1 Samuél 6 - NTSHOB NSI

Ba Filistia ba' Koṅ Nsi njam

¹ Koṅ Kàn Tshùaben tswe ntùm ngô Filistia maṅwù sammbàa.

² Tshen ba Filistia li tsiaṅ ghale'te boa ghangàm ntshob bo ndù: Be nsi ghù Koṅ Kàn Tshùaben à ndùke? Bin soṅ yag mba be nsi bèn ba' i num ze dù' là.

³ Bo bùnte ndù: A be ze bin ba' Koṅ Kàn Nsi Israél njam nà, bin ba' i njam à bo nda' mbaṅ bwe nelo' njunte nukebwô zin yi. A ke' bwô Koṅ bèn njam ke nda' njam bwe. A be ze bin yate là, mba bin nsi lèn ju z'a ghù kà bu i nke ndab num bin nà.

⁴ Bo bètte ndù: Bag fà à ke lèn nda' à? Bo bùnte bo ndù: Lo' gol nabte mfuni neloṅ yi tàn, ndo' gol nabte mfuni tshetku yi tàn, be kua' njoṅ ze fenfen be netèt ba Filistia là, nummbe nge' ts'a na' ntsho zin nà, be lèn tshen nge' là na' mbèn ntsho yube, mba tu wut tsine.

⁵ Bin nabte ba mfuni neloṅ boa ba neto tshetku tse bo tshwèt nsate ngô là, mfà ghamte Nsi Israél; be mo' ndù a tsin nelo' bu i ndab zin yi, nsi zin mba ngô zine.

⁶ Numke bin nkô nekag sag ntù bin mba ba Egipto boa Faraon n'à? Ndùse Tshùaben la'te ngù' i num bo là, ba Egipto lo ke faṅ ba Israél nèn ké?

⁷ Bin nabte kalig nswe, ndo' mfô bàa tse bo tshwèt nyô bon, ke be ndù bo to' ket kele' là; bin taṅ ba mfô num kalige, ndo' bon tshob nèn yi ndà nyàm.

⁸ Bin lo' Koṅ Kàn Tshùaben nte num kalige; bin yab nda' tse bin fà Tshùaben nà mbaṅ Koṅ Kàn, bin yab nda' l'a ntùm metsit nkub. Tshen tshu là tse bin lo' gol nabte yi là b'a nebotte ntù Tshùaben yi num nukebwô. Yen nà mbe tôg bin faṅ Koṅ Kàn nèn.

⁹ Bin ke ndôte, a be z'a ko' nèn à num ze ndùnsi, nze Bét-Shemesh là, mb'a b'a Tshùaben bèn ndo' yen nge' ndùb là ntsho ngô yi; ntag ndùlala mba be nsi lèn ndù a ke b'a bu i bèn ndab be. Mba be a' lèn ndù nu nekoṅ be.

¹⁰ Tshen ben nà ghù ndùlala. Bo lo' mfô bàa tse bo ke nyô bon nà, ntaṅ yub num kalige, ndo' bon tshob nèn ma' ndà.

¹¹ Bo yab Koṅ Kàn Tshùaben num kalige, boa tshetku tse bo lo' gol nabte yi là mba neto neloṅ gol ndù bo yab ntùm metsit nkub.

¹² Ba mfô lo ntshùb nze Bét-Shemesh ndaṅndaṅ; ba mfô tshùb nze nke nkua' nène, ke kag nze nèn bu zwim ke bu kwéb lo. Fenfen ba Filistia yab njam bo tà nkum ndùnsi Bét-Shemesh.

¹³ A lo be be ba Bét-Shemesh nke nkeb nsa tômbo'o; bo bù' miag mub njen Koṅ Kàn nke nse'e, bo be yen i ntsiaṅte.

¹⁴ Kalig kum ntùm nà Yoshua ze Bét-Shemesh ntsin bwe. Mo' loṅ ndùb lo be bwe. Bo bag ntshwèn kalig ndo' nton ba mfô yi Tshùaben num jule'te.

¹⁵ Ben Lévi swe' Koṅ Kàn Tshùaben nsi bo metsit nkub ze tshu gol be ntùm bwe là; bo te njoṅ i fa num loṅ ndùb là. Ba Bét-Shemesh ton ba nyàm sen lé'njù là boa tshule'te num lén Tshùaben.

¹⁶ Fenfen ba Filistia tàn be yen ndùlala ndo mbèn Ekron be sen lé'njù là.

¹⁷ Tshù tshu neloṅ gol tse ba Filistia na' mfà nda' yi Tshùaben num nukebwô li: Ta' i num Asdod, ta' i num Gaza, ta' i num Askalon, ta' i num Gat, ta' i num Ekron.

¹⁸ Mba ba tshetku gol be nsi num njoṅ ntusô ba Filistia fa mi a be mi fenfen tàn nà. A na' mb'a num ntusô mi bo kut ntsham ntsiag là mba mi ba kàbngô ke bwe là. Loṅ ndùb ke' ntùm nà Yoshua ze Bét-Shemesh tà nkum sènni; a bèn mbe nkwénta ju z'a na' ntôg là, nummbe bo na' nte Koṅ Kàn Tshùaben a num bwe.

¹⁹ Tshùaben zwi benntùn netèt ba Bét-Shemesh, ndùse bo lôte ntùm Koṅ Kàn Tshùaben nà. A zwi ben ṅam sammbàa netèt bon ngô. Ben ntsha' ṅam ntàn. Ngô na' mb'a ntùm ntobni nummbe Tshùaben lo lo' nge' ntsho i yi.

²⁰ Ndùlala ba Bét-Shemesh tshob ndù: We z'a ku' netsin mbwe Tshùaben, yen Nsi Nelàn ni à? Be ghù netum Koṅ Kàn à yà ntshag i ngùanesà mbaṅ be à?

²¹ Bo tshag ntum mbaṅ ba Kiriat-Jearim ntshob bo ndù: Ba Filistia lo' Koṅ Kàn Tshùaben nse' yi. A bwô bin swe' nse' nket nko' nèn yi la' bin.