2 Korintô 4 - NTSHOB NSI

Nkùn mebwô b'a nka'

¹ A ndùlala, mba bo na' nko ndèn mag mfà sen fa' li bag là, bag ke' be bot,

² là bag ghua' tshu tuswe tse bo num ndem nà. Bag ke ke nzin à ntùm nkùnkù ke bèn nke mbagte ntshob Nsi, là bag num nda'te nenùne, nke nkwé nta mag mbaṅ njoṅ nze ntù benntùn fa mbwe Nsi.

³ Là, a be ze yag nkùn mebwô be ndù bo ma' kam nzwe num i là, mb'a be ndù bo ma' kam nzwe num i à num miag ben tse bo tshwèt mbi là,

⁴ ghakeban tse nsi yen njù li kag fù num nkwatenu mube, ndùlala ndù kà bo yen nka' z'a fe nkùn mebwô nkuni Kristô, z'a b'a mfuni Nsi là.

⁵ Nummbe bag ke ke ntshob à tu wut yage, là bag ke ntshob à Kristô Yésu Tshùaben, nke ndo' tu wut yag mba kuan tsin nà num Yésu.

⁶ Nummbe Nsi z'a tshob ndù: Nka' ké' ntùm njam nà, lo ké' ntùm ntù tshage, ndù nelèn nkuni Nsi z'a be num se Kristô là tswite wul i.

Neta bamntù ntùm nge'

⁷ Là bag ghù yen junkàb l'a ntùm nkab tsha'a, ndùlala ndù yen neta là z'a gha' mbu là b'a ze Nsi, ke fe à bag.

⁸ Bo num mfét yag njoṅ dù' fa, là ke b'a ndù bo nyiaṅte yag nku; bag num nywine, là ke b'a ndù bag ke' bèn nenywinte.

⁹ Bo num ntsho' nku mag kebàn, là ke b'a ndù bo tshùa yage; bo num ntamte yag nsi, là ke b'a ndù bo fà yag vù;

¹⁰ bag num nket fet vù Yésu ntùm wut yag njoṅ ngelaṅ fa, ndùlala ndù mba yôg Yésu la'te wul i ntùm wut yag.

¹¹ Nummbe bag tse bag b'a ntùn nà, bo num mfà yag vù njoṅ ngelaṅ fa num Kristô, ndùlala ndù mba yôg Yésu la'te wul i ntùm mbàb wut yag ze nekwù.

¹² A b'a ndùlala, vù num nda'te neta i num bag, yôg nke nda'te neta i num bin.

¹³ Bag ghù tshen Ywèt bamntù là tse bo kite ndù: Me lo bame, a b'a ndùlala bèn ngù kà me ntshobe, là mba bag bam, a b'a ndùlala bèn ngù kà mba bag nke ntshobe;

¹⁴ bag lèn ndù mèn z'a bam Tshùaben Yésu num vù là, nsi bam yag bag à Yésu num vù, te yag bag à bin mbaṅ i.

¹⁵ Njoṅ i fa b'a num bin, ndùlala ndù kondèn Nsi z'a dun nà ghù benntùn le'te Nsi yàme, num nkuni Nsi.

¹⁶ A ndùlala, bag ke' be bot; là a be ze yag mèn njam njù bagte là, mba yag mèn ntùm bwe ke mb'a be nswe nswe njoṅ lé'njù fa.

¹⁷ Ntùm mfi' ke ndù i, metsit nge' z'a num ntôg là, num nabte nkuni ndùb mi a tswe yoṅ ntshù' là, num bag,

¹⁸ nummbe bag ke ke ndôt'a tshu tse bo num njen miag là, là tshu tse bo ke' be yen miag là. Nummbe tshu tse bo num njen miag là b'a num mo' mén ngelaṅ, là tshu tse bo ke' be yen miag là tswe à yoṅ ntshù'.