Biblia Todo Logo
Bìoball air-loidhne

- Sanasan -

1 Samuél 19 - NTSHOB NSI


Saulo bùn David nezwi i

1 Saulo tshob nshum i Yonatan mba ghafa' tse fa ndù a nsi zwi David. Là Yonatan z'a ke nkô David neshu là,

2 soṅ i ntshob yi ndù: Tàa Saulo, tshwèt ndiag nezwi o. Ndonni, a bwô ndù o zete ndamnjù nkebnjù. Tum nèn njamnjam, ndem tu o.

3 Me nsi tum se' tsin mbaṅ tàa mà tshwèt dù' z'o nsi be là, tshob nu tàa num o; m'a' yen ju z'a nsi tshob là se' tshob wù.

4 Yonatan tshob nu tàab mebwô mfà num David, ntshob ndù: A ke' bwô ndù mfen ghù nukebwô num David ngafa' i, nummbe mba tu wul i ke' ghù num o. Mba nu là, a tsha' ngù a mebwô num o.

5 A lo swèn yôg se, nzwi ze Filistia. Tshùaben lo tshùa njam i ntshu' Israél kua' neshu. Tu wul o b'a nkwénta num yen nu là, ndù o tsiaṅte num bwe. B'a bèn ntshùa à ndùke, k'o ghù nukebwô num mbu' à? B'o zwi David ke ntun ndù à numke?

6 Saulo ju' ntshu Yonatan, nu ngu ntshob ndù: Num lén Tshùaben z'a be ntùn nà David ke nsi kwù.

7 Yonatan tsiaṅ David nsoṅ i njoṅ men ntshob là fa; yen nà be tôg a lo' i nèn yi mbaṅ Saulo. David bèn mbe mbwe Saulo à mb'a to' be mbwembwe là.

8 Ntsho bèn nkam netèt Filistia boa ba Israél. David ma' yub kua' kebwô kà bo lo mbwe i nkù nène.


Mikal nzwi David yôg i, David kù nèn Rama

9 Ywèt kebwô ts'a fe Tshùaben nà tsho num Saulo mo' lé'njù. A lo be be ndù Saulo b'a ndà i bo kô se bu i.

10 David nke mbu' tshu mbwe Saulo, a nke ndiag nelo' kô mféb David yi mbaṅ ba'. David tum ntshu Saulo, a féb kô se mbaṅ ba'. David kù, ntum tèttswe' nène.

11 Saulo tum benntùn num ba' David ndù bo nèn ndôt'é, nzwi i nkebnjù. Là Mikal nzwi David soṅ i, ntshob yi ndù: A be z'o ke' kù yen tèttswe' li là mb'o nsi kwù ndamnjù.

12 Mikal tshag David tôndà, a swe' nkù nène. Tshù mat David kù yi kà nèn nà.

13 Yen nà be tôg Mikal lo' neto térafim njab num kune, ndo' ngub mbwe njab tu i, nkabt'é nzwe mfùag.

14 Mikal tshob ndùse Saulo tum bo se' lo' David là ndù: A tshwèt ngone.

15 Saulo bèn nta' yub ntshob bo ndù: Bin lo' i num kun se nse' yi me zwi i.

16 Bo bèn njam, nse' ntèl a neto térafim kune, bo ngub mbwe tu i.

17 Saulo tshob Mikal ndù: Numk'o ntatte ndù mfaṅ ngakeban ntum nkù nèn à? Mikal bùnte Saulo ndù; A lo ntshob me ndù: Faṅ me nène, ntag ndùlala mba m'a' zwi o.

18 Tshù mba David na' ntum nkù nèn nà. A nèn mbaṅ Samuél Rama, nsoṅ tshu fa tse Saulo na' ngù yi là. Yen nà be tôg bo Samuél nèn Najot nke ntswe bwe.

19 Bo soṅ Saulo ntshob ndù: Tshù David là Najot z'a mbaṅ Rama là.

20 Saulo tum benntùn ndù bo nèn ndo' David. Bo tèt mo' mbumte ba ghatshob ntshob Nsi bo nke ntshob ntshob Nsi, Samuél bèn mbe tu num bo. Ywèt Nsi tsho num ben tse Saulo tum nà, mba bo yub tamte num ba ghatshob ntshob Nsi, nto' nke ntshob ntshob Nsi boa bo.

21 Bo soṅ Saulo a bèn ntum tsemo'o, mba bo tshob yub ntshob Nsi. A tum mbatte yoṅ tat, mba bo yub tshob ntshob Nsi be ndaṅndaṅ mba tsemo' là.

22 Be ndùse, Saulo lo, nèn ze tu Rama. Nzin mbe kum mo' ghem s'a be Séku là, mbètte ndù: Samuél bo David b'a yà? Bo bùnte yi ndù: Bo b'a Najot mbaṅ Rama.

23 A lo bwe ntam nze nenèn Najot, Ywèt Nsi tsho num i ze, a tù' ke nzin ntshob be ntshob Nsi tà nkum Najot mbaṅ Rama.

24 A sô nzwe tse, ntshob ze ntshob Nsi mbwe Samuél; a vù nsi tunntôg yen mbwôgtshù mba yen tèttswe' là fa. Ndùlala bo nke ntshob ndù: Mba Saulo be z'a be mo' ngatshob ntshob Nsi ké?

La Sainte Bible en Bamiléké-Medùmba © Alliance Biblique du Cameroun, 1993. All rights reserved.

Bible Society of Cameroon
Lean sinn:



Sanasan