1 Samuél 31 - NTSHOB NSIBa Filistia ton ba Israél ntsho; Saulo boa nshum tse tat kwù tshwèt ntsho; vù Saulo ( 1 Kron. 10.1-12 ) 1 Ba Filistia kam ba Israél ntsho; ba Israél kù ntsho mbwe ba Filistia, ngwùte num mbat Guilboa, nkwùte. 2 Ba Filistia yab njam Saulo, mba njam nshumnshum tse, nzwi Yonatan, Abinadab bo Malkishua, tse nshum Saulo. 3 Ndoṅ ntsho b'a num Saulo; ghama' nkét yen i, a be yen ghama' nkét mvètte, mbwôge. 4 Ndùlala Saulo tshob mèn z'a ke ntshùb tse tshu ntshùag là ndù: Tsho' bi nsob àm yi, mbwôg ndù kà ba kesiket là se' nsagt'àm ntshabt'àm. Mèn z'a ke ntshùb tshu ntshùag là ke bam, nummbe bwôg lo ghom i. Saulo te bi se nsi ngwù num bwe. 5 Mèn z'a ke ntshùb tshu ntshùag Saulo là be yen mb'a kwù là, nte se bi ze nsi ngwù bwe nkwù. 6 Tshù mba Saulo boa nshumnshum tse kwùte num sen lé'njù là ntu tshob tat, mèn z'a ke ntshùb tshu ntshùag tse mba njoṅ ben tse fa là. 7 Ba Israél tse bo be yen yoṅ tômbo' li mba yen yoṅ Yordan ni là be yen mba bon Israél tshwèt nkù bo mba Saulo boa nshumnshum tse kwù là, ngua' yub mub ntusô ntum nkù. Ndùlala ba Filistia se' ntete bwe. 8 Njù làn, ba Filistia nèn ta' mbàn fe ben, ntsho ntèt Saulo boa nshumnshum tse ndù bo vùte num mbat Guilboa. 9 Bo ket Saulo, ndo' tshu ntshùag tse. Yen nà be tôg bo tum yen nkùn mebwô là ntùm ngô ba Filistia, ntùm mba' neto tshobe, mba ntùm ngô. 10 Bo yab tshu ntshùag Saulo ntùm ndà Astarté tshobe, ntaṅ fe i num nkummba' Bét-Shan. 11 Njoṅ ba Yabès fa Galad ju' mba ba Filistia na' ngù num Saulo là, 12 ndùlala njoṅ neta nduku fa lo nsi, nzin tèttswe' fa, ndo' fe Saulo boa tse nshumnshum tse num nkum mba' Bét-Shan. Bo lo' fe tshob mbèn yi Yabès ntone. 13 Bo lo' mvôg mub ntshoṅ tun tamaris, ntswe nziku' lé'njù sammbàa, tun tamaris, ntswe nziku' lé'njù sammbàa. |
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
Bible Society of Cameroon