1 Yohané 3 - NTSHOB NSI

¹ Tshù, Tà fà nkôni ndùb be ndù bo tsiaṅ be bon Nsi, bag à bin b'a bon Nsi. A num ndùlala, njù ke' lèn be, nummbe a lo ke lèn i.

² Fèt tshàm tse nkôni, ndonni bag à bin b'a bon Nsi, bo ke' yoṅ nda'te ju ze be nsi be yi là. Bag à bin lèn ndù a nsi be ṅwage, be fut'é, nummbe bag à bin nsi yen i ndaṅndaṅ mb'a be là.

³ Mba we lo z'a ghù yen nenywinte là num i là lànte wul i, mba tu wul i Yésu b'a mèn nelàn nà.

⁴ Mba we lo z'a ghù nukebwô là fàn ntshù', nukebwô b'a nefàn ntshù'.

⁵ Bin lèn ndù yen mèn nà se' nekel à nukebwô, nukebwô ke num i.

⁶ Mba we lo z'a ghô num i là ke' be ghù nukebwô; mba we lo z'a ghù nukebwô là ke' yen i ke bèn ndèn i.

⁷ Bontsit bon tshàm, kà sàm mèn tatte zine. Mèn z'a be ngù nunetsin nà b'a mèn netsine; ndaṅndaṅ mba yen mèn nà be mèn netsin nà.

⁸ Mèn z'a be ngù nukebwô là fe à Satan, nummbe Satan be ngù nukebwô fe neto'te. A ndùlala Mén Nsi lo se' ndù a bagte mfa' Satan.

⁹ Mba we lo ze Nsi bèn mbwe i là ke' be ghù nukebwô, nummbe nzwit Nsi ghô num i; a ke' ku'ni neghù nukebwô, nummbe Nsi bèn mbwe i.

¹⁰ Yen nà be ngù bo lèn bon Nsi mba bon Satan. Mba we lo z'a ke' be ghù nunetsin nà ke' fe à Nsi, ke mèn z'a ke' be kô mfèl i là lo.

¹¹ Tshù, yen ni b'a tshô ze bin na' nju' fe neto'te là, ndù be ke nkôni be be.

¹² Kà bag à bin fute Kaïn z'a na' mfe à mèn kebwô, nzwi mfèl i là; a na' nzwi i à numke? Nummbe mfa' mi na' mb'a mi kebwô, mi mfèl i be mi netsine.

¹³ Fèt tshàm, kà bin tshàm, a be ze njù tshwèt mbàn zin nà.

¹⁴ Bag lèn ndù bag à bin lo dut num vù, ntsho ntùm yôg, nummbe be num nkô fètfèle. Mèn z'a ke' ghù nkôni là ghô ntùm vù.

¹⁵ Mba we lo z'a be mbàn mfèl i là b'a ngazwi mèn; bin lèn ndù sàm ngazwi mèn ke' ghù yôg matmat z'a ghô num i là.

¹⁶ Yen nà lo ghù bag à bin lèn nkôni, ndù yen mèn nà lo fà yôg se num tu be. A bwô ndù mba be fà yôg be num tu fètfèle.

¹⁷ A be ze mèn ghù tshu yen njù li, njen mfèl i ntùm bwoṅ, mfùn ntù i mbwe i là, mba nkôni Nsi nsi ghô num i à ndùke?

¹⁸ Bon tshàm, kà bag à bin ghù nkôni à ntùm ntshobe, mba num lém, là ntùm mfa' mba ntùm nenùne.

¹⁹ Yen nà nsi ghù be lèn ndù be fe à nunenùne, mba ndù be nsi fite ntù be mbwe i.

²⁰ Nummbe a be ze ntù be naṅ ntsha num be là, mba Nsi b'a mèn ndùb ntshùa be, a lèn njoṅ i fa.

²¹ Fèt tshàm tse nkôni, a be ze ntù be ke' naṅ ntsha num be là, mba bag à bin ghù fènntù mbwe Nsi,

²² mba ke lo ze be bètte yi là, mba be nsi kwé yi; nummbe bag à bin num nze ntshù' mi, nke ngù tshu ts'a bwô i là.

²³ Yen ni b'a ntshù' mi ndù bag à bin bam lén Mén i Yésu Kristô, mba ndù be ke nkôni be be, ndaṅndaṅ mb'a be ntùm ntshù' mi a fà be là,

²⁴ mèn z'a be nze ntshù' mi là ghô num Nsi, Nsi ghô num i. Ju z'a be ngù be lèn ndù a ghô num be là b'a Ywèt ts'a fà be là.