2 Kronika 11 - NTSHOB NSI

¹ Roboam kum Yérusalém, ntse'te tunndà Yuda bo ze Benjamin, bo tum ben ntsha' bon fom nkù, tse bo ku'ni nema' ntsho là, ndù bo ma' Israél ntsho, mbèn ndo' i mbèn yi njam Roboam bèn nke ntô yube.

² Là, Tshùaben tshob Shemaéya mèn Nsi ndù:

³ Tshob Roboam nshum Salomon mfen Yuda boa ba Israél fa tse bo Yuda mba Benjamin nà ndù:

⁴ Tshù mba Tshùaben tshob li: Kà bin ko', ke ma' fèt tsin ntsho! Mba we lo netèt bin bèn ntùm ze ndà, nummb'a b'a me bèn nkô ndù yen nu là be. Bo ju' ntshob Tshùaben, mbène, nga nema' Yéroboam ntsho.

Roboam kut ntusô yàme

⁵ Roboam tswe Yérusalém, nkut ba ntusô ntùm Yuda ntsham ntsiage.

⁶ A kut Bétléhém, Etam, Tékoa,

⁷ Bét-Tsur, Soko, Adullam,

⁸ Gat, Marésha, Zif,

⁹ Adoraim, Lakis, Azéka,

¹⁰ Tsoréa, Ajalon bo Hébron, ntusô mi a be Yuda mba Benjamin nà, nkut men nà ntsham ntsiage.

¹¹ A kut yub kua' mebwô, a yab ba tàndà ntsho bwe, ngù ba nta jujù, mfèt boa ndu' bwe.

¹² A yab ntshètntsho boa nkô ntùm mba sit tusô lo netèt men nà, mbèn nabte yub nkut neta. A na' mbèn ngù Yuda bo Benjamin.

Ghale'te Nsi boa ben Lévi tam njam Roboam

¹³ Ghafà tshule'te boa ben Lévi tse bo be ntùm ngô Israél fa tum ntùm tshob dù'ntswe nse' mbaṅ Roboam;

¹⁴ nummbe ben Lévi lo ghua' mub ntaṅla' boa tshob ntshù' nse' Yuda, mba Yérusalém. Yéroboam boa tse nshum lo ke ntshètte yub nefa' mub mfa' mba tse ghafà tshule'te Tshùaben nà.

¹⁵ Yéroboam ghù ghafà tshule'te num ba mbwe', num mfot mbwe, mba num ba mfô ts'a nabte là.

¹⁶ Njoṅ benntùn fa ntùm njoṅ nzwit Israél fa tse bo ghù ntù nediag à Tshùaben, Nsi Israél là, tam njam ben Lévi Yérusalém num nefà tshule'te Tshùaben, z'a be Nsi tà tshob là.

¹⁷ Bo fà neta ntùm ze nufen Yuda, ngù fen Roboam nshum Salomon ghum num ngu'njù tat; nummbe bo lo zin num ze nze David bo Salomon num njù ngu' tat.

Tunndà Roboam

¹⁸ Roboam so Mahalat ngon Yérimot nshum David bo Abikail, ngon Eliab, nshum Isaï.

¹⁹ A bwe nshumnshum Roboam: Yeshe, Shemaria bo Zaham.

²⁰ A bèn nso Maaka ngon Absalom njam Mahalat. Maaka bwe Abiya, Attai, Ziza bo Shelomit yi.

²¹ Roboam lo ke nkô ngon Absalom ntshùa tsemo' zwi tse boa màndà tse fa; nummb'a lo ghù bènnzwi ntshob fom gham, ngù màndà tse ṅam sammbàa; Roboam lo ghù nshumnshum ntshob fom ṅam mbàa, ngù ngonngon ṅam sammbàa.

²² Roboam fà mbwe dù' Abiya nshum Maaka, njab i mfen netèt fèt tse, nummb'a lo ke nkô nelo' i ngù mfen yi.

²³ A ghù njoṅ i fa bo mfù, ntshag nshumnshum tse ntùm njoṅ ntaṅla' Yuda bo Benjamin fa, ntshag yub ntùm ntusô mi bo kut ntsham ntsiag là; a nke mfà jujù bo kua' yàm yàme, mbèn mbètte bwoṅ bènnzwi yàm bo.