1 Samuél 22 - NTSHOB NSI

¹ David lo nsen nà, nkù nèn ndem ntùm ngabloṅ z'a Adullam nà. Fèt tse ju' mba njoṅ tunndà tàab fa, nswe' nèn mbaṅ i.

² Njoṅ tse bo ke njen nge' là, tse bo ghù njo tu bo là, tse ntù yub na' mbe ke ke ntshùa là so wut num i, a tù' yub mfen. Bo tamte mbe mbaṅ i nguan benntùn nkù kuà.

³ David lo nsen nà nèn Mitspa z'a be Moab là. A tshob mfen Moab ndù: Netsho'o, bam ndù tàa bo màa tswe la' o tà nkum ndùse Nsi a' soṅ mba me ghù là.

⁴ A lo' yub nèn yi mbwe mfen Moab, boa bo tswe num njoṅ ngelaṅ fa ze David tswe ntùm ngabloṅ nke ndem nà.

⁵ Ngatshob ntshob Nsi Gat tshob David ndù: Kà netswe ngabloṅ, tum nèn ngô Yuda. David tum nène, nzin nkum ntùm fèn Héret.

⁶ Saulo na' mb'a Guibéa, ndù a tsin tun tù tamaris num kônga bo kô se bu i. Njoṅ ghafa' tse fa lo diaṅ i mbume. Saulo lo ju' nu num David mba num ben tse.

⁷ Saulo tshob ghafa' tse tse bo tsinte mbaṅ i là ndù: Ben Benjamin bin ju'u! David nshum Isaï nsi fà nà boa nà ntù ndu' bin ké? A nsi lo' njoṅ zin fa ghù ghatô ben ntsha' mbùm boa ghatô ben nkù yi ké?

⁸ Kà bin ze ntsham àm ndù à numke? Ndù sàm mèn ke bwe ze b'a soṅ kàn se nshum àm bo David nshum Isaï wat là ké? Numke yàm nu ke ke ntoṅ sàm mèn netèt bin à? Mba ng'é yà te bu num àm mbe nshum àm shu'te ngafa' àm David ndù a lo nsi num àm, mbùn àm njwi' mb'a tshwèt ngù sènni là.

⁹ Doég ze Edom, z'a be netèt ghafa' Saulo là bùnte ndù: Me lo yen nshum Isaï se' Nob mbaṅ Akimélék nshum Akitub.

¹⁰ Akimélék lo bètte Tshùaben nu, mfà ba jujù yi, mfà mba ṅwi Goliat ze Filistia yi.

¹¹ Mfen tum bo nèn ntsiaṅ Akimélék nshum Akitub. A na' mb'a ngafà tshule'te. Bo tsiaṅ i bo njoṅ tunndà tàab fa, njoṅ ghafà tshule'te fa tse bo be Nob là. Njoṅ yub fa nèn mbaṅ mfen.

¹² Saulo tshob ndù: Nshum Akitub, ju' a bwô! A bùnte ntshob ndù: Tshù me li me tshùaben àm! Saulo tshob yi ndù:

¹³ Saulo bètt'é ndù: Numke bin nshum Isaï ndo nsi num àm ndù à? O fà bàn yi bo ṅwi, mbètte Nsi nu num ze tu, ndùlala ndù a ta tu mbwe àm, mbùn àm njwi' mb'a tshwèt ngù sènni là.

¹⁴ Akimélék bùnte mfen ndù: Be bo lo' zit mèn netèt ghafa' tsho fa a fute David ntùm nenùn à? A b'a ntse mfen, nke nju' ntshob mi kua' mebwô; dù' i b'a ze neghamte ntùm ndà o.

¹⁵ A b'a sènni ze me to' nebètte Nsi nu num ze tu là ké? Nga àm tshàm! A ke' bwô ndù o mi nte nu num ngafa' o me, ke num mo' mèn ntùm tunndà tàa lo, nummbe ngafa' o me ke' lèn tu àm num tshen tshu là, ke ze nke' ke ze ndùb lo.

¹⁶ Mfen tshob ndù: Akimélék o a' kwù bin tunndà tàan fa.

¹⁷ Mfen tshob ghakù nde tse bo tsinte mbaṅ i là ndù: Bin kaṅ wut zin nzwite ghafà tshule'te Tshùaben fa; nummbe boa David b'a ntshu ntshù'. Bo lo yen mb'a ke nkù là, là ke te bu num àm. Là ghafa' mfen ke kô nekù'te njab bu num ghafà tshule'te Tshùaben nzwi yube.

¹⁸ Ndùlala mfen tshob Doég ndù: Kaṅ wul o nzwi ghafà tshule'te. Doég ze Edom bèn nkaṅ wul i nzwi ghafà tshule'te; a zwite yub sen lé'njù là ben ntshob tàn ṅam fome, ben tse bo num nket kum nesag se bo num nket ngelaṅ fa', ndù bo lo' nzwe mebwô ntam yi là.

¹⁹ Saulo bèn ndo' ṅwi mbiagte tshé' benntùn yi Nob, tusô ghafà tshule'te. A zwite bandum, bènnzwi, bônke', bonfi, nyàmna', kekwèn, boa mbwe, a zwite yub fa.

²⁰ Mo' nshum Akimélék, nshum Akitub, lem tà bo ke zwi i. Lén se b'a Abiatar. A kù nèn mbaṅ David,

²¹ nsoṅ i ndù Saulo zwi ghafà tshule'te Tshùaben.

²² David tshob Abiatar ndù: Me lo kwate sen lé'njù là ndù mba Doég ze Edom be nsi là, a ke tag kà ke soṅ Saulo njoṅ nu fa. Bo zwi njoṅ tshen ben nà fa tunndà tàan à num tu àm.

²³ Bag wù tswe, kà bwôg. Saulo tshwèt ndiag nezwi o mba me. Là be tswe mba sàm nu ke nsi tume.