1 Samuél 23 - NTSHOB NSI

Ba Filistia kam ba Keila ntsho, David tshu' yube. Saulo yab njam David

¹ David ju' mbe ba Filistia se' nkam tusô Keila ntsho, nke njé miag tshu ts'a be dù' netsham nsa là.

² David bètte Tshùaben nu ntshob ndù: Be me nèn nto' ba Filistia ntsho kà ntshùa ntsho ké? Tshùaben bùnte yi ndù: Nène, o nsi tshùa ba Filistia ntsho, tshu' Keila.

³ Là ben David tshob yi ndù: Yen mbe be ke ntswe a be bwôg mba Yuda li; be nèn Keila nde' ba Filistia ntsho mb'a' be ndùke?

⁴ David bèn mbètte Tshùaben nu. Tshùaben bùnte yi ndù: Lo nsi nswe' nèn Keila, nummbe m'a' swèn ba Filistia ntùm mbu mu.

⁵ David nèn boa tse ben Keila, ma' ba Filistia ntsho; bo zwite benntùn ba Filistia yàme, ndo' jujù yub fa. Tshù mba David tshu' ba Keila là.

⁶ Abiatar nshum Akimélék kù nèn mbaṅ Keila, ndù a tshùb kum nesag se bo num nket ngelaṅ fa' là bu i.

⁷ Bo tshob Saulo mbe David zin tà nkum Keila, a tshob ndù: A bwô ndù Nsi swèn i ntùm mbu màm, nummb'a se' nso wul i ntùm ta' tusô s'a ghù nzendà boa tshu nefà num bwe là.

⁸ Ndùlala Saulo tsiaṅ ze ntshu ntsho nèn yi Keila nekab mbu num i mba num David boa ben tse.

⁹ Ndùse David lèn kebwô ze Saulo ke ntàmte num i là, a tshob Abiatar ngafà tshule'te ndù: Lo' kum nesag se bo ke nket num ngelaṅ fa' là nse' mfà me.

¹⁰ David tshob ndù: Tshùaben Nsi Israél, ngafa' o ju' mbe Saulo tshwèt nkô nese' Keila nsate tusô num tu àm.

¹¹ Ba Keila nsi swèn àm num mbu mi ké? Saulo se' mba ngafa' o ju' là ké? Tshùaben Nsi Israél, la'te yen nu là ngafa' o! Tshùaben bùnte ndù: A nsi se'e.

¹² David bèn mbètte ndù: Ba Keila nsi swèn àm bag ben tshàm mum mbu Saulo ké? Tshùaben bùnte ndù: Bo nsi swèn o.

¹³ Ndùlala David lo nsi boa ben tse nguan ntu nkù ntôge; bo tum Keila nkù nèn dù' bo ku'ni nenèn nà. Saulo be ju' mbe David tum Keila nkù, ntsine, ke bèn nebwe i.

¹⁴ David tswe kônkwa, ntswe num mbale, kônkwa Zif. Saulo nke nke' ndiag David be nediage, là Nsi ke swèn i ntùm mbu mi.

David num kônkwa Zif bo Maon

¹⁵ David be yen mba Saulo tshwèt ndiag i, nke nya' tu i là, nkù ndem kônkwa ntùm fèn.

¹⁶ Yen ngelaṅ nà Yonatan nshum Saulo lo nsi nèn mbaṅ David ntùm fèn.

¹⁷ A bèn nso tànntù ntù i, nko'te bamntù i num Nsi, ntshob yi ndù: Kà bwôg sàm ju, nummbe bu tàa Saulo ke nsi kwag o. O nsi tô Israél. Yen ngelaṅ nà m'a' be mbatte mèn ntùm ngô, mbaṅ o; mba kua' tàa Saulo lèn yen nu là kua' mebwô.

¹⁸ Ntu tshob bàa wat kàn mbwe Tshùaben. David tswe ntùm fèn, Yonatan bèn njam la' i.

¹⁹ Tsemo' ba Zif ko' nèn mbaṅ Saulo Guibéa ntshob ndù: Tshù David li z'a lem netèt bag ntùm fèn nà. A b'a kônkwa Hakila, z'a be bag kônkwa z'a shù ntèn nà.

²⁰ Ndùlala, a bwô mfen swe'e, nummb'a ju z'a tshwèt ntoṅ o ntù o là. Tu wut tshag nsi swèn i mum mbu mfen.

²¹ Saulo bùnte ndù: A bwô Tshùaben naṅ mbotni num bin, mba bin ko ndèn màm nà!

²² Netsho'o, bin nèn mbèn mbètte ndèn kua' dù' z'a tsho bwe là, njen mèn z'a yen i bwe là, nummbe me ju' mb'a be nzete kua' neshu.

²³ Bin tsha'a, ndèn dù' ts'a be ndem bwe là, mbèn nse' njen àm bin à tshô ntùn, yen ngelaṅ nà bag bin nsi nène. A be z'a b'a ntùm ngô là mba m'a' diag i netèt bwoṅ ba Yuda fa tse bo yàm neshu là.

²⁴ Ndùlala bo lo mbwôg nèn Saulo Zif. David boa ben tse na' mb'a kônkwa Maon, tômbo' kônkwa z'a shù nze ntèn nà.

²⁵ Saulo nèn boa ben tse num nediag David. Bo te bu num David, a swe' num gholoṅ ntswe kônkwa Maon. Saulo ju' njab njam David kônkwa Maon.

²⁶ Saulo be zin mo' njam mbat David nke nzin mo' njam mbat boa ben tse. David kù kua' ndende num netum ntshu Saulo. Là, a lo be be ndù Saulo boa ben tse lam David boa ben tse mbume,

²⁷ là mo' ntum ṅwag ntshob Saulo ndù: Tsine, kà nenèn mbwe, nummbe ba Filistia tsho la' nkab mbu mum ngô.

²⁸ Saulo tsin, ke nebwe David, mbèn njam num nele' ba Filistia ntsho. Ndùlala bèn ngù kà bo tsiaṅ yen dù' là ndù Séla-Hammaklekot.