1 Samuél 18 - NTSHOB NSI

Shun Yonatan bo David

¹ Ndùse David miagte netshobte bo Saulo là, ntù Yonatan yab num David, Yonatan nke nkô i kua' mba ze tu wut là.

² Be num sen lé'njù là Saulo tshùb David, ke bèn mbam a bèn njam la' tàab.

³ Yonatan wat kàn bo David, nummb'a na' nke nkô i mba ze tu wut là.

⁴ A sô kummbaṅ s'a ma' num i là mfà David, mba tse tshu ntsho: Ṅwi i, ze ngoṅkét, se kob.

⁵ Saulo tum David num bon nzenze ntum yàme, a tum mènfen ntùm bwe. Ndùlala Saulo lo' David ngù ze tàndà ntsho yi. Yen nà bwô ngô neshu, mba kua' tsemo' tàndà ntsho Saulo.

Yobkwi netshùa ntsho bènnzwi Israél; Saulo nke mbàn David

⁶ Ndùse bo ke mbèn njam, mba David zwi ze Filistia là, bènnzwi tumte njoṅ ntusô Israél fa nse' mbwe mfen Saulo, nke njob mbèn nyiaṅe, nke mbu' ba lammbé, nke nkua nkekwale, nke ntshu'te ntùm tsiaṅte.

⁷ Bènnzwi tse bo ke njob nkwi là nke ntshob ntùm bwe bo bo ndù: Saulo lo zwi ben ntsha' mbùm, David zwi ben ntsha' gham.

⁸ Nu tse bag Saulo kua' kebwô. A tshob ndù: Bo ke mfà ben ntsha' gham à David, njôg mfà me nda' ntsha' mbùm. A tù' à mba bo kwé fen fà yi là.

⁹ Fe num sen lé'njù là mba ndù mànjam, Saulo te lag kebwô num David.

¹⁰ A be ndamnjù, ywèt kebwô ts'a fe Nsi là tsho num Saulo, a nke ngù ntùm ndà i mba mbabun nà. David nke mbu' tshu mb'a ke ngù tsemo' lé'njù là, ndù Saulo tshùb kô se bu i.

¹¹ Saulo bù' kô se tù, ntshob ntù i ndù: M'a' féb kwim David mbaṅ ba'. Là David tum ntshu i yoṅ tse bàa.

¹² Saulo lo ke mbwôg David ndùs'a be nsi là, nummbe Tshùaben lo tum num i ntsho num David, nke mbe bo yi.

¹³ Saulo tshag David ngùanesà num miag mi, njab i num tu ben ntsha' mbùm. David nke ntum mbèn ntsho, nke mbe tu num ngô;

¹⁴ Tshùaben nke mbe bo yi, mba ke lo z'a to'te là nke ngwù lag.

¹⁵ Saulo yen mba tse nu fa tshwèt ngwù lag njoṅ ndù fa là, nke mbwôg i;

¹⁶ là ba Israél fa boa ba Yuda nke nkô David, nummb'a lo be tu num bo, nke ntum mbèn ntsho.

David so ngon mfen Saulo

¹⁷ Saulo tshob David ndù: M'a' fà ngon àm Mérab, tuswe àm wù, a be nzwi o; nda' ndù a bwô o fa' me kua' mebwô, nke ntomte tse ntsho Tshùaben. Tshù, Saulo lo ke ntshob ntù i ndù: Me ke' kô neyab bu num i, là a bwô ndù bu ba Filistia bèn njab num i.

¹⁸ David bùnte ndù: Me b'a we, sàm yôg b'a sil à? Tunndà tàa b'a zit ngô Israél, k'a bwô ndù me be ntse mfen à?

¹⁹ Ngelaṅ nefà Mérab ngon Saulo David lo ku'u, bo fà i à mo' mandum lén se Adriel. A b'a ze Mehola.

²⁰ Mikal ngon Saulo kô David. Bo soṅ Saulo, nu tse bwô i neshu.

²¹ Saulo tshob ndù: M'a' fà i yi, ndù a be ywi' yi, a tshùa bwe ngwù mbu ba Filistia. Ndùlala Saulo tshob David mbatte yoṅ bàa ndù: Ndonni o nsi be ntse àm.

²² Saulo tshob ghafa' tse ndù: Bin à David tshobte njamnjam bin tshob yi ndù: Yen mbe mfen kô o neshu. Mba kua' ghafa' tse num nkô o ndonni, a bwô o bam nebe ntse mfen.

²³ Ghafa' mfen tshob men ntshob là mum ntoṅ David kua' ndaṅndaṅ. David bùnte ndù: Bin kwate mb'a fùag nebe ntse mfen ké? Tu wul àm, me b'a mbwoṅ, ndù me fùage.

²⁴ Ghafa' Saulo bèn njam mfà mbùn ntshob mi David tshob bo là.

²⁵ Saulo tshob mbe bo tshob David mbe mfen ke' be bètte nkàb ghu; là a tshwèt nkô ndù o lo' ba ntshoṅ ket ba Filistia nkù, tse bo zwite yub là nse' yi num nkàb ghu. Yen nà b'a ndù a yagte mba' ghakeban tse. Saulo ke ndiag ndù David vù ntùm mbu ba Filistia.

²⁶ Ghafa' Saulo nèn ntshob men ntshob là David, a bam ju ze mfen bètt'é yi k'a tù' ntse mfen nà.

²⁷ Ngelaṅ lo be ku'u, kà lé'njù se David yab là se'e, David lo nsi boa ben tse, nèn nzwi ba Filistia nkù bàa; a keb ba ntshoṅ ket sob njoṅ ze mfen bètte là nse' mfà, ndù a tù' ntse mfen. Ndùlala Saulo fà ngon i Mikal yi, a be nzwi i.

²⁸ Saulo yen, ndèn ndù Tshùaben b'a bo David; ngon i Mikal nke nkô David neshu.

²⁹ Saulo bwôg David njoṅ ngelaṅ fa z'a be ntùn nà, mbe ngakeban i njoṅ yen ngelaṅ nà fa.

³⁰ Mba zit ngelaṅ no ze ba Filistia ke nkam ntsho là, David nke mbe sa'nde' ntshùa tsemo' tàndà ntsho Saulo fa. Ndùlala lén se ju'ni kua' yàm yàme.