2 Kronika 16 - NTSHOB NSI

Asa kam mfen Baesha ntsho

¹ Asa lo be ghù num fen ngu'njù ntshob ntôg ṅam ntat, Baesha mfen Israél ko' nèn num Yuda; a kut Rama num netshètte tse ben Asa mfen Yuda yi, ndù kà bo tum ke bèn ntsho.

² Asa lo' njoṅ silba fa bo gol ts'a be ntùm tshunkàb ndà Tshùaben bo tshunkàb ndà mfen nà, ntum benntùn mbaṅ Ben-Hadad, mfen Siria, z'a ke ntswe Damas là.

³ Mfen Asa tshob yi ndù: A bwô ndù be wat kàn netèt be, ndaṅndaṅ mba tàa na' ngwat kàn bo yu tà là. Tshù nda' là me tum wù là, a b'a silba bo gol. Nèn mbiagte kàn s'a be netèl o bin Baesha mfen Israél là, ndùlala ndù a lo njam àm.

⁴ Ben-Hadad bam nu ze mfen Asa tshob yi là; ntum tàndà ntsho tse num mi ntusô Israél. Bo lo' Ijon, Dan, Abél-Maim boa njoṅ ntusô fa mi a be Néftali bo nke ndem tshu bwe là.

⁵ Ngelaṅ Baesha ju' là, a tsin, ke bèn nekut Rama, ke bèn nèn mfa' mbwe.

⁶ Mfen Asa tshob ba Yuda fa ket ndoṅ boa ntshwèn ze Baesha ke ndo' nkut Rama yi là, mfen Asa lo' tshen tshu là nkut Guéba bo Mitspa yi.

Asa ma' ngatshob ntshob Nsi Hanani tsha

⁷ Hanani ngayente nèn mbaṅ Asa mfen Yuda yen ngelaṅ nà, ntshob yi ndù: Mb'o yé'te num mfen Siria, ke yé't'a num Tshùaben Nsi o là, ntshu ntsho Siria tum mum mbu mu.

⁸ Ba Etiopia boa ba Libia lo ke tamte mb'a ta' ntshu ntsho ndùb ké? Bo lo ghù nkalig boa bwoṅ ghako' nyàm. Mba tà ndùlala Tshùaben lo swèn yub ntùm mbu mu, nummb'o lo yé't'a num i.

⁹ Nummbe Tshùaben be ma' miag mi num njoṅ nsitsha' fa, num neke ntomte ben tse ntù yub yab num i fa là. O lo ghù à mba nkagni là ntùm yen nu là, nummb'o nsi ma' ntsho yàm neto' ndonni.

¹⁰ Asa ya ntù num ngayente, ntshob bo ma' i ndàtsha, nummb'a lo ghù yantù num i. Be num yen ngelaṅ nà, Asa ma'ni tsemo' ben ntùm ngô.

Miagte nufen Asa

¹¹ Mfa' Asa, mbwe mi boa mi njam, bo kite ntùm ṅwa'ni fenfen Yuda boa tse Israél.

¹² Asa lo be kum num fen ngu'njù ntshob bwe'e ṅam ntat nku mi nke nja, k'a b'a ntùm ntobni yàme; mba ndùs'a ke ngon nà, a ke diag tse Tshùaben, a bètt'a nda' ghatshwinte nu.

¹³ Asa nèn ntèt tà tse. A be kwù ndù a tswe num fen ngu'njù ntshob ntshù' ṅam nkuà;

¹⁴ bo tshoṅ i ntùm fi se tu wul i tswe' ntùm tusô David là. Bo yab fe i num ta' kunndà ndù bo tete ba nda boa labinda tse bo nabte num ze mat ngatamte labinda là. Bo ton mbe' yàm i num lén Asa, ndo' nku'ni lén se yi.