1 Yohané 5 - NTSHOB NSI

Bamntù be tshùa njù

¹ Mba we lo z'a bam ndù Yésu b'a Kristô là, mba Nsi bèn mbwe i; mba we lo z'a kô Nsi là, kô mèn ze Nsi bwe i là.

² Bag à bin ke ndèn ndù be num nkô bon Nsi à ngelaṅ ze be kô Nsi, mbèn nke nze ntshù' mi là.

³ Nummbe nkôni Nsi b'a ndù be ze ntshù' mi, ntshù' mi ke' lèt,

⁴ nummbe mba ke lo ze Nsi bèn mbwe i là tshwèt ntshùa njù; tshù, ju z'a tshùa njù là b'a bamntù be.

⁵ Mèn z'a tshwèt ntshùa njù là b'a we? A ke b'a mèn z'a bam ndù Yésu b'a Mén Nsi là ké?

⁶ A b'a yi, Yésu Kristô z'a tshùa njam ntse mba lem, nse' là, ke b'a nda' ntùm ntse, là ntùm ntse mba ntùm lem. A b'a Ywèt ke nkwé nta, nummbe Ywèt b'a nenùne.

⁷ Ghakwénta b'a tat:

⁸ Ywèle, ntse mba lem, tshen ghakwénta tat là b'a ntshu ntshù'.

⁹ A be ze be bam kwénta benntùn nà, mba kwénta Nsi b'a ze ndùb ntshùate, nummbe kwénta Nsi b'a ndù a lo kwé nta Mén i.

¹⁰ Mèn z'a bam Mén Nsi là ghù yen kwénta là num i; mèn z'a ke' bam Nsi là lo' i ngù ngatatte yi, nummbe a ke' bam kwénta ze Nsi kwé num Mén i là.

¹¹ Yen kwénta là b'a ndù Nsi lo fà yôg matmat be, mba ndù sen yôg là b'a num Mén i.

¹² Mèn z'a ghù Mén nà ghù yôg; mèn z'a ke' ghù Mén nà ke' ghù yôg.

¹³ Me lo kite tshen tshu là bin, ndù bin lèn ndù bin ghù yôg matmat; me lo kit'a bin tse bin bam lén Mén Nsi là.

Le'te Nsi. Nsi b'a nenùne

¹⁴ Nenywinte ze be ghù num Nsi là b'a ndù: A be ze be bètt'é mba ke lo ntùm ze nekô là, mb'a' ju' be.

¹⁵ A be ze be lèn ndù a ju' be num tshu tse be bètte yi là, bag à bin lèn ndù be ghù tshu tse be bètte yi là.

¹⁶ A be ze mèn yen mfèl i ghù nukebwô z'a ke' b'a nukebwô vù là, a bètte Nsi, Nsi a' fà yôg yen mfèt là, mb'a be mfà ben tse bo ghù nukebwô z'a ke' b'a ze vù là. Nukebwô vù num bwe; me ke ntshob nele'te Nsi à num yen nukebwô là.

¹⁷ Njoṅ nuketsin fa b'a nukebwô; nukebwô z'a ke' b'a ze vù là num bwe.

¹⁸ Bag à bin lèn ndù mba we lo ze Nsi bèn mbwe i là ke' be ghù nukebwô, là mèn ze Nsi na' mbwe i là, be ndé' i, mèn kebwô ke kwag i.

¹⁹ Bag à bin lèn ndù be fe à Nsi, ndèn ndù njoṅ njù fa nô ntùm nukebwô.

²⁰ Là bag à bin lèn ndù Mén Nsi se'e, a fà zenu be ndù be lèn mèn nenùne; bag à bin b'a num mèn nenùne, num Mén i Yésu Kristô, a yi bèn mbe Nsi nenùne, mba yôg matmat.

²¹ Bontsit bon tshàm, bin béb wut tsin num ba nsi neto.