1 Samuél 20 - NTSHOB NSI

Yonatan soṅ David mba Saulo tshwèt nya' i là. Tshen shun bàa li fagte: Mèn lé'te mèn

¹ David lo Najot z'a be mbaṅ Rama là. A nèn ntèt Yonatan ntshob yi ndù: Ke ze me ghù à? Yàm nukebwô b'a zil à? Tàan ke nkwé a kua' ke me kà nke ndiag be tu àm à?

² Yonatan bùnte ndù: Nga, ke b'a ndùlala, b'o ke kwù. Tàa ke' be ghù sàm ju kà ntag ke soṅ àm. Ndù a' lem àm à yen nu li ké? Nga, ke b'a ndùlala.

³ Là David saṅlaṅ num bwe, ntshob ndù: Tàan lèn ndù nu tshàm num mbwô o. Mo' ndù a tshob ntù i ndù: A ke' bwô Yonatan lèn yen nu li, nummbe mba nu ts'a' toṅ i neshu. Me nu ngu wù num lén Tshùaben bo so lén ndù me tù' à mèn vùkob.

⁴ Yonatan tshob David ndù: M'a' ghù mba ke lo z'o bètte là wù.

⁵ David bùnte yi ndù: Yen mbe ndamnjù b'a jùa ntshùa ṅwù, mbe ndù a lo mbwô bag mfen tswe téblé njù jujù; faṅ me nèn ndem ntùm tshwèt tà nèn nkum mfetnjù mbatte lé'njù tat.

⁶ A be ze tàan yen ndù me ke nsi là, mb'o nsi tshob yi ndù: David lo nde't'àm ndù me faṅ a kù nde nèn Bétléhém, se tusô, nummbe ta' jule'te tamngu', ze njoṅ tunndà fa num bwe.

⁷ A be z'a tshob ndù a bwô là, mba ngafa' o me ke nsi bèn bwôg sàm ju; a be z'a ya ntù là, o lèn ndù a kwate nukebwô.

⁸ Ndonni, a bwô o la'te nkôni ngafa' o, nummbe bin ngafa' o wat ta' kàn mbwe Tshùaben. A be z'o yen mo' nukebwô num àm nà, o zwi àm yu tu wut, ntshùa nelo' àm nèn yi mbwe tàan.

⁹ Yonatan tshob yi ndù: Kà kwate ndùlala. Be me ju' mbe tàa kwate nukebwô z'a kwag o là kà ntag ke soṅ o à ndùke?

¹⁰ David tshob Yonatan ndù: we z'a nsi te bu num àm, a be ze tàan bùnte nu wù be neta neta à?

¹¹ Yonatan tshob David ndù: Se' be tum nèn tshwèt ntu be bàa. Bo tum nèn tshwèt ntu tshob bàa.

¹² Yonatan tshob David ndù: Me lo' Tshùaben Nsi Israél mba nkwénta là! M'a' soṅte zenu tàa, ndamnjù mba mo' ndamnjù; a be ze me yen ndù ntshù mi be num o mebwô là, mba m'a' tum nkùn wù;

¹³ a bwô ndù Tshùaben yab nge' num Yonatan ntùm tshùagntù i fa, a be ze me yen ndù tàa jù' neghù nukebwô num o, ke tum mènntùn a se' nsoṅ o, me bèn mfaṅ o nèn, nèn kua' ntùm fite là. A bwô yen ngelaṅ nà ndù bin Tshùaben be mb'a na' mbe bo tàa là.

¹⁴ A be ze me ke' ntùn nà, mb'a bwô ndù o ghù bwôntù num àm num lén Tshùaben;

¹⁵ a be ze me kwù là, mb'a ke' bwô ndù o sô bwôntù o num yàm tunndà, mba kua' ngelaṅ ze Tshùaben nsi biagte mba zit ngakeban o lo num nsitsha' là.

¹⁶ Nummbe me Yonatan wat kàn bag tunndà o, wù David. A bwô ndù Tshùaben yagte mba' num ghakeban tsho me David.

¹⁷ Yonatan bèn nda'te nkôni David kà nu ngu bwe, nummb'a lo ke nkô i mba kua' ze tu wut là.

¹⁸ Yonatan tshob yi ndù: Ndamnjù b'a ntshùa ṅwù; bo nsi yen mb'o ke nsi, nummbe yu dù' a' be nge.

¹⁹ A mbe mbatte lé'njù tat o swe' nèn ndem dù' z'o to' lem bwe lé'njù ntsha là kà ke tag; a bwô o tswe mbaṅ loṅ Ezel.

²⁰ Me nsi ma' nkét mbaṅ loṅ ntat, mba me ke ndo' ntam a ju yi là.

