1 Samuél 25 - NTSHOB NSI

Samuél kwù. Nabal ke ghù kondèn num David, nzwi Abigail zete neshu

¹ Samuél kwù. Njoṅ ba Israél fa tse'te ndàn i. Bo tshoṅ i ntùm ze dù' Rama. Ndùlala David lo ntum nèn kônkwa Paran.

² Mo' mèn lo be Maon ndù a ghù tshu kua' yàme. A lo ghù tshu Karmél neshu; a lo ghù mbwe ntsha' tat, ngù mà mbwe ntsha' mbùm. A na' mb'a Karmél nke nkebte nyiaṅ mbwe tse.

³ Lén mèn nà na' mb'a Nabal, lén nzwi i be Abigail; a na' mb'a nkum mènnzwi, ndù a bwô num se i, là ndu i be ntutntut mèn, mbe ngatshùagntù ntùm ngùninu mi. A tum à netèt ben Kaléb.

⁴ David tswe kônkwa nju' mbe Nabal tshwèt nkebte nyiaṅ mbwe tse.

⁵ A tum bonnshum mbaṅ i gham ntshob bo ndù: Bin ko' nèn Karmél mbaṅ Nabal. Bin tsha't'é num yàm tu,

⁶ ntshob yi ndù: Fite be wù, mbe tunndà o, mba njoṅ tshu tsho fa!

⁷ Me ju' mbe bo tshwèt nkebte nyiaṅ njùmbwe la' o. Bag lo ke ghù sàm kebwô ghabéb mbwe tsho ndùse bo be mbaṅ bag là. Sàm ju lo ke bi bo njoṅ ngelaṅ fa bo tswe Karmél là.

⁸ Bètte ghafa' tsho mba bo a' tshob wù. A bwô ndù mba tshàm ghafa' fon fen mbwe o, nummbe bag kum nsen ni ntùm ta' lé'njù jùa. Netsho'o, fà ju z'o ghù bu o là ghafa' tsho mba nshum o David.

⁹ Ben David nèn ntswi yen nkùn nà Nabal num ze tu David. Bo tswe nke mbébe.

¹⁰ Là Nabal bùnte ntshob bo ndù: David b'a we? Yen nshum Isaï b'a we? Sènni kuan yàm tshwèt ntum la' tà tshob nkù.

¹¹ Be me ke lo' bàn àm, ntse màm boa mbàb tse me wat num ghakebte nyiaṅ njùmbwe tshàm nà nke mfà ben tse me ke' lèn mba dù' ze bo fe bwe là.

¹² Ben David bèn njam, ndùse bo kum nà, bo yoṅ nsoṅ David njoṅ nu fa.

¹³ Ndùlala, a tshob ben tse ndù: Mba zit mèn no lo' ze ṅwi! Mba zit mèn no ghù ndùlala, mba kua' David; bo lo njab njam i, nguan benntùn ntu kuà. Ben ntu nkù bàa tù' mbaṅ tshu.

¹⁴ Mo' ngafa' Nabal se' ntshob Abigail nzwi Nabal ndù: David tswe kônkwa ntum benntùn ndù bo se' ntsha'te tàfa' be, là, a tutte yube.

¹⁵ Yen mbe tshen ben nà lo ghù ntù mebwô num bag neshu. Bo lo ke ghù mo' sàm kebwô bag, ke kwé sàm ju bag num njoṅ ngelaṅ fa bag à bo be tshwèt là.

¹⁶ Bo lo ke nkabte yag mbwôgtshù bo tèttswe' num njoṅ ngelaṅ fa bag à bo be tshwèt nke mbéb nyàm nà.

¹⁷ A bwô ndù o lèn ndonni ndùlala ntù' bèn ndèn mb'o ghù là, nummbe tshù kebwô là z'a te nsi num tàfa' yag bo ze tunndà fa là. A be ntshùag neshu, ke ke mbam ndù bo tshob nu yi.

¹⁸ Abigail lo' bàn ntu' nkù bàa be kua' ndùse, ndo' ntu' ndu' bàa, ndo' nyàm gham tse bo nabte nka là, ndo' mbe' miag tshu tse bo ka là nkesoṅ ntàn, ndo' tsha ntàm tù ndu' tse bo yagte là nkù, ndo' makela' nkun nkù bàa, njab num ba nkekwène.

¹⁹ Abigail tshob ghafa' tse ndù: Bin tam mbwe, me se' njam bin nà. A ke soṅ ndu i Nabal sàm nu.

²⁰ Abigail ko' num kekwèn nèn mfe num mbale. A tshùa à num manze ndaṅndaṅ. A yoṅ mbe tshù njen David boa ben tse mbwe i bo nke nse'e.

²¹ David lo tshob ndù: Ndù me na' mbéb tshu tse mandum nà ghù kônkwa à banban ké? Sàm ju lo ke bi num tshu tse; a lo' kebwô njagte mebwô me yi.

²² A bwô ndù Nsi yab nge' num ngafa' i me David, a be ze dù' be foṅ ndamnjù ndù me ke' biagte mba ke lo z'a be ze Nabal là.

