1 Yohané 2 - NTSHOB NSI

¹ Bontsit bon tshàm, me kite tshen tshu li bin à ndù kà bin ghù nukebwô. A be ze mèn na' ngù nukebwô là, mba bag à bin ghù ngakabte be Yésu Kristô, mèn netsine, mbwe Tà.

² A b'a mèn ze Nsi tshùa num i, nko ndèn be num nukebwô là, ke b'a nda' nukebwô be, là, mba tse njoṅ njù fa.

³ A be ze bag à bin ze ntshù' mi là, mba bag à bin lèn ndù be lo lèn i.

⁴ Mèn z'a tshob ndù: Me lo lèn i, ke ke nze ntshù' mi là, b'a ngatatte, nunenùn ke be num i.

⁵ Là mèn z'a lé' ntshob mi là, kua' nenùne, mba nkôni Nsi bwô miagte num i.

⁶ Mèn z'a tshob ndù a ghô num i là, mb'a bwô ndù ng'é zin ndaṅndaṅ mb'a na' nzin nà.

Nkôni fètfèle

⁷ Fèt tshàm tse nkôni, ntshù' mi me kite bin nà ke b'a ntshù' nswe, là, a b'a njwèn ntshù' mi bin na' ngù fe neto'te là. Yen njwèn ntshù' là b'a ntshob mi bin na' nju' là.

⁸ Mba ndùlala, me kit'a ntshù' nswe bin; yen nà b'a nenùn num i mba num bin, nummbe njam tshwèt ntôge, kua' nka' ze nenùn nke nké'é.

⁹ Mèn z'a tshob ndù a b'a ntùm nka', là, nke mbàn mfèl i là, mb'a ke' à ntùm njame.

¹⁰ Mèn z'a num nkô mfèl i là ghô ntùm nka', sàm ju nefa'te ke num i.

¹¹ Là mèn z'a num mbàn mfèl i là mb'a b'a ntùm njame, nke nzin ntùm njame, ke lèn dù' z'a tshwèt nèn nà, nummbe njam kag fù miag i.

Nkôni njù mba nkôni Nsi

¹² Bontsit bon tshàm, me kite bin à nummbe Nsi lagte nukebwô tsin num lén se.

¹³ Ba tà, me kite bin à nummbe bin lo lèn mèn z'a be fe neto'te là. Nguanmèn me kite bin à nummbe bin lo tshùa mèn kebwô.

¹⁴ Bon tshàm, me lo kite bin à nummbe bin lo lèn Tà. Ba tà, me lo kite bin à nummbe bin lo lèn mèn z'a be fe neto'te là. Nguanmèn, me lo kite bin à nummbe bin ta, ntshob Nsi ghô num bin, mba ndù bin lo tshùa mèn kebwô.

¹⁵ Kà bin kô njù, ke kô tshu ts'a be ntùm njù là. A be ze mèn kô njù là, mba nkôni Tà ke' be num i.

¹⁶ Nummbe njoṅ tshu fa ts'a be ntùm njù là, ghe'te mbàb wut, ghe'te miag, ko'tewut ntùm yôg, ke fe à Tà, a fe à njù.

¹⁷ Njù num ntôge, mba ghe't'é. Là mèn z'a num ngù ze nekô Nsi là ghô yoṅ ntshù'.

Ghatswite tse tatte

¹⁸ Bontsit bon tshàm, tshù, yen ni b'a miagte nyam; bin lo ju' ndù ngakeban Kristô a' se'; ndonni ghakeban Kristô yàm num bwe, ndùlala, bag à bin lèn ndù yen ni b'a miagte nyam.

¹⁹ Bo tum à netèt be, là bo lo ke b'a tse be ben, nummbe bo na' mb'a tse be ben mba bo lo ghô bag à bin bo; là bo tum ndù be lèn ndù sàm mèn netèt bo ke b'a ze be mèn.

²⁰ Mbe se' mba bin nà, mèn nelàn lo yo' zine, njoṅ zin fa lène.

²¹ Me lo kite bin ke b'a ndù bin ke' lèn nunenùne, là nummbe bin lèn nunenùne, mba ndù sàm nu tatte ke' be fe à nunenùne.

²² Ngatatte b'a we? A ke b'a mèn z'a num nga ndù Yésu b'a Kristô là ké? Yen mèn ni b'a ngakeban Kristô. A num nga Tà mba Mén.

²³ Mba we lo z'a gha Mén nà ke' ghù Tà. Mèn z'a bam Mén nà ghù mba Tà.

²⁴ Mba bin nà, ju ze bin na' nju' fe neto'te là ghô num bin; a be ze ju bin na' nju' fe neto'te ghô num bin nà, mba mba bin nsi ghô num Mén mba num Tà.

²⁵ Nka'ni mi a na' nka' be là b'a yôg matmat.

²⁶ Me kite tshen tshu li bin à num ben tse bo tshwèt ntatte zin nà.

²⁷ Mbe se' mba bin nà, neyo' ze bin na' nkwé yi là ghô num bin, a ke' ywimte ndù mèn bèn ntswite zine; là mba neyo' i be ntswite zin njoṅ tshu fa là, neyo' i b'a nenùne, ke b'a tatte, bin ghô num i, mba neyo' i tswite zin nà.

²⁸ Bontsit bon tshàm, ndonni bin ghô num i ndù a be ṅwage, bag à bin ghù fènntù, mba ndù kà tuswe ko be mbwe i ngelaṅ z'a nsi se' là.

Bon Nsi

²⁹ A be ze bin lèn ndù a b'a mèn netsin nà, bin lèn ndù mba we lo z'a ghù nunetsin nà, mb'a bèn mbwe i.