2 Korintô 3 - NTSHOB NSI

Kàn nswe tshùa njwèn kàn

¹ Bag ghù nebèn nto' nekwé nta wut yag ké? Bag ghù neke nda'te ṅwa'ni kwénta bin, ke nekwé ṅwa'ni bin no mba tsemo' ben nà ké?

² Tu wut tsin b'a yag ṅwa'ni ze bo kite ntùm ntù tshag là, bin b'a ṅwa'ni ze njoṅ benntùn fa lène, mbèn nsiaṅ nà.

³ Bo lèn kua' mebwô ndù bin b'a ṅwa'ni Kristô, a tshùa num fa' sag kà nkite; a ke' lo' à ntseṅwa'ni nkite yi, a lo' à Ywèt Nsi z'a be ntùn nà nkite yi, ke b'a num tafèt loṅ, là num tafèt mbàb, ntùm ntù tsine.

⁴ Bag tshùa njam Kristô ngù yen nenywinte là mbwe Nsi.

⁵ Ke b'a ndù tu wut yag ku'ni nesiaṅte nu yag tu, là yag neku'ni fe à Nsi,

⁶ z'a ghù bag ku'ni, ntù' ghafa' kàn nswe s'a ke' b'a se miag ṅwa'ni, là se Ywèt là, nummbe miag ṅwa'ni num nzwi mèn, là Ywèt nke ngù mèn yôg.

⁷ Là, a be ze fa' vù se bo na' nkite num ndoṅ, na' mbe ntùm nkuni kà bon Israél ke ku'ni nete miag num se Mosé num nkuni mi a ke ntum bwe là, nkuni mi a nsi bi là,

⁸ mba fa' Ywèt ke nsi ghù nkuni ntshùate ké?

⁹ A be ze fa' nevù ntsha na' ngù nkuni là, bag à bin lèn kua' mebwô ndù fa' nunetsin nsi ghù nkuni ntshùate,

¹⁰ a be z'a b'a ndùlala là, mba ju z'a ke nkuni là, lo ke kuni mbwe men nkuni li mi a gha' mbu là.

¹¹ A be ze ju z'a num mbi là na' ntshùa ntùm nkuni là, bag à bin lèn kua' mebwô ndù ju z'a ghô là nsi nô ntùm nkuni.

¹² Mba bag ghù lèn yen nenywinte li là, bag ke mfa' à ntùm fènntù,

¹³ ke b'a mba Mosé z'a ke ma' kam nzwe se i, ndù kà bon ba Israél te miag num miagte ju z'a nsi bi là.

¹⁴ Là nkwatenu mub lo sage. Nummbe tà nse' nkum sènni, yen kam nzwe là num nke' num njwèn kàn ngelaṅ bo tshwèt nsiaṅ i là; bo ke' bù' i, nummbe a ke mbi à num Kristô.

¹⁵ A ndùlala, tà nse' nkum sènni kam nzwe num nke' num ntù yube, ngelaṅ bo tshwèt nsiaṅ Mosé là.

¹⁶ Là yen kam nzwe là ke ngwù nsi à ngelaṅ mèn kaṅ ntù i, ntam njam Tshùaben nà.

¹⁷ Tshùaben b'a Ywèle; dù' ze Ywèt Tshùaben be là, kuan ke bwe.

¹⁸ Là njoṅ be fa tse se be b'a nge là, num ndôte nkuni Tshùaben; mi a kaṅ be num mfuni mi mi a tum ntùm nkuni, ntsho ntùm nkuni, mb'a bwô Tshùaben z'a b'a Ywèt là.