2 Korintô 9 - NTSHOB NSI

Ghafen b'a ghafà

¹ Mbe se' mba fa' neywimte ben nelàn nà, a ke' bwô ndù me bèn nkite bin.

² Nummbe me lèn zin kù ntù, ze me num nta' nsoṅ yi num bin mbaṅ ba Makédônia ntshob ndù: Akaya lo à nabte sen fa' là ngu'njù z'a tôg là. Nkôni zin lo tènte ben yàme.

³ Là me tum fètfèt bin ndù kà nta'nsoṅ mag num bin num yen dù' nu li tù' nu tshabte, là ndù bin nabte sen fa' là mba m'a tshob là.

⁴ Nummbe a be ze ba Makédônia se' tshag àm, ntèt zin ndù bin ke' nabte sen fa' là là, mba tuswe nsi ko yage, ndù kà me tshobte zine num yen dù' nu là.

⁵ Ndùlala me lo yen ndù a bwô nele'te fètfèt ndù bo se' la' bin, ndù bo nabte fa' bwôntù se bin na' nka' zin tu là, ndù yen ma'te là b'a kua' fa' bwôntù, ke b'a fùte.

⁶ Bin lèn yen ni ndù: Mèn z'a ywit metsili là nsi tsho' à metsili; mèn z'a ywit yàm nà nsi tsho' yàme.

⁷ Mba zit mèn no ghù mb'a kwate ntù i là, ke tshàm, ke mèn nànt'é. Nummbe Nsi num nkô mèn z'a fà ntùm tsiaṅte là.

⁸ Nsi ku'ni nefà njoṅ nzenze kondèn fa bin, ndùlala ndù njoṅ ngelaṅ fa, num njoṅ tshu fa, bin ghù njoṅ tshu fa ts'a ku'ni num bin nà, mba ndù bin ghù ntshùate num njoṅ mfa' mebwô fa,

⁹ ndaṅndaṅ mba bo kite ndù: A ghabte, a fà bwoṅbwoṅ, nunetsin i ghô yoṅ ntshù'.

¹⁰ Mèn z'a fà nzwit ju ngaywit ju, mfà bàn yi num jujù là, nsi fà nzwit ju bin, ghù a yàme, a nsi ghù ntàm nunetsin zin yàme.

¹¹ Mba bin tù' ghankàb num njoṅ tshu fa là, bin ku'ni nela'te njoṅ nkôni fa, ndù a tshùa num bin ghamte nèn mbwe Nsi.

¹² Nummbe sen fa' là s'a be ju nele'te Nsi là, ke b'a nda' ju z'a nsi zwiagte tshu ts'a tsi ben nelàn nà, là, a nsi ghù ghamte z'a yàm ntshùate là nèn mbwe Nsi.

¹³ Sen fa' li la'te mba bin be là, bo nke ngamte Nsi num zin nkôni z'a tamte zin bin à bo mba njoṅ yub là.

¹⁴ Bo num nde'te Nsi num bin, nke nkù ntù num bin tse Nsi fà kondèn z'a tshùate là bin nà.

¹⁵ Ghamte be Nsi num ju z'a num mfà, mènntùn ke ku'ni nesoṅ njoṅ i là.