1 Timôtio 6 - NTSHOB NSI

Num ba kuan

¹ Njoṅ ben fa tse bo ntùm kele' mba ba kuan nà, lo' tàfa' tshob mba ben tse bo ku'ni nekwé ghamte z'a dun nà, ndùlala ndù kà lén Nsi mba netswite vù ntùm tshabte.

² Kà kuan tse tàfa' tshob b'a benkristô là wag yub mba bo b'a fètfèt là; là, a bwô bo fa' bo ntshùate, mba bo b'a benkristô mba ghankôni, tse bo num nkagtùn num fa' mebwô là. Tswite tshen tshu là, ntagte benntùn ntùm bwe.

Ghatswite tse tatte

³ A be ze mèn tswite mo' ju ghua, ke nèn ntùm ntshob mebwô, ntshob Tshùaben be Yésu Kristô, mba ntùm netswite z'a be num mat neghamte Nsi là,

⁴ mb'a b'a mèn ze ko'tewut ma' fù miag i là, a ke' lèn sàm ju, a ghù ngokèt tantshu mba ntshob banban, dù' ze ghe'te, ntsha, tshabte, nkwate kebwô tum bwe là.

⁵ Tshen ni b'a ntsha ben tse zenu yub bagte là, bo ke' lèn nenùne, nke ndo' neghamte Nsi à mba ju bin nà.

Nkôni tshunkàb

⁶ Neghamte Nsi b'a kua' ju bin ndùb mèn z'a num ntswe tsiaṅte num ju z'a ghù là.

⁷ Nummbe be lo ke se' sàm ju ntùm njù, be ke' ku'ni nebèn ndo' sàm ju ntum yi ntùm njù.

⁸ Là, a be ze be ghù jujù mba nzwe là, mba yen nà ku' num be.

⁹ Ben tse bo kô netù' ghankàb là num ngwù ntùm laṅte, ntùm ywi' mba ntùm ghe'te yàme, ghe'te kagni.

¹⁰ Nummbe nga njoṅ nukebwô fa b'a nkôni nkàb ze tsemo' ben kô, nkag manze bamntù, nso mfaṅ ntùm ntù tshob là.

Ntag mi Paulo fà Timôtio là

¹¹ Là tu wul o, mèn Nsi, kù tshen tshu là! Diag nefènte, nefite.

¹² Le' mbwô ntsho bamntù; ghom yôg matmat se bo na' ntsiaṅ o num bwe, s'o na' ntshob mbwô kwénta num i mbwe ghakwénta yàm nà.

¹³ Me tshob wù mbwe Nsi z'a fà yôg njoṅ tshu fa là, mba mbwe Yésu Kristô z'a fà kwénta mebwô mbwe Pilato là,

¹⁴ ndù o ze men ntag li ntùm nelàne, ke lo', tà nkum lé'njù se Tshùaben be Yésu Kristô nsi tswite wul i là.

¹⁵ Ngambotni, nkwi mèn neta, mfen fenfen, Tshùaben ba tshùaben,

¹⁶ yi z'a ghù nebe ke kwù tù' i là, yi z'a be ntswe ntùm nka' ze be mèn ke ghebte mbaṅ bwe là, yi ze sàm mènntùn ke' to' yen i, ke ku'ni neyen i là, a yi nsi bèn la'te lé'njù Tshùaben num ko' ze ngelaṅ. Ghamte mba neta be yi ngu'ngu'. Amén.

Ntag num ghankàb

¹⁷ Tshob ghankàb tse yen njù li ndù kà bo ko'te nkwatenu mube, ke ke nywinte num nkàb z'a ku'ni nebi là, là, a bwô bo nywinte num Nsi z'a num mfà njoṅ i fa ntshùate, ndù be tsiaṅte là;

¹⁸ tshob bo ndù bo ghù numebwô, ntù' ghankàb ntùm mfa' mebwô, ndèn neghabte tshu boa tsemo' ntùm ntù mebwô,

¹⁹ ndùlala bo nsi tse'te nkàb mebwô num tu wut tshobe, ndùlala ndù bo ghom yôg nenùn ntùm njù z'a nsi se' là.

Miagte ntage

²⁰ O Timôtio, lem bu'u, tam tshô kebwô, tshô banban, ntsha zenu ze tatte mvèn o.

²¹ Tsemo' ben be ntam njam yen nu là, nkag manze bamntù. Kondèn be bin!