2 Kronika 12 - NTSHOB NSI

Shishak mfen Egipto lo' ngô Yuda

¹ Ndùse Roboam yen ndù se fen ghume, a bèn ngù neta là, a ghua' ntshù' Tshùaben, njoṅ ba Israél fa tamte ngua' ntshù' Tshùaben boa bo.

² Roboam lo be ghù ngu'njù tàn num fen Shishak mfen Egipto ko' nkam Yérusalém ntsho, nummbe bo lo ghù nukebwô Tshùaben.

³ Shishak lo ghù nkalig ntshob bàa ntsha' mbùm, ngù ghako' nyàm ntsha' ṅam sammbàa; bo mo' nzwit mèn z'a yàm neshu là na' mbèn nko' Egipto: Ba Libia, ba Sukkia boa ba Etiopia.

⁴ A lo' ntusô Yuda mi bo kut ntsham ntsiag là, nèn tà nkum Yérusalém.

⁵ Ndùlala Shemaéya ngatshob ntshob Nsi nèn mbaṅ Roboam boa fenfen Yuda tse bo kù nèn Yérusalém ndùse Shishak ke ngebte, ntshob bo ndù: Tshù mba Tshùaben tshob li: Bin lo ghua' àm, me ghua' zin yàm, me swèn zin mum mbu Shishak.

⁶ Fenfen boa mfen fà wut nsi ntshob ndù: Tshùaben b'a Mèn netsine.

⁷ Ndùse Tshùaben yen mba bo fà wut nsi là, a tshob Shemaéya ndù: Bo fà wut nsi, me ke nsi sate yube, me ke ghubte kà njwimte yube; yantù àm ke bèn nsa num Yérusalém à njam Shishak;

⁸ là, bo nsi be nte' yi, lèn ju ze nefa' tsemo' nufen, ntùm tsemo' ngô be yi là.

⁹ Shishak mfen Egipto ko' nkam Yérusalém ntsho. A lo' tshunkàb ndà Tshùaben boa tse ndà mfen, nket njoṅ i fa nèn yi. A lo' ntshètntsho gol mi Salomon na' nabte là.

¹⁰ Mfen Roboam nabte ntshètntsho tùn fôgtab ndo' mbate men nà yi, mfà ntùm mbu fenfen ghakùnde tse bo ke mbéb nze netsho yi ndà mfen nà.

¹¹ Njoṅ ngelaṅ fa tse mfen ke nèn ndà Tshùaben nà ghakùnde nèn, mbe nèn nket men ntshètntsho là; ndùse bo bèn nà, bo bèn njab ntùm to'ndà ghakùnde.

¹² Mba Roboam fà wut nsi là, Tshùaben sô yantù i num i, ke sat'é fafa. Tshu ntùn lo bèn nke' Yuda.

Miagte nufen Roboam

¹³ Mfen Roboam ghum Yérusalém nke ntô. A lo be jù fen ndù a ghù ngu'njù ntshob ntshù' ṅam nkuà, ntô num ngu'njù ntshob sammbàa gham, nke ntswe Yérusalém. Yérusalém b'a tusô ze Tshùaben na' ntsho' ntùm njoṅ nzwit Israél fa, nete lén se bwe là. Lén màab na' mb'a Naama, mbe ngon Ammon.

¹⁴ A ghù nukebwô, nummb'a lo ke yab ntù i neke ndiag Tshùaben.

¹⁵ Mfa' Roboam, mbwe mi boa njam mfa' mi, bo kite ntùm ṅwa'ni ngatshob ntshob Nsi Shemaéya bo ngatshob ntshob Nsi Iddo, netèt ṅwa'ni nkùndà. Ntsho lo ke be tag netèt Roboam bo Yéroboam.

¹⁶ Roboam nèn ntèt tà tse, bo tshoṅ i ntùm tusô David. Abiya nshum i tô num ze dù'.