²¹ Yen ngelaṅ nà me nsi tum ta' ménnshum tshob yi ndù: Nèn ntswitte nkét. A be ze me tshob yi ndù: Lôte, nkét b'a njam o, lo' yub nse' yi là, mb'a bwô ndù o se'e, mb'a b'a ndù njoṅ i fa b'a mebwô num o, ke bètte ndù o bwôge. Mba me netshob wù num lén Tshùaben ndù kebwô ke nsi.

²² Là, a be ze me tshob ménnshum ndù: Tshù nkét là tà mbwe o là, mb'a bwô yen ngelaṅ nà ndù o nène, nummbe mba Tshùaben ke neta' o.

²³ Tshùaben bèn mbe nkwénta num ntshob mi be tshob netèt be là.

²⁴ David nèn ndem tshwèt. A na' mb'a ntshùa ṅwù, mfen tswe dù' jùa nejù jujù.

²⁵ Mfen tswe num diaṅ mbaṅ ba' mb'a be matnu là, Yonatan lo nsi, mfaṅ Abner tswe mbaṅ Saulo; là ze dù' David b'a nge.

²⁶ Saulo ke tshob nu sen lé'njù là, nummb'a lo ke nkwate ndù mo' ndù David ke' be nelàne, ke ndù mo' nu bèn ntum yi lo.

²⁷ A be num mbatte lé'njù bàa num ntshùa ṅwù ze dù' David b'a be nge. Saulo bètte nshum i Yonatan ndù: Numke nshum Isaï lo mbe ke se' num jujù nkôg mba sènni à?

²⁸ Yonatan bùnte Saulo ndù: David lo bètt'àm ngelaṅ nenèn Bétléhém.

²⁹ A lo tshob ndù: Me le't'o, faṅ me nène, nummbe bag ghù jule'te tunndà tusô, mfèl àm bèn nte bu num àm; a be ze me fon fen mbwe o là, o faṅ me nèn nde ntèt fèt tshàm. A ndùlala bèn ngù k'a ke be téblé mfen.

³⁰ Yantù Saulo kam num Yonatan, a tshob yi ndù: Me mén kebwô bo ngatatu, mba me lèn ndù nshum Isaï bèn mbe nshun o, a nsi lo' tuswe tèl o yi mba màan!

³¹ Nummb'o ke nsi tswe fite, yu nufen ke tswe fite mba zit ngelaṅ no ze David, nshum Isaï ke' ntùn num nsitsha' là. Ndonni, tum bo nèn ndo' i nse' yi mbwe àm, nummb'a b'a ze mèn vùkob.

³² Yonatan bùnte tàab ndù: A tù' mèn vùkob à numke? Ke z'a ghù à?

³³ Yen ngelaṅ nà Saulo sab kô num Yonatan nelo' nzwi i yi. Yonatan lèn ndù tàab jù' kua' nezwi David.

³⁴ A sô wul i, ndo num téblé kua' ntùm yantù, ke jù jujù sen lé'njù là. A na' mb'a mbatte lé'njù bàa ntùm ntshùa ṅwù. A b'a ntùm zwe, num kebwô ze tàab ke ntàmte num David là.

³⁵ Njù làn Yonatan nèn mà tshwèt dù' ze bo David nabte nu bwe là. Mo' mônke' nèn tshag i.

³⁶ Yonatan tshob yi ndù: Kù nde nèn ntswitte nkét mi me nsi ma' là. Mônke' kù nde nène, Yonatan ma' két mb'a ya' i kà vù nsi là.

³⁷ Ndùse mônke' kum dù' két se Yonatan ma' be là, Yonatan tshag nz'é tù njam i ntshob ndù: Két ke b'a tà ngùanesà mbaṅ o ké?

³⁸ Yonatan bèn ntshag nz'é tù ntshob ndù: Nànte mbène, kà tsin! Mônke' nànte ntswitte nkét mbèn mbaṅ tàfa' i Yonatan.

³⁹ Mônke' i lo ke lèn nu z'a nsi là. David bo Yonatan bèn nke ndèn nu z'a nsi là tù' bo.

⁴⁰ Yonatan fà tshu ntsho tse mônke' i, ntshob yi ndù a ket nèn yi tusô.

⁴¹ Ndùse mônke' nèn nà, David lo nze mà ntèn, ngwù nsi kabkab yoṅ tse tat. Tshen shun bàa li tate, ntamte nkua'a. David fètte ntsenyà ntshùate.

⁴² Yonatan tshob yi ndù: Nèn fite ndonni, nummbe bag wù nu ngu netèt be num lén Tshùaben. A bwô Tshùaben be netèt be mba netèt nzwit be, mba be nu ngu bwe là.