2 Korintô 12 - NTSHOB NSI

Njem Paulo. Neta i ntùm nebol i

¹ A bwô neta' nsoṅe, L'a ke' ywimte. A be ndùlala mba m'a' soṅ njem mba tshu tse Tshùaben la'te me là.

² Me lèn mo' mèn z'a be num Kristô là; a ndonni ngu'njù ntshob kuà gham, bo lo lo' i nèn yi tà num mbatte kamànyam tat, k'a na' mb'a ntùm wul i lo, me ke' lèn, Nsi bèn ndène.

³ Là me lèn ndù yen mèn nà, k'a na' mb'a ntùm wul i lo, k'a na' ke b'a ntùm wul i lo, me ke' lèn, nda' Nsi bèn ndène.

⁴ Bo lo lo' i nèn yi Paradis, a ju' ntshob mi mènntùn ke' lèn netshob là, ntshob mi bo ke' bam ndù mènntùn tshob là.

⁵ Me nsi ta' nsoṅ num yen mèn nà, là me ke nsi ta' nsoṅ à num tu wul àm, k'a ke nda' num yàm nebole.

⁶ A lo mbe ndù me kô neta' nsoṅe, mba me ke b'a mbabune, nummbe mba me nsi tshob à nenùne; là me ghom wul àm, mbwôg ndù kà sàm mèn yen àm ntshùa mba wul àm ke ntshob màm no be là.

⁷ Là neghù ndù kà me ko'te wut num ju ndùb ze Nsi la'te me là, bo lo so njô ntùm mbàb wul àm, Angél Satan, ndù a ke ntsham àm, ndù kà me ko'te wut.

⁸ Num ndùlala, me lo le'te Tshùaben yoṅ tat ndù a tshag i ngùanesà mbaṅ àm.

⁹ Là Tshùaben tshob me ndù: Kondèn àm ku' num o. Nummbe neta àm ke mbumt'a ntùm nebole. Me kô neta' nsoṅ num yàm nebole, ndù neta Kristô tswe num àm.

¹⁰ A ndùlala, me num ntsiaṅte ntùm ba lo', ntùm ba tshabte, ntùm nebwoṅe, ntùm netsho' nku kebàn, ntùm zwentù, num nu Kristô! Nummbe me ke nt'a ngelaṅ me bot là.

¹¹ Me lo nebà! Bin bèn ntènt'àm. A lo bwô ndù bin bèn nkwé nta màm, nummbe me lo ke b'a metsit mèn netèt mbwô ghantum, mba mba me ke' b'a sàm ju là.

¹² Ba lèn ko' ngantum lo tswite wut yub netèt bin ntùm njoṅ fènntù fa, ntùm ba nsà, ntùm ba nu netshàme, ntùm ba mfa' neta.

¹³ Ke ze me fà tsemo' ntse'te benkristô ntshùa zin à? Mb'a b'a nda' ndù me lo ke be lèt bin. Bin lagte yen nuketsin nà me.

¹⁴ Tshù, me tshwèt nabte nese' la' bin num mbatte yoṅ tat, là me ke nsi be lèt bin. Nummbe me ke ke ndiag à tshu tsine, là tu wut tsine. Nummbe bon ke bèn nke ntse'te tshu tà mba mà yub, là tà mba mà bèn nke ntse'te tshu bon tshobe.

¹⁵ Tu wul àm, me nsi fà ju z'a ku'ni là, me nsi fà mba tu wul àm num ywèt tsine. A be ze me kô zin ntshùate là, mba bin nsi kô àm à metsili ké?

¹⁶ A bwô, bo num ntshob ndù: Me lo ke be lèt bin, là mba me be zete mèn nà, me lo tshùa ntùm nkùnkù ngom zine.

¹⁷ Me lo tshùa num mo' mèn netèt tse me tum yub bin nà, mfùte zin ké?

¹⁸ Me lo le'te Titô, ntum i bo mo' mfèle. Titô lo fùte zin ké? Bag lo ke zin à be ntùm ywèt ntshù' mba num manze ntshù' ké?

¹⁹ Fe ndùke lo, bin num nkwate ndù bag ke nkwé à nta wut mage. Bag ke ntshob à mbwe Nsi, num Kristô. Fèt tshàm tse nkôni, njoṅ yen nà fa b'a num zin nekule.

²⁰ Nummbe me tshwèt mbwôg nese' la' bin, ke tèt zin mba me kô là; mbèn mbwôg nese' la' bin, bin yen àm mba bin ke' kô là, me tshwèt mbwôg ndù kà nediag ntsha, ghe'te, tshùagntù, ntsha, nebagte lén mèn, netsin tsham, ko'tewut, tshu'tu be netèt bin.

²¹ Me tshwèt mbwôg nese' la' bin, Nsi ghù tuswe ko àm num bin, me be ntùm ntsenyà num ben tse bo na' ngù nukebwô mba tse bo ke' kaṅ ntù yub num mfa' ṅu'u, nekale, mba yôg ngùa là.