1 Yohané 1 - NTSHOB NSI

Kwénta Yohané

¹ Ju z'a na' mbe fe neto'te, ju ze bag na' nju'u, ju ze bag na' njen miag mage, ju ze bag na' ndôte, mbu mag kwag i là, ntshob yôg,

² yôg lo tswite wul i, bag lo yen i, bag tshwèt nkwé nta mi, bag tshwèt nsoṅ zin yôg matmat s'a na' mbe mbaṅ Tà, yôg se bo na' ntswite bag là,

³ ju ze bag na' njen mbèn nju' là, bag tshwèt nsoṅ zine, ndù mba bin zin tamte num bag, là, yag netamte b'a bag à Tà mba Mén i Yésu Kristô.

⁴ Bag kite yen ni à ndù tsiaṅte be dune.

Bin zin ntùm nka'

⁵ Tshô ze bag na' nju' yi, ze bag tshwèt nsoṅ zin nà, b'a ndù Nsi b'a nka', njam ke' be num i.

⁶ A be ze bag à bin tshob ndù bag à bin bo tamte, là nke nzin ntùm njam nà, mba bag à bin tatte, ke ke ngù nunenùne,

⁷ Là, a be ze bag à bin zin ntùm nka', mba tu wul i be ntùm nka' là, mba bag à bin tamte be be, lem Yésu Mén i lànte be num njoṅ nukebwô fa.

⁸ A be ze bag à bin tshob ndù nukebwô ke num be là, mba bag à bin tatt'a tu wut be, mba nunenùn ke num be.

⁹ A be ze bag à bin bam nukebwô be là, mb'a b'a mèn nenùne, mba mèn netsine, mb'a nsi lagte nukebwô be, lànte be num njoṅ nuketsin fa.

¹⁰ A be ze bag à bin tshob ndù be ke' ghù nukebwô là, mba bag à bin lo' i ngù ngatatte yi, ntshob mi ke be num be.