2 Kronika 14 - NTSHOB NSI

Neto'te nufen Asa

¹ Asa ghù nu z'a bwô là bo nu ndaṅndaṅ num miag Tshùaben Nsi i.

² A biagte ntômbwôg tse nsi ngùn boa mbwe', mbe'te ba neto, ndab ba ndoṅla' naṅ nsi.

³ A bètte Yuda ndù a diag Tshùaben, Nsi tà tse, nke nze ntshù' boa nkàn mi.

⁴ Asa biagte njoṅ mbwe' fa ntùm njoṅ ntusô Yuda fa boa neto tse bo yo' yub num lén lagnyam nà. Njoṅ ze nufen fa tswe fite mbwe i.

⁵ Asa kut ntusô ntùm Yuda ntsham ntsiage; nummbe ngô lo tswe fite, ke ma' ntsho num tshen ngu'njù là. Tshù, Tshùaben lo fà fite yi.

⁶ A tshob Yuda ndù: Be kut men ntusô là, ndo' ba nkum ba' ndam i yi mbume, ngù ba dù' nebéb dù' bwe, ngù ba nzendà boa ba fùnndà bwe; ngô ke' a mbwe be, nummbe bag bin lo diag Tshùaben Nsi be, be lo diag i, a fà fite be njoṅ bag tse fa. Ndùlala bo kut dù' kà miagte.

⁷ Asa lo ghù ntshu ntsho bon Yuda ndù benntùn bwe ntsha' nkù tat, ghaket tshètntsho, nke ntshùb kô, bo ntshu ntsho bon Benjamin, benntùn ntsha' bon fom nkù bàa, ghaket tshètntsho, mbe ghama' két. Njoṅ yub fa b'a ba neta nduku.

⁸ Zérak ze Etiopia tum nkam yub ntsho boa ntshu ntsho benntùn ntu ntshu', ngù nkalig nkù tat. A zin tà nkum Marésha.

⁹ Asa tum nse' mbwe i, bo to' ntsho ntùm tômbo' Tséfata mba ṅ Marésha.

¹⁰ Asa tsiaṅ Tshùaben Nsi i ntshob ndù: Tshùaben, nda' wù tù' wù bèn nku'ni nese' njwimte mèn nebot mba mèn neta. Tshùaben Nsi yag, se' njwimte yage! Nummbe bag ke njé't'a num o, bag lo' à lén so kà nse' yi num yen mà bwoṅ benntùn ni. Tshùaben! O b'a Nsi yag; kà bam ndù mènntùn bèn ntshùa o!

¹¹ Tshùaben lab ba Etiopia mbwe Asa bo Yuda, ba Etiopia kù nène.

¹² Asa bo ngô ze bo be njam i là yab njam ba Etiopia, nta' yub tà nèn nkum Guérar, ba Etiopia vù ke ku'ni netshu' tu yube, nummbe Tshùaben bo ze ntshu ntsho lo biagte yub fafa. Asa bo ngô lag ntsha' kua' yàm yàme.

¹³ Bo biagte njoṅ ntusô fa mi a ghebte Guérar là, nummbe bwôg Tshùaben lo ghom men ntusô là. Asa bo ngô lag ntsha' ntùm ntusô mi nkam be ntùm bwe yàm nà.

¹⁴ Bo sate mba ba ntàb nyàm, ndo' bwoṅ mbwe yàm nèn yi boa kamél. Yen nà be tôg bo bèn njam Yérusalém.