1 Samuél 30 - NTSHOB NSI

Bo lag ntsha' nton Tsiklag. David ton ba Amalék

¹ A lo be kum lé'njù tat David boa tse ben zin nkum Tsiklag. Ba Amalék lo tshùa mà ntèn, nkam Tsiklag ntsho, ndo' la', nton ngô fa.

² Bo ghom bènnzwi boa benntùn fa tse bo tèt ntùm ngô là ngù ghandàtsha yi, tse nke' boa tse ndùb. Nda' ndù bo ke zwi sàm mèn, bo lo' yub fa ntam nze nke nène.

³ David boa ben tse kum tusô, njen tusô ndù bo tone, ndo' zwi tshobe, nshum tshob boa ngonngon tshob nèn yi ndà kuan.

⁴ Ndùlala David boa ngô z'a be njam i là tshag nze yub tù nkua'a, nkua' kà neta bwoṅ bo nebèn nkua'a.

⁵ Bo lo lo' mba zwi David bàa nèn yi: Akinoam ze Yizréel bo Abigail ze Karmél, nzwi Nabal.

⁶ David b'a ntùm sobni ndùb, nummbe ngô lo ke ntshob mbe bo a' tamte David ndoṅ. Njoṅ yub fa lo b'a ntùm zwentù, mba we lo be ndùlal'a num nshum tse boa ngonngon tse. Là David tshùb fènntù, njé'te num Tshùaben Nsi i.

⁷ David tshob ngafà tshule'te, Abiatar nshum Akimélék ndù: Lo' Koṅ Kàn, nesà kum se bo num nket ngelaṅ fa' là nse' yi. Abiatar lo' nse' mfà David.

⁸ David bètte Tshùaben nu ntshob ndù: Me yab njam yen bwoṅ soyé là ké? M'a' kote yub ké? Tshùaben bùnte yi ndù: Yab njam bo, o nsi kote yube, kà tshu' ben tsho.

⁹ David tam nze boa ben tse ntu nkù ntôge. Bo kum fub Besor, ben tse bo be njam nà ghô bwe.

¹⁰ David nèn be mbwe boa ben ntu nkù kuà; ben ntu nkù bàa tsin, ndù bo bot neshu, nedut fub Besor.

¹¹ Bo tèt mo' ze Egipto tshwèt, ndo' i nèn yi mbaṅ David. Bo ghù a jù bàn nu ntse,

¹² mba kam makela' nkun bo tsha ntàm tù ndu' bàa tse bo yagte là. Ndùs'a jù là ywèt tse bèn mbèn yi, nummb'a lo ke jù ju fe num lé'njù tat, mbwôgtshù tat bo tèttswe' tat.

¹³ David tshob yi ndù: O b'a ze mèn we, mbe ze yà? A bùnte ndù: Me b'a ze Egipto, nke mfa' à mo' ze Amalék. A be ndonni à lé'njù tat mba tàfa' àm ghua' àm nà, nummbe me lo ke ngone.

¹⁴ Bag lo kam bag Kérét z'a ntèn nà ntsho; tshen tsha' là b'a ntùm tse Yuda, mbe num bag tsha' Kaléb ts'a be ntèn nà; bag lo ton Tsiklag.

¹⁵ David tshob yi ndù: B'o ghù me nèn mbaṅ tshen soyé là ké? A bùnte ndù: Nu ngu me num lén Nsi ndù o ke nsi zwi àm, ke fà àm mum mbu tàfa' àm, m'a' lo' o nèn yi mbaṅ tshen soyé là.

¹⁶ Ndùlal'a tshagt'é nze. Ba Amalék lo kab tshwèt, nke njù, nu, nke nyiaṅe, nummbe ntsha' yàm tse bo ket ntùm ngô Filistia bo ngô Yuda là.

¹⁷ David ma' yub ntsho neto' nkebnjù tà nèn nkum mfetnjù ndamnjù, sàm mèn, ke tum k'a ke nda' nguan mèn ben ntu nkù kuà tse bo ko' num kamél nkù nèn nà.

¹⁸ David bèn nkwé tshu fa tse ba Amalék lo' là, ntshu' mba zwi tse bàa.

¹⁹ David ke bi sàm mèn, ke mônke' ke ndùb lo, ke ménnshum ke ménngon no, ke bi sàm ju num ntsha', ke bi sàm ju num tshu tse bo lo' bo là. David bèn njoṅ i fa njam.

²⁰ David lo' njoṅ nyàm nke'nke' boa tse ndùbndùb fa. Ben bo ke mbéb tshen bwoṅ nyàm nà là be zin mbwe nke ntshob ndù: Tshù ntsha' David li.

²¹ David zin nkum mbaṅ ben ntu nkù bàa tse bo bot ke ku'ni neyab njam i là. Bo na' mfaṅ yub a fub Besor. Bo nèn mbumte boa David mba ngô z'a be njam i là. David ghebte num bo, mbètte yub mba bo lo' ntswe yi là.

²² Tsemo' ghatshùagntù ben kebwô tum netèt ben tse boa David na' nèn nà ntshob ndù: Mba bag à bo na' mbe ke bèn nèn nà, bag ke nsi fà sàm ju bo num ntsha' bag kwé là. Bo lo' nda' zwi tshob boa bon tshob mba we lo nèn ze nze.

²³ Là David tshob ndù: Fèt tshàm, kà bin ghù ndùlala, num ju ze Tshùaben bèn mfà be là; nummb'a lo lem be, mfà bwoṅ soyé tse bo se' num be là ntùm mbu be.

²⁴ Be we bam men ntshob là bin à? Ju ze mèn a nèn tshwèt ntsho nsi ghù là b'a njoṅ ze mèn a tù' mbaṅ tshu nsi ghù là. Bo nsi tamte njoṅ yub fa kà ghabte.

²⁵ A be ndùlala num sen lé'njù là boa tsemo' lé'njù. Yen nu là tù' b'a ta' ntshù', mbe ta' matnu ntùm ngô Israél.

²⁶ Ndùse bo bèn Tsiklag là, David tum mo' bag ntsha' ghakwé mbwe ba Yuda, shun tse, ntshob bo ndù: Tshù zin nda' z'a tum num ntsha' ghakeban Tshùaben ni.

²⁷ A tum tshu ben tse bo be Bétél, tse bo be Ramot mà ntèn nà, tse bo be Yattir,

²⁸ tse Aroer, tse Sifmot, tse Eshtemoa,

²⁹ tse Rakal, tse ntusô Kén,

³⁰ tse Horma, tse Kor-Asham, tse Atak,

³¹ tse Hébron boa njoṅ dù' fa tse boa ben tse fa zin bwe là.