2 Korintô 1 - NTSHOB NSI

Tsha'te

¹ Me Paulo, ngantum Kristô Yésu njam ze nekô Nsi, mba Timôtio mfèt ben; bag kite yen ṅwa'ni li à ntse'te benkristô z'a be Korintô là, boa njoṅ ben nelàn fa tse bo be ntùm njoṅ ngô Akaya fa là.

² Kondèn mba fite z'a fe Nsi, Tà be mba Tshùaben Yésu Kristô là, be bin!

Nefite ntù Paulo ntùm nge'

³ Ghamte be Nsi mba Tshùaben be Yésu Kristô, Tà kondèn, Nsi fitentù;

⁴ yi z'a num mfite ntù tshag ntùm njoṅ nge' yag fa, ndùlala ndù bag tshùa njam fitentù ze tu wut yag kwé Nsi là, nku'ni nefite ntù ben tse bo be ntùm njoṅ nge' fa là.

⁵ Ndaṅndaṅ mba nge' Kristô be njàm bag ntshùate là, be ndaṅndaṅ nefite ntù tshag njam Kristô yàm ntshùate.

⁶ A be ze bag yen nge' là, mb'a b'a num zin nefitentù mba num yôg sine. A be ze bo fite ntù tshag là, mb'a b'a num zin nefitentù z'a tshwèt mfà fènntù nefènte nge' tse bin mba bag tshwèt njen nà.

⁷ Nenywinte ze bag ghù num bin nà taṅ nga, nummbe bag lèn ndù mba bin na' ngù zin bag i ntùm nge' là, be ndaṅndaṅ bin nsi ghù zin bag i ntùm nefitentù.

⁸ Fèt tshàm, mbe se' mba nge' z'a na' nse' bag Asia là, bag ke' kô nelem zin ndù a lo lèt yag kua' kebwô, ntôgte yag neta, kà bag ke bèn nenywinte yôg.

⁹ Mba kua' tu wut yag lo yen ntùm ntù tshag ndù bag tù' à ghavù, ndùlala ndù bag zi'te neyab ntù tshag à num Nsi z'a num mbam fe ben nà, ke b'a num tu wut yage.

¹⁰ A yi bèn nsô yag ntùm lèn sen vù là, a nsi bèn sô yag bwe; bag num nywinte ndù a nsi bèn sô yag bwe mo' yoṅ i,

¹¹ mba tu wut tsin nsi nywinte yag ntùm le'te Nsi, ndùlala ndù ju kondèn, ze benntùn yàm nsi bètte num tu bag là, be tu nu nele'te Nsi benntùn yàm num tu yage.

Ju z'a tshètte Paulo nenèn Korintô là

¹² Nta'nsoṅ mag b'a kwénta mi nzentù tshag num mfà bag, ndù bag tshwèt njôg ntùm njù ntùm nelàn mba nenùn Nsi, njôg mbe mbwe bin, ke b'a ntùm zenu mbàb wut, là ntùm kondèn Nsi là.

¹³ Bag ke' kite mo' ju ghua bin, k'a ke nda' ze bin siaṅe, mbèn ndèn nà; me kwate ndù bin nsi lèn kà miagte,

¹⁴ mba bin to'te nelèn yage, ndèn ndù bag b'a nta'nsoṅ min nà, be ndaṅndaṅ mba bin b'a nta'nsoṅ mage, ntùm lé'njù Tshùaben be Yésu.

¹⁵ Ntùm yen nenywinte là, me lo ke nkô nebwôgmbwe nse' la' bin, ndùlala ndù bin bèn nkwé kondèn;

¹⁶ ndù me lo la' bin nèn Makédônia; mbèn ndo Makédônia, mbèn njam la' bin, ndù bin te àm num manze Yudéa.

¹⁷ Yen nu là ze me kô là b'a fùag nu ké? Nkwatenu màm b'a nkwatenu mbàb wut, ndù ṅ, ṅ, mba nga nga, be num àm ké?

¹⁸ Mb'a b'a nenùn ndù Nsi b'a nkwénta là, ntshob mi bag tshob bin nà ke' b'a ṅ mba nga.

¹⁹ Nummbe Nsi Yésu Kristô, ze bag na' ntshob netèt bin, tu wul àm, Silvanô mba Timôtio là, lo ke b'a ṅ, nga, là, ṅ na' mbèn mbe num i.

²⁰ Nummbe ṅ njoṅ nka'ni Nsi fa b'a num i; amén ze bag à bin num ntshob num nkuni Nsi là b'a num i.

²¹ Mèn z'a ghù bag à bin taṅ nga num Kristô, mbèn njo' be nà b'a Nsi,

²² z'a te sitam i num be, mbèn njab tsho'tu Ywèt ntùm ntù be là.

²³ Mba me là, me lo' Nsi mba nkwénta là num yôg sàm ndù me na' nko à ndèn min kà ke se' Korintô.

²⁴ A ke b'a ndù bag ke ndiag à netô bamntù zine, là bag ke neywimte zin num tsiaṅte zin, nummbe bin tsin tù num bamntù.