1 Timôtio 2 - NTSHOB NSI

Nele'te Nsi num njoṅ benntùn fa

¹ Ndùlala me bwôgmbwe ntshob yen ni mba mbwe nu là ndù a bwô nele'te Nsi, nde't'é, mbètt'é, ndabt'é num njoṅ benntùn fa,

² num fenfen, num ghatshagte, ndùlala ndù bag à bin tswe mebwô, ntswe fite, nke ngamte Nsi mb'a ku'ni là.

³ Yen nà bwô, a ju ze Nsi Ngayôg be kô là,

⁴ yi z'a kô ndù njoṅ benntùn fa yôge, ndèn nunenùn nà.

⁵ Nummbe Nsi b'a ntshù', ta' nganze be ntshù' netèt Nsi mba benntùn, yen mèn nà b'a Kristô Yésu,

⁶ z'a fà tu wul i ndo' ntshu' njoṅ benntùn fa yi là; yen ni b'a kwénta mi a tum num ngelaṅ i là.

⁷ A num ndùlala ze bo na' njab àm ngatshob ntshob Nsi mba ngantum ndù me be ngatswite ghakelèn Nsi, ntùm bamntù mba ntùm nenùn nà. Me ke' be tatte, me ke ntshob à nenùne.

⁸ Ndùlala me kô ndù bandum ntùm njoṅ ndù fa, be le'te Nsi mbù' mbu nelàn tù, ke ya ntù, ke kam ntsha.

Mb'a bwô ndù bènnzwi be là

⁹ Be ndaṅndaṅ, me kô ndù bènnzwi ket nzwe à mb'a ku'ni là, ke fà nu tuswe, bo nabte wut tshob à ntùm zenu, ke ba' tu yube, ke ket tshu gol, ke ntôgtse, ke nzwe tanjoṅ no,

¹⁰ là bo ket mfa' mebwô, tshu ts'a ku'ni num bènnzwi tse bo tshob ndù bo num ngamte Nsi là.

¹¹ A bwô ndù mènnzwi mi ntswe, nzi'te nu ntùm nefà wut nsi.

¹² Me ke' bam ndù mènnzwi tswite, ke bù' tu i nsi num mandum, là, a mi ntswe.

¹³ Nummbe Nsi na' mbwôg nabt'a Adam, mbatte Eva.

¹⁴ Bo lo ke tatt'a Adam, là mènnzwi ze bo tatt'é là lo vù ntùm mfànnu.

¹⁵ Là, a nsi tshùa njam nebwe bon, yôge, a be z'a ghô ntùm bamntù, ntùm nkôni mba ntùm nelàne, ngù zenu là.