1 Timôtio 4 - NTSHOB NSI

Ghatswite tse tatte

¹ Ywèt tshob ndende ndù: A nsi be ngelaṅ mànjam, tsemo' ben gha bamntù, ndat num ba ywèt fùte mba num netswite ywètkebwô,

² njam nkùnkù ghatshob tatte tse bo ton ko' nzentù yub,

³ nke ntshètte nandà, nke ntshob ndù benntùn gha jujù, tshu tse Nsi nabte ndù ghabamntù mba ben tse bo lèn nenùn, ke njù ntùm nelabte Nsi là.

⁴ Nummbe njoṅ tshu fa tse Nsi nabte là bwô, sàm ju neghua' ke bwe, a be ze bo kwé njoṅ i fa ntùm nelabte,

⁵ ntshob Nsi mba le'te Nsi num ndànt'é.

Ntag num fa' Timôtio

⁶ A be z'o yab tshen tshu là mum miag fètfèt là, mb'o nsi b'a mbwô ngafa' Kristô Yésu, wù ze ntshob bamntù mba netswite mebwô z'o na' ntam njam i, kém o là.

⁷ Gha nkùt kebwô mba tshô ywèn bènnzwi; là fà wul o num neghamte Nsi,

⁸ nummbe nefà wut num sa ywimt'a metsili, là neghamte Nsi ywimte num njoṅ i fa, ngù nka'ni num yôg, se ndonni mba s'a nsi se' là.

⁹ Men ntshob li b'a nenùne, nku'ni ndù mèn bam i njoṅ ntù i fa.

¹⁰ A num ndùlala ze bag à bin num mfa'a, nke nde' ntsho, nummbe bag à bin tshwèt nywinte num Nsi z'a be ntùn, z'a b'a ngayôg njoṅ benntùn fa, njôg mbe tse bo bam nà.

¹¹ Tshobe, mbèn ntswite tshen tshu là!

¹² Kà sàm mèn wag ngu'njù nshum tsho, là tù' mfi' mbwe ghabamntù, ntùm ntshobe, ntùm zin so, ntùm nkôni, ntùm bamntù, ntùm yôg nelàne.

¹³ Fà wul o num nesiaṅ ṅwa'ni Nsi, num ntage, num netswite, tà nkum ngelaṅ me nsi se' là.

¹⁴ Kà wag ju kondèn z'a be num o là, ju z'o kwé njam ntshob ghatshob ntshob Nsi, ngelaṅ ghakwé mbwe yab mbu num o là.

¹⁵ Yab nkwatenu mo num tshen tshu là, fà njoṅ yu neta fa num bwe, ndùlala ndù njoṅ benntùn fa yen mb'o tshwèt nkagtùn num nenèn mbwe là.

¹⁶ Zete num tu wul o mba num yu netswite, nkagtùn num tshen tshu là; nummbe, a be z'o ghù ndùlala là, mb'o nsi yôg tu wul o mba ben tse bo ke nju' o là.