2 Kronika 1 - NTSHOB NSI

Tshô Salomon, mfen ba Israél

¹ Salomon nshum David taṅ nga ntùm se fen. Tshùaben Nsi i nke mbe bo yi, mbù't'é ntshag tù neshu.

Salomon bètte zenu Nsi kà tô yi

² Salomon sa' njoṅ ba Israél fa, fenfen ben ntsha' mbùm boa fenfen ben nkù, ghasa'kame, kamkam bon Israél, fenfen tunndà tà;

³ Salomon nèn boa mbumte fa ntùm mbwe' z'a be Gabaon nà. Ndà mbumte Nsi, ze Mosé ngafa' Tshùaben na' nkut kônkwa là.

⁴ Là David lo ket Koṅ Kàn Nsi Kiriat-Jearim nèn yi dù' z'a nabte neyab bwe là; nummb'a lo dù' ta' ntàb Yérusalém num bwe.

⁵ Mba tômbwôg tùn fôgtab lo be Gabaon, Betsaléel nshum Uri, nshum Hur na' mbèn nabte tômbwôg là. Salomon bo mbumte diag Tshùaben.

⁶ Salomon ton tshule'te ntsha' mbùm Tshùaben num tômbwôg tùn fôgtab s'a be mbwe ndà mbumte là.

⁷ Nsi ṅwag Salomon ntùm njem tèttswe' ntshob yi ndù: Bètte ju z'o kô là me fà wù.

⁸ Salomon bùnte Nsi ndù: O lo lo' tàa David kua' mebwô neshu, mbèn ngù me nke ntô num ze dù'.

⁹ Tshùaben Nsi, ndonni nka'ni z'o ka' tàa David bumte, nummb'o ghù me nke ntô ta' nzwit mèn z'a yàm mba mbab mi a nsitsha' là!

¹⁰ Ndùlala fà zenu bo nesiaṅte me, a tshùa ndùlala me lèn nezin mbwe yen nzwit mèn ni! We z'a ku'ni netsho'te yu nzwit mèn à? Yen nzwit mèn ni yàm neshu.

¹¹ Nsi tshob Salomon ndù: Mba yen nu li bèn nko' ntù o, o ke bètt'a tshunkàb, tshu yàme, nkuni, vù ghakeban tsho, netswe njù yàme là, mbètt'a zenu bo nesiaṅte, tshùa bwe ke tsho'te yàm nzwit mèn ze me te o num netô i là,

¹² me bam nefà zenu bo nesiaṅte wù. Me nsi bèn fà tshunkàb, tshu yàm bo nkuni wù njam bwe. A b'a ju ze sàm mfen mba ntshù' na' mbe ke ghù mbwe o; mbe ndù sàm mfen ke nsi tum njam o ghù là.

¹³ Salomon bèn njam Yérusalém. A lo a mbwe' z'a Gabaon nà mba ntùm ndà mbumte. A nke ntô Israél.

Ngù' bo nkàb Salomon

¹⁴ Salomon lo ghù nkalig ntsho ntshob kuà ntsha' mbùm boa ghako' nyàm benntùn 12 000, njabte yub ntùm ntusô nkalig ntsho, njab tsemo' mbaṅ i Yérusalém.

¹⁵ Mfen ghù silba bo gol tù' ju banban Yérusalém ndaṅndaṅ mba ndoṅ nà; sédra bèn njàm mba ba fènngab ts'a be mbile, nke nku' ntùm tômbo' là.

¹⁶ Tse nyàmdiaṅ Salomon na' nke mfe à Egipto. Mfen lo ke nèn diage, num njoṅ ntshu ntàn ze bo nabte là;

¹⁷ bo lo ke ndo' ta' kalig nko' yi Egipto num ndô nkàb silba nkù ntôge, nke nko' ta' nyàmdiaṅ num ndô nkàb silba bon tàn nkù (150). Be bo na' mbèn nke njun mba tse njoṅ fenfen Hit boa tse Siria.