1 Samuél 14 - NTSHOB NSI

Yonatan kam mo' ntshu ntsho ba Filistia

¹ A be num mo' lé'njù, Yonatan nshum Saulo tshob ménnshum z'a be ntshùb tse tshu ntsho là ndù: Se' be nèn tà nkum mbàn ba Filistia z'a be mo' yoṅ nà. A ke tshob sàm ju tàab.

² Saulo na' mb'a tôg Guibéa, bam tù tshom s'a Migron nà, ngô z'a be njam i là be benntùn nguan nkù ntôge.

³ Akiya nshum Akitub, mfèt Ikabod nshum Finéas, nshum Eli, ngafà tshule'te Tshùaben Silo, lo ket kum nesag se bo num nket ngelaṅ fa' là. Ngô lo ke lèn ndù Yonatan tum nène.

⁴ Mo' gholoṅ lo be num dù' z'a bwô ndù Yonatan tôg bwe kà nèn num mbàn ba Filistia là, ndù a ghù nsà ntshu tse bag bàa mba sô là, ta' i num mo' bag, mo' bèn mbe num mo'o. Lén mo' sô gholoṅ nà be Botsets, lén mo' be Séné.

⁵ Mo' nke ntshù nze tu nze Mikmash, mo' nke ntshù nze ntèn, num dù' ze Yonatan tôg là, nze Guibéa.

⁶ Yonatan tshob ménnshum z'a ke ntshùb tse tshu ntsho là ndù: Be nèn tà nkum mbàn tshen ba kesiket là. Be Tshùaben ywimte be. Nummbe be sàm ju ke tshètte Tshùaben neghù be yob ngu'u, ndùse be kag mba ndùse be yàm nà.

⁷ Mèn z'a ke ntshùb tshu ntsho tse là bùnte ndù: Ghù mba ke lo à mb'a ko' ntù o là, bag wù b'a ntshu ntshù'.

⁸ Ndùlala Yonatan tshob ndù: Be ko' nèn num tshen ben nà, nda'te wut be.

⁹ A be ze bo tshob ndù be béb bo se' num be là, mba be a' tsin dù' be be là, ke ko' nèn num bo.

¹⁰ Là, a be ze bo tshob ndù be ko' nse' num bo là, mba be a' nèn, nummbe mba yen nà b'a keki ndù Tshùaben fà yub ntùm mbu be, ndù be yob ngu'u.

¹¹ Ndùlala bo faṅ ba Filistia yen yube. Ba Filistia tshob ndù: Bin yen tsemo' ba Héber tse bo tumte ntô dù' bo lemte njene!

¹² Ben tse bo mbàn nà tshob Yonatan bo mèn z'a tshùb tshu ntsho tse là ndù: Bin ko' nse' num bag, bag soṅ zin nu li! Yonatan tshob mèn z'a ke ntshùb tshu ntsho tse là ndù: Tam njam àm nko' be nène, nummbe Tshùaben swèn yub ntùm mbu ba Israél.

¹³ Yonatan lo' mbu mi boa nku mi nko' yi, ngatshùb tshu ntsho tse be njam i. Yonatan kam ba Filistia, nke ma'te yub nsi, ngatshùb tshu ntsho tse nke miagte yub njam i.

¹⁴ Ntùm yen mbwe netshùa ntsho li Yonatan bo ngatshùb tshu ntsho tse zwite benntùn ṅam mbàa num mekam tsha' z'a ghù nguan mbu kuà là.

¹⁵ Bwôg vù ntùm mbàn, ntùm yen dù' là, mba netèt benntùn; mbàn fa boa fimntshu b'a ntùm bwôg. Dù' nyi'te. Mo' bwôg mba z'a fe a Nsi là ghom ngô.

¹⁶ Tse nton Saulo tse bo Guibéa, ngô Benjamin nà, yen mba bwoṅ benntùn sate, nke nèn bag bag là.

¹⁷ Ndùlala Saulo tshob ngô z'a be njam i là ndù: Me le'te zin ndù bin siaṅ benntùn, njen mèn z'a tum netèt be nèn nà. Bo siaṅ, njen Yonatan bo ngatshùb tshu ntsho tse tsi.

