1 Samuél 24 - NTSHOB NSI

David ngabloṅ En-Guédi. David kabte Saulo

¹ David lo bwe nko' nèn num dù' ṅaṅa ts'a be En-Guédi là ntswe bwe.

² Ndùse Saulo ke mfe nele' ba Filistia ntsho là, bo tshob yi ndù: Tshù David là num kônkwa En-Guédi.

³ Saulo lo' ghama' ntsho ntsha' tat netèt ba Israél, nèn boa bo, ndiag David boa ben tse tà nèn nkum num ngondoṅ mfot mbwe tshwèt.

⁴ A kum num nkin mbwe mi a be mbaṅ manze là; mo' ngabloṅ lo be bwe, a tsho bwe num neghua' bu i. David boa ben tse na' mb'a ntùm ngabloṅ nà.

⁵ Ben David tshob yi ndù: Tshù lé'njù fen ni. Tshùaben tshob wù à mb'a yab ngakeban o num miag mo. A b'o ghù num i mb'a ko' ntù o là. David lo nsi, nkeb tôg kummbaṅ Saulo nda'nda', ke ghù a ju'.

⁶ Yen nà be tôg ntù David tam neshu mb'a ghù ndùlala; nkeb tôg kummbaṅ Saulo là.

⁷ A tshob ben tse ndù: A bwô Tshùaben béb àm ndù kà me ghù kebwô num tshùaben àm z'a be ndù Tshùaben bèn njo' i là. A ke' bwô ndù me yab bu àm num i, nummbe Tshùaben bèn njo' i ngù mfen yi,

⁸ David tshùa num men ntshob là ntshètte ben tse, ke bam bo tsho' ngwù num Saulo. Yen nà be tôg Saulo tum ngabloṅ ndo nke nèn tse.

⁹ David tù' ntum ngabloṅ njam Saulo: A to' ntsiaṅ kua' neta ntshob ndù: Mfen àm mbèn mbe tshùaben àm! Saulo kaṅ wul i ndôte, njen David ndù a vù nsi kabkab num tsha'a.

¹⁰ David tshob Saulo ndù: O tshwèt nju' ntshob benntùn, bo nke ntshob wù ndù: Tshù David là z'a tshwèt ndiag kebwô num o là.

¹¹ Tu wul o yen miag mu sènni mbe Tshùaben swèn o mum mbu màm ntùm ngabloṅ. Bo lo nke ntènt'àm mbe me zwi o; là me kabt'o ntshob ndù: Me ke yab bu num tshùaben àm; nummb'a b'a mèn ze Tshùaben yo' i là.

¹² Tshù njen tà, ndonni tshù tôg kummbaṅ so li bu àm. Mba me lo nkeb tôg kummbaṅ so ke zwi o là, yab tu o, ndèn ndù tshùagntù ke tatu lo ke ntùm nzin màm, mba ndù me ke' to' ghù kebwô wù. Mba wù là, o tshwèt mbùn àm njwi', nke nya' tu àm!

¹³ Tshùaben nsi be ngasa' kam netèl àm bag wù, Tshùaben a' yagte mba' wù; là me ke nsi zi yab tshàm bu num o.

¹⁴ Mo' njwèn tànkùt bwe nke ntshob ndù: Tshùagntù ke mfe à ghatshùagntù. A ndùlala me ke nsi zi yab tshàm bu num o.

¹⁵ Mfen Israél ke njab à njam we ndù à? O ke njab à njam ta' ntshèt ngwa.

¹⁶ Tshùaben nsi keb kam netèt be bag wù. A nsi lôte, tshètte yàm njam; a' ghù nu netsine, ntshu' àm bu o.

¹⁷ Ndùse David miagte netshob men ntshob li Saulo là, Saulo tshob ndù: A kua' nz'o ké nshum àm David? Saulo tshag nz'é tù ndàne.

¹⁸ A tshob David ndù: O b'a mèn netsin ntshùa àm. Nummb'o lo ghù mebwô me, me ghù kebwô wù.

¹⁹ O la'te bwôntù z'o ghù num àm nà sènni, nummbe Tshùaben swèn àm mum mbu mu, o ke zwi àm.

²⁰ Be mèn bumte bo ngakeban i mfaṅ i a nèn fite ndùlala ké? A bwô Tshùaben bèn mfà ntsho'fa' wù, num ju z'o ghù me sen lé'njù li là.

²¹ Ndonni me lèn ndù o nsi tô Israél, ndèn ndù nufen Israél nsi tsho bu o.

²² Nu ngu me num lén Tshùaben ndù o ke nsi biagte yàm nzwit ndùse me nsi tôg là, mba ndù o ke sô lén sàm ntùm tunndà tàa.

²³ David nu ngu Saulo num yen nu là. Saulo lo nèn ndà i, David boa ben tse bèn mbèn ndem tshobe.