1 Samuél 12 - NTSHOB NSISamuél tum num fa' netsho'te ntùm ngô Israél 1 Ndùlala Samuél tshob ba Israél fa ndù: Me lo ju' ntshu zin num mba ke lo ze bin na' ntshob me là. Me lo ghom ta' mfen netèt bin. 2 Tshù mfen z'a ghù ntô zin ndonni li. Mba me là, me ywèn kà mfôge, tshàm nshum b'a netèt bin; me lo be tu netèt bin fe ndùse me be ménnshum nà tà nse' nkum sènni. 3 Tshù me li! Bin tshob nu num àm mbwe Tshùaben mba mbwe mèn a yo' i là, a be ze bin yen kebwô num àm nà. We ze me na' nkwé nyàmna' i ke kekwèn i à? We ze me na' ma'ni i à? We ze me lo' ntutntut ntsho i yi à? We ze me na' nkwé nda' yi kà nkabt'é à? Ng'é tum me ba' ju ze me kwé yi là. 4 Bo bùnte ndù: O lo ke to' ma'ni yage, ke to' lo' ntutntut ntsho yag yi, ke to' kwé ju bu mèn. 5 Samuél bèn ntshob bo ndù: Tshùaben b'a ngakwénta num bin, mèn a yo' i là be nkwénta sènni ndù bin ke' tèt sàm kebwô num àm. Bo bùnte ndù bo b'a ghakwénta. 6 Samuél tshob ngô ndù: Tshùaben b'a nkwénta, yi z'a na' mbèn ntsho' Mosé bo Aron, ngù tà tsin fe ngô Egipto mbèn njam nà. 7 Ndonni bin se' mbwe Tshùaben me tsho'te zin num mebwô fa ts'a ghù bin bin à tà tsin nà. 8 Ndùse Yakob nèn Egipto là, tà tsin tswe bwe nkua' ntsiaṅ Tshùaben, a tum Mosé bo Aron, bo sô tà tsin Egipto, nse' nte yub num yen dù' li. 9 Là bo lag Tshùaben Nsi yub; a swèn yub mum mbu Sisera, tàndà ntsho Hatsor, ntùm mbu ba Filistia, mba ntùm mbu mfen Moab, a ma' yub ntsho. 10 Bo bèn nkua' ntsiaṅ Tshùaben, ntshob ndù: Bag ghù nukebwô, nummbe bag lo ghua' Tshùaben, nke mfa' ba Baal boa Astarté; tshu' yag ndonni ntùm mbu ghakeban tshage, bag nsi tù' ke fa' a wù. 11 Ndùlala Tshùaben tum Yérubbaal bo Bedan, Yefté bo Samuél. A se' ntshu' zin mbu ghakeban tse bo lam zin mbum nà, ngù bin tswe fite. 12 Là ndùse bin yen Nakash mfen ben Ammon nke nse' num bin nà, bin tshob me ndù: Nga man, a bwô ta' mfen tô yage. Mbe ndù Tshùaben Nsi zin bèn mbe zin mfen. 13 Ndonni tshù mfen ze bin na' ntsho'o, ze bin na' mbètte li; tshù mfen ze Tshùaben yab netèt bin ni. 14 A be ze bin bwôg Tshùaben, a be ze bin fa' yi, nju' ntshu i, ke be ghatatu num ntshob Tshùaben, mba bin nsi lat num Tshùaben Nsi zin, bin mba mfen z'a nsi tô netèt bin nà. 15 Là, a be ze bin ke' ju' ntshu Tshùaben, mbe ghatatu num ntshob mi là, mba bu Tshùaben a' lo nsi num bin, mb'a na' ndo nsi num tà tsin nà. 16 Bin bèn mbéb nsen ni, njen nu netshàm ze Tshùaben a' ghù num miag min nà. 17 Ndonni ke b'a ndù netsho' ngefet ké? M'a' tsiaṅ lén Tshùaben, a tum mfambaṅ bo mbaṅ. Ndùlala, a bwô bin lèn ndù bin fàn à nu mbwe Tshùaben, mba bin bètt'é ta' mfen nà. 18 Samuél tsiaṅ lén Tshùaben, a tum mfambaṅ be kua' sen lé'njù là. Ngô fa bwôg Tshùaben bo Samuél neshu. 19 Ngô fa tshob Samuél ndù: Le'te Tshùaben Nsi o num tu ghafa' tsho, ndùlala ndù kà bag kwù. Nummbe bag lo kwi'te nukebwô tshage, mfàn nu mba bag bètte ta' mfen netèt bag là. 20 Samuél tshob ngô ndù: Kà bin bwôg! Bin lo ghù yen kebwô là; là kà bin sô wut zin num Tshùaben. Bin ke mfa' Tshùaben njoṅ ntù zin fa. 21 Kà bin sô wut num i nèn nke mfa' tshu banban, tse bo ke' be tshu' mèn ke yôg i là, nummbe tshen tshu là b'a tse banban. 22 Tshùaben ke nsi ghua' ze nzwit mèn, num nu lèn se se ndùb, nummbe Tshùaben jù' nelo' zin ngù ze nzwit mèn yi. 23 A ke' bwô mba yàm tu wut ghù nukebwô num Tshùaben, ke tsin nele'te num tu bin! M'a' tswite zin manze ntùn bo ze manze ndaṅndaṅ. 24 Bin bwôg nda' Tshùaben, bin ke mfa' yi ntù ntshù', kua' ngô ntù zin fa. A bwô bin yen lèn neta z'a tshwèt nda'te netèt bin nà. 25 Là, a be ze bin ghù nukebwô là, mba bin nsi kwùte fa, bin mba mfen zin. |
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
Bible Society of Cameroon