¹⁸ Saulo tshob Akiya ndù: Ghù Koṅ Kàn Nsi ghebte. Nummbe Koṅ Kàn Nsi na' mb'a boa ba Israél yen ngelaṅ nà.

¹⁹ Ndùse Saulo ke ntshobte bo ngafà tshule'te là, tshu'te nke nke' nzi be nezi ntùm mbàn ba Filistia. Saulo tshob ngafà tshule'te ndù: Sô bu o bwe, kà bètte Nsi nu!

²⁰ Yen nà be tôg Saulo bo ngô z'a be njam i là tse'te, nèn tà nkum dù' ze ntsho be là. Va' ke to' yen vù netèt ba Filistia, bo tsho' ṅwi num bo bo bo, num tu wut tshobe, netèt bo.

²¹ Ba Héber tse bo be ze njam ba Filistia, tse boa bo ko' nèn mbàn nà, kaṅ njam, ntam njam Saulo bo Yonatan.

²² Ba Israél tse bo lem num mbat Efraim nà ju' tshô, ntum ntam njam ba Filistia tse bo ke nkù là, ma' yub ntsho.

²³ Tshùaben tshu' Israél sen lé'njù là, ntsho nèn tà nkum yoṅ Bét-Avèn kà ntôge.

Bo ton ba Filistia ntsho. Saulo nke mbàn Yonatan

²⁴ Lé'njù lèt num ba Israél neshu, nummbe Saulo lo ghù ngô nu ngu ntshob ndù: Ndon tu mèn z'a jù ju ke be ndù mfetnjù ku' là, ke be ndù me yagte mba' num ghakeban tshàm nà. Sàm mèn lo ke jù sàm ju.

²⁵ Ngô zin nkum ntùm mo' fèn, ntèt ṅwa' num tsha'a.

²⁶ Ndùse ngô kum bwe là, bo yen ṅwa' nke nké nswe'e; là sàm mèn ke kwag bu ntshu i, nummbe ngô lo kô neze ngu z'a nu là.

²⁷ Yonatan lo ke lèn ndù tàab ghù ngô nu ngu; a tshag tu kôg s'a be bu i là nso ntùm kùa ṅwa'a, ntshag bu ntshu i, ndùlala miag mi ké' kua' mebwô.

²⁸ Ndùlala mo' mèn netèt ngô tshob yi ndù: Tàan lo ngù ngô nu ngu ntshob ndù: Ndon tu mèn z'a jù jujù sènni là! Tshù, ndonni ngô bot fa.

²⁹ Yonatan tshob ndù: Tàa ke neghùtni ngô; yen mba miag màm ké' kua' mebwô mba me zwi'te metsit ṅwa' njene!

³⁰ A kua' nenùne, ngô lo njù ntsha' z'a tèt la' ghakeban tse là, mba ba Filistia vù ntsho à bag ntshùa ndùlala.

³¹ Bo tshùa ba Filistia ntsho sen lé'njù là neto' Mikmash nèn nkum Ajalon. Ngô lo bot kua' neshu;

³² bo tsho' ngwù num ntsha'. Bo lo' ba mbwe, ba nyàmna' boa ba mfô, ngwat yub num tsha'a, mfèt mbàb yub boa lem.

³³ Bo soṅ Saulo yen nu là ntshob ndù: Tshù ngô là z'a ghù nukebwô num Tshùaben, nke mfèt mbàb boa lem nà. Saulo tshob ndù: Bin ke nta à tu ndùlala; bin bwoṅte ta' loṅ ndùb nse' yi mbaṅ àm.

³⁴ A bèn ntshob ndù: Bin nèn ntùm ngô ntshob mba we lo lo' ze nyàmna' ke ze mbwe lo nse' yi nsen ni kà ngwale. Bin a' fèt mbàb i, a ke bèn mbe nukebwô num Tshùaben, mba ndùse bin fèl à boa lem tse là. A be tèttswe' mba we lo lo' ze nyàmna' bu i nse' yi, ndù a wal i num loṅ.

³⁵ Saulo kut ta' tômbwôg Tshùaben. A mbwe tômbwôg s'a kut Tshùaben nà.

