1 Samuél 11 - NTSHOB NSI

Saulo tshùa ba Ammon

¹ A lo be tshùa ta' maṅwù Nakash mèn Ammon se' nekam Yabès z'a Galad là ntsho. Njoṅ ba Yabès fa tshob Nakash ndù: Bag bin wat kàn, bag a' ke mfa' wù.

² Là Nakash mèn Ammon bùnte bo ndù: Me bam ndù bag bin wat kàn, a be ze bin bam ndù me to miag min mi zwim fa là. A nsi tshùa ndùlala me tam tuswe tu ngô Israél fa.

³ Ghakwé mbwe ba Yabès tshob Nakash ndù: Bam lé'njù bag sammbàa bag tshag ghantum ntùm ngô Israél fa, a be ze mèn ke' tum z'a ywimte yag là, mba bag nsi fà tu wut tshag wù.

⁴ Ghantum zin nkum Guibéa dù' Saulo ke ntswe là, ntshob yen nu là num ntoṅ ngô fa. Ndùlala ngô tshag nze tù, nkua'a.

⁵ A lo be be Saulo nke mfe à tshwèt, njam nyàmna' tse, ndùlala, a tshob ndù: Ke z'a ghù ngô k'a nke nkua' à? Bo soṅ i ju ze ba Yabès tshob là.

⁶ Ndùse Saulo yoṅ nju' tshen tshu là là, Ywèt Nsi yoṅ ntsho num i, yantù i kam à kua' kebwô.

⁷ A lo' nyàmna' bàa, nkebte nkamnkam, ntshag ghantum ntùm ngô Israél fa ntshob ndù: Mba we lo z'a ke' zin njam Saulo bo Samuél là, mba bo nsi kebte tse nyàmna' be kua' ndùlala. Bwôg z'a fe Tshùaben nà ghom ngô, a tam njam Saulo mba ta' mènntùn ntshù' là.

⁸ Saulo tsha' benntùn fa Bézék; bon Israél tum benntùn ntsha' nkù tat, tse Yuda tum benntùn ntsha' ṅam ntat.

⁹ Bo tshob ghantum tse bo tshag bo là ndù: Bin tshob ba Yabès tse bo be Galad là ndù ndamnjù bo ghù ywimte ndùse lagnyam nsi tum ke tà là. Ghantum bèn njam mfà yen tshô là ba Yabès, bo be ju' ntsiaṅte kua' neshu,

¹⁰ ntshob ba Ammon ndù: Ndamnjù bag fà tu wut tshag bin, bin ghù num bag mb'a ko' ntù bin nà.

¹¹ Njù làn Saulo ghabte ngô nkam benntùn ntat. Bo tshote ntùm mbàn ben Ammon nguan nyam tat nkebnjù, ma' yub ntsho, nton yub tà nkum ndùse lagnyam tum tà nke ntà là. Tse bo tum ntshu vùkob là nèn nta'nta' kà benntùn bàa ke tam mbob nzine.

¹² Yen nà be tôg ngô bètte Samuél ndù: A kua' ba we na' nke ntshob mbe Saulo ke tô, be mfen be à? Fà tshen ben nà bag, bag zwite yube.

¹³ Là Saulo bùnte ndù: Bo ke zwi sàm mènntùn sènni, nummb'a b'a lé'njù se Tshùaben tshu' Israél là.

¹⁴ Samuél tshob ngô ndù: Bin se' be nèn Guilgal ngom Saulo ze be mfen bwe.

¹⁵ Ngô fa lo nèn Guilgal, ntsho bwe ngom Saulo mfen mbwe Tshùaben, mfà tshule'te tse nefà me bam. Saulo boa ba Israél fa jù jùa ntùm tsiaṅte ndùb.