1 Samuél 26 - NTSHOB NSI

David ntùm mbàn Saulo. David bèn nkabte Saulo

¹ Tsemo' ba Zif nèn mbaṅ Saulo Guibéa ntshob yi ndù: David lem num kônga Hakila mbwe kônkwa.

² Saulo lo nsi nswe' nèn kônkwa Zif boa benntùn ntsha' tat tse bo tsho'te yub netèt bon Israél là, num nediag David num kônkwa.

³ Bo te mbàn yub kônga Hakila mbwe kônkwa, mbaṅ manze. David na' mb'a kônkwa; a be yen mba Saulo tshwèt njab njam i num kônkwa là,

⁴ ntum ba ntom bo nèn mbètte ndèn kua' nenùn ndù a se'e.

⁵ Ndùlala David lo nèn dù' ze Saulo te mbàn nà, njen dù' ze Saulo nô bwe bo Abner nshum Ner ze tàndà ntsho là. Saulo nô netèt mbàn, ngô be mbaṅ i ndiaṅ mbume.

⁶ David tshob Akimélék ze Hit bo Abishai nshum Tseruya mba mfèt Yoab ndù: We z'a kô ndù bag yi swe' nèn mbaṅ Saulo ntùm mbàn à? Abishai bùnte ndù: M'a' swe' nèn bag wù.

⁷ David bo Abishai nèn mbaṅ ngô tèttswe', ntèt ndù Saulo tshwèt nzi netèt mbàn ndù a sob kô se nsi tu kun i. Abner bo ngô nôte yub mbaṅ i.

⁸ Abishai tshob David ndù: Nsi swèn ngakeban o ntùm mbu mu sènni; me le't'o ndù o faṅ me tam i kô, ndo' nkwim i yi nsi yoṅ ntshù', ndù kà me zi mbèn nse' tshàm nsen ni.

⁹ Là David tshob Abishai ndù: Kà zwi i! Nummbe mèn ke bwe z'a b'a yab bu num mèn ze Tshùaben yo' i tà ke ket ndon nà.

¹⁰ David tshob ndù: Tshùaben b'a ntùn! A yi bèn nku'ni tù' i nelab i. Be mo' ndù se lé'njù ku' a kwù. Be mo' ndù a nèn tshwèt ntsho ntsho bwe ngô.

¹¹ Nga àm, a bwô ndù Tshùaben béb àm ndù kà me yab bu àm num mèn ze Tshùaben yo' i là! Lo' nda' kô s'a tu kun i là bo ntu' ntse be nèn tse be.

¹² David lo' kô bo ntu' ntse z'a be tu kun Saulo là, ndo nène; sàm mèn ke yen yube, ke yen sàm ju, sàm mèn ke bam num miaglo, nummbe njoṅ yub fa lo zi ngô ntùm miaglo mi Tshùaben ma' yub ntùm bwe là.

¹³ David tshùa mo' bag, ntsin tà ngùanesà num ntshùa mbale, mbàn na' ntènte bwe,

¹⁴ nkua' ntsiaṅ ngô, Abner nshum Ner ntshob ndù: O ke bùnte ké Abner? Abner bùnte ndù: Wù z'o tshwèt nkua' num ntoṅ mfen nà o b'a we?

¹⁵ David tshob Abner ndù: O ke b'a mandum ké? Nguan o b'a we Israél à? Numk'o ke béb tàfa' o mfen à? Me tshob à nummbe mèn tsho mbàn nezwi tàfa' o mfen.

¹⁶ Ju z'o ghù là ke' bwô ndùlala. Me lo' lén Tshùaben nu ngu yi ndù bin b'a ben tse be bo zwi yub là, nummbe bin ke' lôte tàfa' zin z'a b'a mèn ze Tshùaben yo' i là. Lôte njene, ndonni kô bo ntu' ntse ts'a lo mbe tu kun nà b'a yà?

¹⁷ Saulo lèn nze David ntshob ndù: A kua' nz'o ké nshum àm David? David bùnte ndù: A nz'àm me mfen mbe tshùaben àm!

¹⁸ A tshob ndù; Numke tshùaben nke njab njam ngafa' i ndù à? Ke ze me ghù à, a zit nu ze me fàn à?

¹⁹ A bwô ndù mfen, tshùaben àm bam neju' ntshob ngafa' i: A be ze Tshùaben bèn nke ntènt'o num àm nà, mb'a bwô ndù a bam labinda bwôntù li; là, a be z'a b'a benntùn bèn nke ntènt'o là, mb'a bwô ndù ndon tsho tu bo mbwe Tshùaben. Nummbe bo tshwèt nta' àm sènni num nesô àm num ntsi' Tshùaben, nke ntshob me ndù: Nèn mfa' tse nsi ba tum.

²⁰ Kà bam ndù lem tshàm fètte num tsha' ba tum, ngùanesà num miag Tshùaben! Nummbe mfen Israél yab njam ta' ntshèt nke ndiag i mb'a be bo diag ta' saṅ ngab num ba mbat là.

²¹ Saulo tshob ndù: Nshum àm David, se' li, a me be ngafàn nu; me ke nsi bèn ghù kebwô num o, nummb'o lo' yôg sàm sènni kua' mba ju là. Me lo ghù a mba nkagni là; me lo ghù kua' nukebwô ndùb.

²² David bùnte ndù: Tshù kô mfen ni. A bwô mo' yu ta' mèn se' nkwé.

²³ Tshùaben a' ba' mba zit mèn no à mb'a ko' ntù i là, mb'a yen mb'a tsin nà. Tshùaben lo nswèn o me sènni, nda' ndù me ke kô neyab mbu màm num mèn ze Tshùaben yo' i là.

²⁴ Ndaṅndaṅ mba yôg so lo nta njoṅ num miag màm sènni là, be ndaṅndaṅ yôg sàm nsi ta njoṅ num miag Tshùaben, a bèn ntshu' àm num njoṅ ntobni fa.

²⁵ Saulo tshob David ndù: Nshum àm David, a bwô Nsi tam ntse wù! Mba ke lo z'o nsi to'te là nsi vù lag. David nèn dù' z'a fe nèn nà, Saulo bèn njam la' i.