³⁶ Saulo tshob ndù: Be swe' yen tèttswe' li nèn nkam ba Filistia, ndag ntsha' yub ke faṅ sàm ju tà nkum mfôgnjù. Bo tshob ndù: Ghù mba ke lo ze ntù o kô là. Ndùlala ngafà tshule'te tshob ndù: Be ghebte num Nsi nsen ni.

³⁷ Saulo bètte Nsi ndù: Be me swe' nèn num ba Filistia ké? O nsi swèn yub mum mbu ba Israél ké? Là, a ke fà sàm mbùn ntshob yi yen ngelaṅ nà.

³⁸ Saulo tshob ndù: Njoṅ zin fenfen ngô fa ghebte nsen ni; bin diag kà njen mba yen nukebwô li tsho yi sènni là.

³⁹ Saulo tshob ndù: Me nu ngu num lén Tshùaben ngatshu' Israél ndù a be z'a b'a mba Yonatan nshum àm bèn ngù yen nu là là, mb'a' kwù. Sàm mèn ke tum netèt ngô mba ntshù' mbùnte nu yi.

⁴⁰ Saulo tshob ba Israél ndù: Bin tsin mo' bag, me bag nshum àm Yonatan bèn ntsin mo'o. Ngô benntùn fa bùnte Saulo ndù: Ghù mba ke lo ze ntù o kô là.

⁴¹ Saulo tshob Tshùaben ndù: Nsi Israél! Ghù nenùn la'te wul i, numk'o ke bùnte nu ngafa' o sènni à? A bwô ndù o ghù urim tume, a be z'a b'a me ke Yonatan no bèn ngù kebwô là, ngù tummim tume, a be z'a b'a ngô là. Yonatan bo Saulo tum ghanu, ngô be tse mbu'u.

⁴² Saulo tshob ndù: Bin ma' mbùn tô nsi num àm bag nshum àm Yonatan. Yonatan tum nganu.

⁴³ Saulo tshob Yonatan ndù: Soṅ àm ju z'o ghù là. Yonatan soṅ, ntshob ndù: Me lo lo' tu kôg s'a be bu àm nà nzwi'te metsit ṅwa' yi. Tshù me li, m'a' kwù.

⁴⁴ Saulo tshob ndù: Yonatan, a bwô ndù Nsi yab nge' num àm, a be z'o ke' kwù là!

⁴⁵ Ngô tshob Saulo ndù: Ke di! Yonatan nekwù à? Yi z'a tshu' ba Israél là ké? Nga, ke b'a ndùlala, Nsi b'a ntùn! Mba nda' ntàn nyiaṅtu ke nsi tsho' tu i vù nsi, nummbe Nsi tshùa njam i kà ngù njoṅ i fa sen lé'njù li. Ndùlala ngô yôg Yonatan, a ke kwù.

⁴⁶ Saulo ke bèn njab njam ba Filistia. Ba Filistia bèn njam la' bo.

⁴⁷ Ndùse Saulo tsho ntùm fen num Israél là, a le' ntsho njoṅ bag tse fa boa ghakeban tse. A le' Moab, ben Ammon, Edom, fenfen Tsoba boa ba Filistia; mba yà lo z'a nèn nà, a tshùa ntsho.

⁴⁸ A la'te neta i, ndab Amalék, nkwé ba Israél mbu ben tse bo ke ndag ntsha' la' i là.

⁴⁹ Tse nshum Saulo b'a Yonatan, Yishvi bo Malkishua. Ngonngon tse bàa na' mb'a: Mérab ntshùambwe bo Mikal ntù'njam.

⁵⁰ Lén nzwi Saulo na' mb'a Akinoam, mbe ngon Akimaats. Lén tàndà ntsho i b'a Abner, nshum Ner, mo' tà Saulo.

⁵¹ Kis tà Saulo bo Ner, tà Abner na' mb'a tse nshum Abiél.

⁵² Saulo na' mb'a be tshwèt ntsho boa ba Filistia njoṅ ngelaṅ fa z'a ke' ntùn nà, mb'a kua' tonte ntsho; mba zit ngelaṅ no ze Saulo fon neta mèn nà, mb'a' yoṅ ndo' i ntùm ze ntshufa'.