1 Samuél 1 - NTSHOB NSI

Eli ngale'te mbèn mbe ngatsho'te ntùm ngô Israél

¹ Mo' mandum lo be bwe, mbe ze Ramataim-Tsofim, z'a fe num mbat Efraim nà. Lén se b'a Elkana, nshum Yérosham, nshum Eliu, nshum Tohu, nshum Tsuf ze Efrata.

² A lo ghù bènnzwi bàa, lén mo' be Ana, se mo' be Peninna, Peninna lo ghù bon, là Ana ke ghù.

³ Mandum nà lo ke ndo se tusô nko' nèn Silo mba zit ngu'njù lo num nevù mbwe Tshùaben tàndà ntsho, mfà tshule'te yi. Hofni bo Finéas ghafà tshule'te Tshùaben na' mb'a bwe. Bo na' mb'a tse nshum Eli.

⁴ A lo ke mbe lé'njù se Elkana fà ze jule'te là, a fà ze bag Peninna nzwi i, mfà tse nshum tse fa boa tse ngon tse fa, tse Peninna ghù là.

⁵ Là mbe kum num Ana mfà ze yoṅ tse bàa; nummb'a lo ke nkô Ana mba mba Tshùaben na' ngù a be kebwe là.

⁶ Fôg i lo ke nkag mfaṅ ntù i, nkamt'é ndù a ya ntù mba Tshùaben na' ngù a be kebwe là.

⁷ A lo ke mb'a be ndùlala mba zit ngu'njù lo. Mba zit ngelaṅ no Ana ko' nèn ndà Tshùaben nà, Peninna nke nkag mfaṅ ntù i be mbe ntshù'. Ndùlala Ana nke ndàne, ke ke njù ju.

⁸ Elkana ndu i nke ntshob yi ndù: Ana numk'o nke ndàn ke kô nejù ju à? Numk'o ngù nywin ntù o ndù à? Me ke' ta njoṅ wù ntshùa nshumnshum ntu gham ké?

⁹ Ana lo nsi mo' lé'njù ndù bo jù mbèn nu Silo. A lo be ndù ngafà tshule'te, Eli tswe num diaṅ, mbaṅ ndà Tshùaben.

¹⁰ A le'te Tshùaben, ndù zwe dun ntù i, mfètte ntsenyà yàme.

¹¹ A ghù nka'ni ntshob ndù: Tshùaben tàndà ntsho! A be z'o bame, ntam lag num sobni ngafa' o ze mènnzwi là, a be z'o kwimt'àm, ke lag ngafa' o me ze mènnzwi, a be z'o fà ta' mén mandum ngafa' o me là, mba m'a' yab i ntùm fa' so wù Tshùaben njoṅ ngelaṅ fa z'a nsi ke' ntùn nà, ke bam ndù shua' zi ntshùa tu i.

¹² Mb'a tswe num le'te ngelaṅ yàm mbwe Tshùaben nà, Eli ze ntshu i.

¹³ Ana na' nke ntshob nu à ntùm ntù i, nkub ntshu mi bèn nke ndabte, mèn ke ju' nz'é tù.

¹⁴ Eli kwate mb'a bum à ndu', ntshob yi ndù: O a' ghô ntùm nebum ndu' tà kum à ndùke? Ghù ndu' kebte se o.

¹⁵ Ana bùnte ntshob ndù: Nga me tshùaben àm, me b'a ta' mènnzwi z'a ghù sobni ntù i là; me ke' nu ndu' ke neta ndu' lo. Là, me lo nke nké' ntù àm mbwe Tshùaben.

¹⁶ Kà lo' ngafa' o ze mènnzwi mba mènnzwi kebwô là, nummb'a ntobni bo nywin z'a gha' mbu ntù àm nà bèn ngù me ntshob nu tà nse' nkum ndonni.

¹⁷ Eli bùnte, ntshob yi ndù: Nèn ntùm fite, Nsi Israél bùnte wù mb'o le't'é ndon yi là.

¹⁸ Ana tshob ndù: A bwô ngafa' o ze mènnzwi tum mènfen num miag mo. Mènnzwi là tshob ndùlala nène. A jù ju, se i ke bèn mb'a mbe mi.

¹⁹ Bo lo nsi kua' bam nkebnjù, mbe miagte nevù mbwe Tshùaben ndo mbèn njam ndà bo Rama. Elkana lèn Ana nzwi i, Tshùaben kwimt'é.

Bo bwe Samuél

²⁰ A be jùm ntùm ngu'njù, mbwe mén mandum ntswi lén se Samuél, nummb'a lo tshob ndù: Me na' ndon i à Tshùaben.

²¹ Ndu i Elkana lo' ze tunndà fa, nko' nèn fà jule'te ze tamngu' Tshùaben, mba ndù a zwiagte ze nka'ni a bumte.

²² Là Ana ke ko' nèn bwe, njôg ntshob ndu i ndù: Ndùse bo nsi tsho' mén bùn nà, m'a' lo' i nèn yi num nela't'é mbwe Tshùaben. A bwô yen ngelaṅ nà ndù a ghô bwe matmat.

²³ Ndu i Elkana tshob yi ndù: Ghù mba ke lo z'a bwô o là, faṅ nà tà nkum ndùse bo nsi tsho' i bùn nà. A bwô nda' ndù o zwiagte nka'ni z'o ghù Tshùaben nà! Mènnzwi tù' nke nyô nshum i tà nkum ndùs'a tsho' i bùn nà.

²⁴ Ndùs'a tsho' mén bùn nà, a lo' i nko' nèn bo yi, ndo' fot mfô s'a ghù ngu'njù tat là, ta' kesoṅ mbab bàn, ta' ntu' ndu'. A lo' mén nèn yi ndà Tshùaben Silo. Mén na' nke' à kua' metshab i.

²⁵ Bo wat fot mfô, Ana nèn mén mbwe Eli,

²⁶ Ana tshob ndù: Lagt'àm tshùaben! Me lo' lén so nu ngu yi ndù me b'a mènnzwi là z'a na' ntsin nsen ni mbaṅ o, nke nde'te Tshùaben nà.

²⁷ Me na' nke nde'te Tshùaben à num yen mén ni. Tshùaben lo bam le't'àm num ju me lon yi là.

²⁸ Ndùlala me kô nebèn mfà i Tshùaben. Me fà i Tshùaben num njoṅ ngelaṅ fa z'a nsi ke' ntùn nà. Bo vù nsi mbwe Tshùaben yen dù' là.