1 Samuél 8 - NTSHOB NSI

Ba Israél bètte ta' mfen

¹ Ndùse Samuél ywèn nà, a yab nshum tse, bo be ghasa'kam ntùm ngô Israél.

² Lén tuswe i na' mb'a Yoél, se mbatte bàa be Abiya. Bo na' mb'a ghasa'kame, nke ntswe Ber-Shéba.

³ Là bo ke zin à num manze tà yub; bo sô wut tshob bwe, ndiag netù' ghankàb, nke nkwé ba nda', ntshùa ndùlala mfam nu ndaṅndaṅ.

⁴ Ndùlala njoṅ tse ghakwé mbwe ba Israél fa tamte nèn ntèt Samuél Rama,

⁵ ntshob yi ndù: Yen mb'o ywène, tsho nshum ke ke nzin tshob num tsho manze. Mb'a be ndùlala là, yab ta' mfen a ke ntô yag mb'a be ntùm tsemo' ngôngô là.

⁶ Nu mba bo bètte ta' mfen z'a ghù ntô yub là bag Samuél neshu k'a to' nele'te Tshùaben.

⁷ Tshùaben tshob ndù: Bam mba ke lo num ju ze ngô a' bètt'o yi là. Bo ke' ghua' a wù, a b'a me ze bo ke tshwèt mbèn nkô ndù me tô yub là.

⁸ Fe ndùse me sô yub Egipto là, bo lo tam àm mvèn yub, nke mfa' tsemo' nsi; ndonni bo tshwèt ngù ju ze bo na' nke ngù me là wù.

⁹ Ndùlala ju' ntshu yube; là bem yub kua' mebwô, nsoṅ yub mba mfen z'a nsi tô yub nsi lo' ma'ni yub yi là.

¹⁰ Samuél soṅ ngô ze bo bètt'é mfen nà njoṅ tshu fa tse Tshùaben na' ntshob yi là.

¹¹ Samuél tshob ndù: Tshù mba mfen zin nsi ghù num bin ni: A nsi lo' tsemo' nshum tsin ghù soyé yi, tsemo' be num nkalig ntsho mi, tsemo' be ghako' tse nyàm ntsho, tsemo' bèn mbe mbwe, mbèn nke nkam ntsho.

¹² A nsi lo' tsemo' ghù ghatô benntùn ntsha' mbùm yi, tsemo' ke ntô benntùn ṅam ntàn; tsemo' a' ke ndù' tsha' tse, tsemo' nke ntsho' tshu tse, tsemo' nke nabte tshu ntsho boa nkalig ntsho.

¹³ A nsi lo' ngonngon tsin ghù ghanabte labinda yi, tsemo' ke na tshaṅ se, tsemo' ke nton tag yi.

¹⁴ A nsi kwé tsin nà mebwô, nà ntù ndu' boa ntù ntshom min ke fà tàndà ntsho tse.

¹⁵ Bin nsi ghabte tshu miag miag tse bin ghù là nze gham fà ta' nze yi, ghù be ndaṅndaṅ num ndu'. A nsi ke fà tshen tshu là ghafa' tse boa tàndà ntsho tse.

¹⁶ A nsi lo' ghafa' tsin tse bandum boa tse bènnzwi, lo' mbwô mbwô nyàmna' tsin boa kekwèn tsin fa' mi mfa' yi.

¹⁷ A nsi ghabte bwoṅ nyàm tsin nze gham lo' bag ntshù'. Tu wut tsin a' be kuan tse.

¹⁸ Bin nsi kua' bu mfen ze tu wut zin na' mbèn ntsho' là. Yen ngelaṅ nà Tshùaben ke nsi bùnte sàm nu bin.

¹⁹ Ngô gha neju' ntshu Samuél ntshob ndù: Nga, bag kô ta' mfen.

²⁰ Bag kô nebe yag mba tsemo' ngôngô là. Yag mfen nsi ghù nu ndaṅndaṅ, a nsi ke be tu netèt bag, ke kwé mbwe tshwèt ntsho.

²¹ Samuél ju' ntshob fa mi ngô tshob là, nèn ntshob Tshùaben.

²² Tshùaben bùnte Samuél ndù: Ju' ntshu yube, fà ta' mfen bo. Ndùlala Samuél tshob ba Israél ndù mba we lo bèn njam ntùm se tusô.