2 Korintô 7 - NTSHOB NSI

¹ Fèt tshàm tse nkôni, mba bag à bin ghù lèn men nka'ni li là, bag à bin lànte njoṅ ṅu' mbàb wut fa mba njoṅ ṅu' ntù fa num be, miagte ze be nelànte ntùm nebwôg Nsi.

Tsiaṅte Paulo num ba Korintô

² Bin ghù yag dù' ntùm ntù tsine. Bag lo ke ghù nuketsin mèn, bag lo ke bagte mèn, bag lo ke fùte mèn.

³ Me ke' tshob yen n'a num nema' ntsha yi tu bin, nummbe me lo bwômbwe ntshob bin ndù bin b'a ntùm ntù tshage, num nekwù mba num neyôge.

⁴ Me faṅ njam mvèn àm bin, me num nta' nsoṅ num tu bin, me dun nefitentù mba tsiaṅte z'a tshùate là ntùm njoṅ nge' tshag fa.

⁵ Nummbe ngelaṅ bag kum Makédônia là, mbàb wut yag ke ghù fite, là nge' lo fét yag njoṅ dù' fa, zwe' be njam njù, bwôg be ntùm bwe.

⁶ Là Nsi z'a num mfite ntù ben bo vù nsi là, lo fite ntù tshag num ze nese' Titô,

⁷ ke b'a nda' num ze nese'e, là mba num nefitentù ze bin na' mfite ntù i yi là, nummbe a soṅ yag zin nekù ntù, ntsenyà min mba nkôni min num àm, ndùlala me bèn ntsiaṅte neshu.

⁸ Mba mba me na' ngùtni zin ntùm ṅwa'ni àm nà, me ke' tshàm; mba mba m'a tshàm nà, nummbe me yen ndù ṅwa'ni là lo ghùtni zine, mba mb'a b'a nda' mo' metsit ngelaṅ nà,

⁹ ndonni me tshwèt ntsiaṅte, ke b'a mb'a na' ngùtni zin nà, là nummbe yen ngùtni là lo ghù bin kaṅ ntù tsine, nummbe yen ngùtni là b'a num ze nekô Nsi, ndùlala bag lo ke ghù bin bi sàm ju.

¹⁰ Nummbe ngùtni z'a b'a num ze nekô Nsi là num njam nekaṅ ntù num yôg se bo ke' be tshàm nà, là ngùtni z'a b'a ze njù là, num njam vù.

¹¹ Tshù lèn fa' mebwô se ngùtni z'a b'a num ze nekô Nsi là, yam num bin nà njene, nekwénta wut tsine, netshàme, nebwôge, nekù ntù, nenànte, nevù ntsha, num njoṅ i fa, bin lo kwé nta wut tsine, nda'te ndù bin b'a nelàn num yen ntsha là.

¹² Ndùlala, a be ze me na' nkite bin nà, mb'a ke na' mb'a num mèn ze bo tshabt'é là, ke num mèn z'a tshabte là lo, a na' mb'a ndù fa' sin se mebwô num bag la'te wul i netèt bin mbwe Nsi.

¹³ A b'a yen nà bèn mfite ntù tshage, ntùm yen nefitentù là, bag lo bèn ntsiaṅte neshu num tsiaṅte Titô, nummbe njoṅ zin fa lo tswe'te ywèt tse.

¹⁴ A be ze me na' nta' nsoṅ mbwe i num tu bin nà, mba tuswe ke ko àm, là mba bag na' ntshob njoṅ i fa bin à ntùm nenùn nà, nta'nsoṅ mag mbwe Titô b'a nenùne,

¹⁵ nkôni i num bin num njàm ntshùate ngelaṅ z'a tshwèt nkwimte zin neju' ntshu, mba mba njoṅ zin fa na' ndo' i ntùm nebwôge, mba nevètte là.

¹⁶ Me tshwèt ntsiaṅte mb'a be me nywinte zin num njoṅ nu fa là.