'o lo biagte ba neto ntùm ngô, mbèn njab ntù o neke ndiag Nsi.

⁴ Yosafat tswe Yérusalém. Yen nà be tôg a bèn nzinte netèt ngô, neto' Ber-Shéba tà nkum num mbat Efraim, mbèn nsoṅ ngô nso num Tshùaben, Nsi tà tshobe.

⁵ A yab ghasa'kam ntùm njoṅ ntusô Yuda fa mi bo kut ntsham ntsiag là, njab mba ntùm sit tusô lo.

⁶ A tshob ghasa'kam ndù: Bin zete num ju ze bin nsi ghù là, nummbe bin ke' ke sa' kam à num lén benntùn; a b'a num lén Tshùaben. A nsi ke be mbaṅ bin mba zit ngelaṅ no bin a' keb kam nà.

⁷ Ndonni a bwô nebwôg Tshùaben be num bin. Bin zete num ngùninu mine, ndèn ndù mfànnu ke nelôte ntshù benntùn no ke num Tshùaben Nsi be. A ke' be bam bo junt'é.

⁸ Ndùse bo bèn njam Yérusalém nà, Yosafat yab ghasa'kam mba bwe, num mi nkam Tshùaben mba num ba ntanta. A yab à ben Lévi, ghafà tshule'te boa fenfen tse bo tum ntùm tshob tunndà tà là. Tshen ben ni ke ntswe à Yérusalém.

⁹ Yosafat tshob bo ndù: Bin nsi ke ghù ndùlili ntùm nebwôg Tshùaben, ntùm nenùn mba ngô ntù zin fa ntùm netsine.

¹⁰ Num njoṅ ntanta tse fèt tsin se' yi mbwe bin, ndù bo tum à ntùm mub ntusô là, bin lànte miag mube; ndùlala ndù kà fèt tsin be ghafànnu mbwe Tshùaben, nkamte yantù i num bin mba num yub tu. Tshen ntanta là ghù nekwag nu num nezwi mèn, ta' ntshù', ta' kàn, ba ntag boa nkàn. A mb'a bwô ndù bin ke ngù là. A nsi tshùa ndùlala bin ke tum ghafànnu.

¹¹ Tshù, Amaria ngafà jule'te ze ndùb bèn mbe tu netèt bin num nu ts'a kwag Tshùaben nà, Zébadia nshum Ismaél mfen tunndà Yuda be tu num njoṅ tse nu mfen fa. Ben Lévi be netèt bin à mba ghakite là. Bin lo' fènntù nke ngù ndùlala. A bwô ndù Tshùaben be bo mba we lo z'a nsi ghù mebwô là.