²³ Ndùse Abigail yen David là, a swe' num kekwèn ndende, ngwù nsi mbwe i num tsha'a.

²⁴ A vù num nku David ntshob ndù: Tshùaben àm, me bèn mbe ngafànnu, me ngafa' o ze mènnzwi, bam ndù me tshob nu wù, bèn nkù' ntoṅ nju'u.

²⁵ Kà tshùaben nekwimte yen Nabal là, nummb'a b'a ngatshùagntù. A b'a kua' mba lén se be yi là; lén se b'a Nabal, a b'a mbabune. Ngafa' o me lo ke yen tshàm ben ts'o tum yub là me tshùaben.

²⁶ Tshù là, me nu ngu num lén Nsi mba num tu wul o ndù Tshùaben lo mbe ke bèn ntshètt'o mb'o lo' bu o mfètte lem yi. A bwô ghakeban tsho b'a mba Nabal là, mba kua' ben tse bo kwa kebwô num tshùaben àm nà.

²⁷ A bwô tshùaben àm bam nda' ze ngafa' i me ze mènnzwi se' yi là, a bwô neghabte ben tse bo be njam o là.

²⁸ Netsho'o, lagte mfà ngafa' o me, num kebwô fa ze me ghù là, nummbe Tshùaben nsi ghù tunndà tshùaben taṅ nga, lagte me nummbe tshùaben ke nde' à tse ntsho Tshùaben, mbe ndù tshùagntù ke zi mbe tse ntùm ntù o.

²⁹ A be ze mèn ghù nkwate neyab njam o, nya' tu o là, mba Tshùaben Nsi o nsi lem o mbaṅ i, mfé' dù' z'a num ndé' ntù ben tse bwe là me tshùaben àm. Yen nà nsi be tôg a biagte ghakeban tsho, ma' yub ngùanesà mba bo num ma' loṅ num shùmte là.

³⁰ Ndùse Tshùaben nsi zwiagte nka'ni z'a ghù tshùaben àm, lo' o ghù mfen yi num Israél là,

³¹ mb'a ke' bwô ndù tshùaben àm ghù zwe ntù i ke ntobni lo mb'a lo fètte lem banban, ke ndù a lo yagte ze mba' ze tu lo, Me le'te tshùaben àm ndù a kwimte ngafa' i me ze mènnzwi ndùse Tshùaben nsi ghù mebwô yi là.

³² David tshob Abigail ndù: Ghamte be Tshùaben Nsi Israél z'a tum o mbwe àm sènni là!

³³ Me nyàmt'o num nkwat'o ze ntùn, nyàmt'o, wù z'o tshùb bu àm sen lé'njù li ndù kà me fètte lem nà.

³⁴ Là Tshùaben Nsi Israél z'a be ntùn nà tshèl àm neghù kebwô! O lo mbe ke nànte nse' mbwe àm mba sàm ju z'a b'a ze Nabal là ke nsi ke' ntùn tà tèt mfôgnjù.

³⁵ David kwé ju ze Abigail se' yi là bu i, ntshob yi ndù: Ko' mbèn ndà o ntùm fite. Yen mbe me ju' nz'o, ndo' o kua' mebwô neshu.

Vù Nabal

³⁶ Abigail kum mbaṅ Nabal. Ntèl i ndà i, a nke njù jùa bwe mba ta' mfen nà. Ndù tsiaṅte dun ntù i, a be ts'a ntùm ndu' koṅkoṅ. Abigail ke tshob sàm nu yi, ze nke' ke ze ndùb lo, tà nèn nkum mfôgnjù.

³⁷ Là njù làn, ndu' kebte se Nabal, nzwi i soṅ i nu z'a lo mbe nsi là. Ntù Nabal kwù ntùm bwe, nsaṅ ntù' mba loṅ nà.

³⁸ Nguan lé'njù gham lo be tôge, Tshùaben lab Nabal, a kwù.

³⁹ David be ju' mba Nabal kwù là ntshob ndù: Ghamte be Tshùaben z'a bùnte yàm nu num tshabte ze Nabal tshabt'àm yi là. A lo tshètte ngafa' i me neghù kebwô. Tshùaben ghù tshùagntù Nabal tsho a be kua' tu i. David tum bo nèn ntshob Abigail ndù a bam netù' nzwi i.

⁴⁰ Ghafa' David kum la' Abigail Karmél, ntshob yi ndù: David bèn ntum yag ndù bag se' ndo' o, o be nzwi i.

⁴¹ Abigail lo nsi, ngwù nsi kabkab ntshob ndù: Tshù me ngafa' o ze mènnzwi li, m'a' be ta' nkuan, nke nsôg nku ghafa' tshùaben àm.

⁴² Be ndùse Abigail ko' nèn boa bo num ta' kekwène. Ngonngon tàn nèn ntshag i. A tam njam ghantum David, ntù' nzwi David.

⁴³ David lo lo' mba Akinoam ze Yizréel, ntu tshob bàa fa be zwi tse.

⁴⁴ Saulo lo fà ngon i Mikal David Palti ze Gallim. A na' mb'a nshum Laish.