2 Korintô 11 - NTSHOB NSI

¹ Kà be bin fènte metsit bà z'a fe me lo! Là bin num mfènt'àm.

² Nkôni ze me num nkô zin yi là b'a nkôni Nsi. Nummbe me lo yi' zin mba ngonngon nelàn nà ta' mandum ntshù', Kristô.

³ Ndaṅndaṅ mba nyu fùte Eva ntùm nkùnkù là, me tshwèt mbwôg ndù kà nkwatenu min bagte, nkù nkôni zin num Kristô.

⁴ Nummbe a be ze mba we lo se' ntshob mo' Yésu ke b'a ze bag na' ntshob bin nà, a be ze bin kwé mo' Ywèt ke b'a ze bin na' nkwé là, a be ze bin kwé mo' nkùn mebwô ke b'a ze bin na' nkwé là, mba bin a' fènte kua' mebwô.

⁵ Me kwate ndù ntùm njoṅ i fa, me ke' b'a metsit mèn netèt mbwô ghantum.

⁶ A be ze me b'a nkagni ntùm netshob mebwô là, mb'a ke b'a ndù me b'a nkagni ntùm nelène; me lo la'te yen nà njoṅ zin fa ntùm njoṅ manze fa.

⁷ Me lo ghù nukebwô mba me na' mfà wul àm nsi ndù bin bù' wut tsine, nsoṅ zin nkùn mebwô Nsi banban nà ké?

⁸ Me lo lo' tshu tsemo' ntse'te benkristô, mbam nkàbfa' num nefa' bin.

⁹ Ngelaṅ me na' nke ntswe la' bin mbwoṅ mba ju là, me lo ke be lèt sàm mèn; nummbe fètfèt tse bo fe Makédônia là lo zwiagte ju z'a tsi me là ntùm njoṅ i fa, me lo zete nebe lèt bin, me nsi bèn zete.

¹⁰ Nenùn Kristô num num àm, be mèn ke tshètte nta'nsoṅ màm ntùm ngô Akaya.

¹¹ Numke? Nummbe me ke' be kô zin ké? Nsi lène!

¹² Ju ze me tshwèt ngù là, me nsi bèn ghù, ndùlala ndù me keb dù' neyi'te ben tse bo num nkô dù' neyi'te, ndù bo be mba bag ntùm nu ze bo num nta' nsoṅ bwe là.

¹³ Nummbe lèn tshen ben nà b'a ghantum tse tatte, ghafa' nkùnkù; bo num mfi'te ghantum Kristô.

¹⁴ A ke' b'a nu netshàme, nummbe mba Satan num ndo' wul i mba Angél nka' là.

¹⁵ A ke' b'a nu ndùb, a be ze ghafa' tse fi'te ghafa' nunetsin nà. Yub nemiagte nsi ku'ni num mfa' mube.

Nge' Paulo yen ntùm fa' se là

¹⁶ Me bèn ntshob mo' yoṅ i ndù kà mèn lo' àm mba mbabun nà; a be ze bin kô là, bin lo' àm mba mbabun nà; ndù mba me yàm ta' nsoṅe.

¹⁷ Mbe se' mba yen nu nta'nsoṅ ni là, ju ze me nsi tshob là, ke' fe à Tshùaben, là, a fe à bà.

¹⁸ Mba benntùn yàm tshwèt nta' nsoṅ à num ze mat mbàb wut là, mba me yàm a' ta' nsoṅe.

¹⁹ Bin num mfènte ba mbabun kua' mebwô, bin tse bin b'a ghazenu là.

²⁰ Bin num mfènte ndù bo lo' zin ngù ba kuan yi, ndù bo jù zine, ndù bo batte zine, ndù bo ko' num bin, ndù bo lab se zine;

²¹ a b'a nu tuswe me, mo' ndù bag na' mb'a ben nebole, me tshob à mba mbabun nà, ju ze bo ku'ni netshob là, mba me yàm ku'ni netshobe.

²² Bo b'a ba Héber ké? Mba me yàm! Bo b'a ba Israél ké? Mba me yàm! Bo b'a nzwit Abraham ké? Mba me yàm!

²³ Bo b'a ghafa' Kristô ké? Me tshob à mba mbabun nà, me tshùa yube! Me tshùa yub ntùm mfa' yàme, ntùm nshua' yàme, ntùm vù njoṅ ndù fa.

²⁴ Num yoṅ tàn, ba Yuda lo lab àm nshua' tsi ntshù' a be ṅam nkuà.

²⁵ Num yoṅ tat bo lo lab àm nshua' ngub; bo lo tamt'é ndoṅ yoṅ ntshù', num yoṅ tat ntse lo kel àm; me lo tsiag ntùm ntse ta' lé'njù ngù ta' tèttswe'.

²⁶ Me lo ke nzin yoṅ yàme, nke njen nge' mbu ba fimntshu; nke njen nge' mbu ba la' bag; nke njen nge' mbu ghakelèn Nsi; nke njen nge' ntùm ngô; nke njen nge' num kônkwa; nke njen nge' num dibantse; nke njen nge' netèt fètfèt tse tatte.

²⁷ Ntùm fa' neshu mba ngùtni, ntùm nezi tshùalo yàme; ntùm nziku' mba ntù nekù; ntùm netswe nziku' yàme; ntùm mfùag mba tunntôg;

²⁸ ntôg ndùlala, me ke' tùnte njoṅ i fa, fa' njoṅ lé'njù fa, nenywin num njoṅ ntse'te benkristô fa;

²⁹ we z'a bole, kà mba me ke bol à? We z'a vù, kà me ke kù à?

³⁰ A be z'a bwô neta' nsoṅ nà, mba m'a' ta' nsoṅ à num nebol àm.

³¹ Nsi mba Tshùaben be Yésu z'a be ngambotni yoṅ ntshù' là, lèn ndù me ke' netatte.

³² Ngomna mfen Arèta lo ghù bo nke mbéb ngô Damas num netshùb àm,

³³ là bo ma' àm ntùm bàmtshe', ntshag tôndà kàbngô, me tum ntùm mbu mube.