1 Samuél 28 - NTSHOB NSI

Ntsho netèt Israél bo Filistia. David ntùm ntshu ntsho ba Filistia Saulo bètte mo' mènnzwi, ngaka nu En-Dor

¹ A lo be yen ngelaṅ nà, ba Filistia tse'te njoṅ tshob soyé fa, a tù' ntshu ntsho ntshù', num nema' Israél ntsho. Akish tshob David ndù: Tu wul o lèn ndù wù mba ben tsho, bag bin nsi nèn tshwèt ntsho.

² David bùnte ndù: Mb'a ku' là! Me b'a ngafa' o, mbe ndù o nsi yen mba me nsi ghù là. Ndùlala Akish tshob David ndù: Yen mb'o nsi bèn ke béb tu àm.

³ Samuél lo à kwù; ba Israél fa lo làn i, ntshoṅ i Rama, tusô se bo bwe i bwe là. Saulo lo sô njoṅ benntùn fa tse bo ke ntshobte boa fe ben boa tse bo ke ntshob nu ndamnjù là ntùm ngô.

⁴ Ba Filistia tse'te, nse' nte mbàn Sunem. Saulo tse'te ba Israél fa, bo te mbàn Guilboa.

⁵ Saulo be yen ze ntshu ntsho ba Filistia bwôg ghom i kua' neshu, mo' tonte fétwut mem ntù i ntùm bwe.

⁶ Saulo bètte Tshùaben nu, a ke bùnte yi, ke njam ba njem, ke njam Urim, ke njam ba ghatshob ntshob Nsi lo.

⁷ Saulo tshob ghafa' tse ndù: Bin diag ta' mènnzwi z'a be ntshobte boa fe ben nà, m'a' nèn mbètt'é nu. Ghafa' tse bùnte yi ndù: Mo' mènnzwi En-Dor ndù a num ntshobte boa fe ben.

⁸ Saulo bate mat kaṅ wul i nket tsemo' nzwe ghua nèn boa bandum bàa. Bo zin nkum la' mènnzwi tèttswe'. Saulo tshob yi ndù: Tshob nu ndamnjù me, ntshobte bin ta' fe mèn, ntsiaṅ ze me nsi bètte là me a se'e.

⁹ Mènnzwi là bùnte yi ndù: O lèn kua' mebwô ndù Saulo lo sô ben tse bo num ntshobte boa fe ben nà ntùm ngô, mba ghatshob nu ndamnjù. Numk'o nke mbùn àm ywi', ghom àm ghù me kwù à?

¹⁰ Saulo nu ngu yi num lén Tshùaben ntshob ndù: Tshùaben b'a ntùn, sàm kebwô ke nsi tsho o num yen nu là.

¹¹ Mènnzwi tshob ndù: We z'o kô ndù me ghù a ko' nse' à? A bùnte ndù: Ghù Samuél ko' nse'e.

¹² Ndùse mènnzwi là yen Samuél là, a bu' ngoṅ neta, ntshob Saulo ndù: Numk'o ntatt'àm à? O b'a mfen Saulo.

¹³ Mfen tshob yi ndù: Kà bwôg sàm ju; ke z'o yen à, soṅ àm. Mènnzwi là tshob Saulo ndù: Me yen mo' ywèt nke nko' ntùm tsha' mba ta' nsi là.

¹⁴ Saulo bètte mènnzwi là ndù: A ke lèn se z'a ghù à? A bùnte ndù: A ta' njwèn mèn bèn nke nko'o, ndù a ket ta' kummbaṅ. Saulo lèn ndù a b'a Samuél, ndùlala ngwù nsi kabkab num tsha'a.

¹⁵ Samuél tshob Saulo ndù: Numk'o ngùtni àm ngù me nko' à? Saulo bùnte ndù: Me b'a ntùm ntobni ze ndùb: Ba Filistia tshwèt ma' àm ntsho, mbe ndù Nsi sô wul i num àm; a ke' bùnte nu me, ke njam ba ghatshob ntshob Nsi, ke njam ba njem no. Me tsiaṅ o a ndù o se' nsoṅ àm ju z'a bwô me ghù là.

¹⁶ Samuél tshob ndù: O bètt'àm nu numke ndù o lèn mbe Tshùaben sô wul i num o ntù' yu ngakeban à?

¹⁷ Tshùaben ke ma'ni o à mba me na' nsoṅ o num ze tu là. A kwé fen bu o, mfà mo' mèn, mfà David.

¹⁸ O lo ke tshùb nze Tshùaben, ke la'te tonte yantù i num ba Amalék. Ndùlala bèn ngù kà Tshùaben nke ma't'o sènni ndùlala.

¹⁹ Tshùaben a' swèn Israél mba tu wul o ntùm mbu ba Filistia. Ndamnjù bag à bin nsi bèn be, wù mba tsho nshum. Yen ngelaṅ nà Tshùaben a' fà ntshu ntsho Israél mum mbu ba Filistia.

²⁰ Saulo yoṅ ntsho' ntam nsi ndùs'a ju' ntshob mi Samuél tshob là. Men ntshob là kag fétwut num Saulo. Neta bwoṅ Saulo nummb'a lo ke jù ju mbwôgtshù mba tèttswe'.

²¹ Mènnzwi là se' mbaṅ Saulo, njen i ntùm bwôg, ntshob yi ndù: Me ngafa' o ze mènnzwi lo ju' ntshu, nswèn tu àm, mfa' ju z'o na' ntshob me là.

²² Ndonni a bwô mba wù yu ju' ntshu ngafa' o ze mènnzwi. Bam ndù me fà metu' bàn ni o jù, ntshùbte ku o yi ndùs'o bèn njam nà.

²³ Saulo gha ntshob ndù: Me ke tshwèt njù ju. Ghafa' tse boa mènnzwi là nànt'é k'a bam mba bo tshob là. A lo num tsha' ntswe num kunndà.

²⁴ Mènnzwi là lo ghù fot mfô ndà i ndù a tshote, a nànte nzwi i; a lo' mbab ngefet na bàn ke te ywibte se yi.

²⁵ A te mbwe Saulo mba mbwe ghafa' tse, bo jù.