1 Samuél 21 - NTSHOB NSI

¹ David lo nène, Yonatan lo mbèn njam tusô.

Ba Gabanit boa ze nzwit Saulo

² David nèn Nob, mbaṅ Akimélék ngafà tshule'te. Akimélék bwôg, nkù nde nse' mbwe David ntshob ndù: Numk'o mbe tù' wù à? Sàm mèn ke njam o ké?

³ David bùnte ntshob Akimélék ngafà tshule'te ndù: Mfen fà ntum me, ntshob ndù: A ke' bwô sàm mèn lèn nu ze me tum o num bwe là. Bag à ben tshàm ghù nka'ni ta' dù'.

⁴ Ke z'o ghù bu o ndonni à? Fà ntu' bàn me ntàn, ke njoṅ z'o ghù lo.

⁵ Ngafà tshule'te bùnte David ndù: Me ke' ghù bàn banban bu àm, là nda' bàn nelàn bèn mbe nsi; nda' ndù a be ze ben tsho ke' zi boa bènnzwi là!

⁶ David bùnte ngafà tshule'te ndù: Bag ke' zi bag à bènnzwi fe lé'njù tat tse bag lo là; njoṅ ben tshàm fa b'a nelàne; mbèn mbe, a be ze nu bag tum ndà num bwe b'a ze banban nà, mb'a nsi be tse nelàn sènni ze bag tum ndà à num ta' ntum nswe là.

⁷ Ndùlala ngafà tshule'te fà bàn nelàn David, nummbe mo' bàn lo ke be nsi k'a ke b'a tshen nà tse bo lo' mbwe Tshùaben, kà njab tse nedum bwe ndo' mbate yub yi là.

⁸ Be num sen lé'njù là, mo' mèn netèt ghafa' Saulo lo be nsi, ndù bo fùn i mbwe Tshùaben. A na' mb'a ze Edom, lén se Doég, mbe mfen netèt ghabéb mbwe Saulo.

⁹ David tshob Akimélék ndù: O ke' ghù ta' kô ke ta' ṅwi lo bu o ké? Mba mfen lo mbe tum àm nke nànt'àm nà, me ke' lo ndo' ṅwi àm ke tshu ntsho tshàm no.

¹⁰ Ngafà tshule'te bùnte ndù: Tshù ṅwi Goliat ze Filistia z'o na' nzwi i tômbo' térébintô li; a num njam kum nesag se bo ke nkel à ngelaṅ fa' là, ndù bo lo' nzwe ndam i yi. A be z'o kô nelo' là, o lo' nummbe mo' ke tse nsi. David tshob ndù: Lèn yen ṅwi là ke bwe, fà me.

¹¹ David lo nsi be sen lé'njù là, nèn ngùanesà num miag Saulo. A zin nkum la' Akish mfen Gat.

¹² Ghafa' Akish tshob yi ndù: A ke David mfen ngô li ké? A yi ze bo ke njob nkwi num i nke nyiaṅ ntshob ndù: Saulo lo zwi ben ntsha' mbùm, David zwi ben ntsha' gham nà.

¹³ David yab men ntshob là ntù i, mo' bwôg ndùb ghom i num Akish mfen Gat.

¹⁴ A lo' wul i nkaṅ mbabun yi mbwe bo; ngù ntshag ntshag nu num miag mube. A nke ntsham ba nzendà, nendù nke ntum ntshu i ntsho ntùm nyiaṅ ntshu tse.

¹⁵ Akish tshob ghafa' tse ndù: Bin yen mbe zenu mandum ni ke bwe. Bin se' yi mbwe àm à numke?

¹⁶ Me bwoṅ ba mbabun ké? Bin se' yi mbwe àm me tù' nkwénta ntshag ntshag nu yen mèn ni a numke? B'a ke te ku me ntùm ndà.