2 Korintô 8 - NTSHOB NSI

Ntag num ma'te

¹ Fèt tshàm, bag kô bin lèn kondèn ze Nsi fà ba ntse'te benkristô Makédônia là;

² ntùm laṅte yàm tse nge' yab yub bwe là, tsiaṅte yub z'a dun ntshùate là, mba nebwoṅ yub z'a gha' mbu là, lo yam nkôni ndùb ntù bo.

³ Nummbe me b'a ngakwénta ndù bo fà mba bo ku'ni là, mfà ntshùa mba bo ku'ni là, mfà ntùm ntù tsiaṅte,

⁴ mbètte yag ntùm le'te yàm ndù bag ko ndèn mube, mbam ndù mba bo yub fà ywimte ben nelàne,

⁵ ke b'a nda' mba bag ke nywinte là, là bo lo bwôgmbwe mfà tu wut tshob Tshùaben, mbèn mbatte bag, mba Nsi kô là.

⁶ Bag lo le'te Titô ndù a miagte fa' kondèn s'a na' nto'te netèt bin nà.

⁷ Là bin dun ntshùate num njoṅ i fa, bamntù, netshobe, zenu, njoṅ fa' mebwô fa, nkôni z'a fe bag mbe bin nà, mba bin zin dun ntshùate num sen fa' kondèn nà.

⁸ Me ke' tshob yen ni à kekônkô, là me lo' mebwô tsemo' ben ndaṅte zin yi, num neyen nenùn zin nkôni.

⁹ Nummbe bin lèn kondèn Tshùaben be Yésu Kristô, yi ngankàb lo tù' mbwoṅ num bin, ndùlala ndù bin tù' ghankàb njam bwoṅ i.

¹⁰ Me fà à màm nkwate ntùm yen nu li; nummbe bin à lèn yen nu li; fe ngu' z'a tôg là bin na' mb'a mbwe benntùn, ke b'a nda' num nefa'a, là mba num nekô fa'.

¹¹ Ndonni, bin miagte sin fa'; mba bin tshwèt nkù ntù nekô i là, a bwô bin bèn miagt'é mba bin ku'ni là.

¹² A be ze mèn kù ntù nefa' là, mba bo nsi bam i num ju z'a ghù là; be bo ke bètt'é ju z'a ke' ghù là.

¹³ A ke b'a ndù tsemo' ben be fite, bin ke njen nge', là, a bwô nu ndaṅndaṅ be.

¹⁴ Ntùm yen ngelaṅ ni, ju ze bin ghù ntshùate là ywimte ben ts'a tsi bo là, ndùlala ndù mba yub ju ze bo ghù ntshùate là ywimte zin ts'a tsi bin nà, ndùlala ndù nu ndaṅndaṅ be.

¹⁵ Ndaṅndaṅ mba bo kite ndù: Mèn z'a ghù yàm nà lo ke ghù ntshùate; mèn z'a ghù metsili là, lo ke bwoṅ sàm ju.

¹⁶ Ghamte be Nsi z'a yab fa' mebwô ntù Titô num bin nà,

¹⁷ a bam mba bag le't'é là; mb'a dun fa' mebwô là, a se' la' bin à ntùm ntù tsiaṅte.

¹⁸ Bag tum i bo mo' mfèt ze njoṅ ntse'te benkristô fa num nyàmt'é num nu nkùn mebwô là,

¹⁹ a ke b'a nda' ndùlala, là ba ntse'te benkristô lo tsho' i ndù a be nshun zin yag ntùm fa' kondèn se bag tshwèt mfa' num nkuni tu wut Tshùaben, mba mba tu wut be tshwèt nkù ntù là.

²⁰ Bag ke nzet'a ndù kà sàm mèn tshabte yag num yen ma'te ndùb là ze bag tshwèt ntse'te là;

²¹ nummbe bag num nkô à tshu mebwô, ke b'a nda' mbwe Tshùaben, là mba mbwe benntùn.

²² Bag tum yub bo mo' mfèt yag ze bag laṅt'é yoṅ yàme, ntùm mat nzenze, njen ndù a dun fa' mebwô là, là ndonni a dun fa' mebwô ntshùate num nenywinte z'a be num bin nà.

²³ Mba Titô là, a b'a nshun àm, mba nshunfa' netèt bin, mba fèt tshag là, bo b'a ghantum tse ntse'te benkristô tum nà, bo b'a nkuni Kristô.

²⁴ Ndùlala, mbwe ba ntse'te benkristô, bin tswite bo ndù nkôni zin mba nta'nsoṅ mag num bin b'a nenùne.