1 Pétro 5 - NTSHOB NSI

Ntag num ghakwé mbwe mba benkristô

¹ Ndonni me tsiaṅ ghakwé mbwe tse bo netèt bin nà, me ze me be ngakwé mbwe bag à bo, mbe ngakwénta nge' Kristô, ngù yàm bag i ntùm nkuni mi a nsi tswite wul i là,

² bin béb bwoṅ njùmbwe Nsi z'a be netèt bin nà, ke b'a mba bo nenànte zin nà, là mba bin bèn nkô là, num ze mat Nsi, ke b'a num ntsho'fa' tuswe, là njoṅ ntù zin fa,

³ ke b'a ndù bin tô ben tse bo fà bin nà, là bin tù' mfi' mbwe bwoṅ njùmbwe.

⁴ Ngelaṅ ngabéb mbwe ze ndùb nsi se' là, bin nsi kwé tshe' nkuni z'a ke' be bagte là.

⁵ Be ndaṅndaṅ, benkristô, bin fà wut nsi mbwe ghakwé mbwe. Njoṅ zin fa ke mfà wut nsi bin bin, nummbe Nsi be ntshètte ghako'tewut, là, a num mfà kondèn ghafà wut nsi.

⁶ Ndùlala bin fà wut nsi tun bu Nsi ze neta, ndù a bù'te zin num ngelaṅ i,

⁷ bin yab njoṅ tsin nelab wut fa num i, nummbe a num nywin num bin.

Nezi tshùalo

⁸ Bin zete, nzi tshùalo! Ngakeban zin, Satan, mba ngwayit z'a tshwèt nkua' là, tshwèt nzinte, nke ndiag mèn z'a ghom nà.

⁹ Bin ta tu yi njam tànntù zin ntùm bamntù, ndèn ndù lèn tshen nge' là vù num njoṅ fèt tsin fa tse bo be ntùm njù là.

¹⁰ Là Nsi njoṅ kondèn fa z'a na' ntsiaṅ zin num nkuni mi mi a tswe yoṅ ntshù' num Kristô là, tu wul i nsi ghù bin bwô miagte, ngù tànntù, ngù neta, ngù bin tswe ke nyi'te, ngelaṅ bin nsi yen nge' num mo' ngelaṅ nà.

¹¹ Neta b'a ze num ngu'ngu'. Amén.

Tsha'te

¹² Silvanô, mfèt ze nenùne, mba me kwate là, nsi fà yen ṅwa'ni li bin; me kite bon nkam ntshob bin, num netagte zine, mba nekwé nta ndù yen nà b'a kondèn Nsi ze nenùne; bin tsin ntùm bwe.

¹³ Ntse'te benkristô z'a be Babilon nà mba mén àm Marko tsha'te zine.

¹⁴ Bin tsha'te wut tsin bin bin ntùm nenyô nge' ze nelàne. Fite be njoṅ zin fa tse bin be num Kristô là!