1 Pétro 3 - NTSHOB NSI

Ntag num ben tse bo nandà là

¹ Be ndaṅndaṅ, bènnzwi, bin fà wut nsi mbwe du tsine, ndù yôg bènnzwi soṅte du tse bo ke' bam ntshob là, ke ntshobe,

² ngelaṅ bo yen yôg sin se nelàne, ntùm nebwôg là.

³ Kà zin nenabte wut b'a njam njù: Neba' tu, neso nkwa gol, netsiagte wut ntùm nzwe,

⁴ là zin nenabte wut b'a z'a lem ntùm ntù z'a ke' be bagte là: Ywèt fite mba ts'a tswe ndù kam nà; yen nà b'a ju z'a tanjoṅ mbwe Nsi là.

⁵ A b'a ndaṅndaṅ mba bènnzwi nelàn tse bo ke nywinte num Nsi ke nabte wut tshob mo' ngelaṅ nà, bo lo ke mfà wut tshob nsi mbwe du tshobe,

⁶ be ndaṅndaṅ Sara lo ke nju' ntshu Abraham, nke ntsiaṅ i tshùaben; bin b'a bon Sara, a be ze bin ghù numebwô ke bwôg sàm ngùtni là.

⁷ Be ndaṅndaṅ, bandum, bin tswe bin à zwi tsin ntùm zenu, ndèn ndù bo b'a ben nebot ntshùa zine; bin ku'ni yube, ndèn ndù bin à bo nsi tamte jù ntsi' kondèn yôg, ndùlala ndù kà sàm ju tshètte nde'te Nsi mine.

Ntag num nkôni, nefite mba nefènte

⁸ Miagtenu b'a ndù bin ghù nkwate ntshù', ntamte njen nge', ndun nkôni fètfèt mba kondèn, ntùm nefà wut nsi,

⁹ kà bin lo' nukebwô njagte nukebwô yi, ke so ndon tu ben tse bo so ndon tu bin nà, là, a lo mbwô bin naṅ mbotni, nummbe bo na' ntsiaṅ zin à num yen nà, ndù bin jù ntsi' mbotni.

¹⁰ Nummbe mèn z'a kô nekô yôg, njen ba lé'njù là, a bwô ndù a tshùb lém se num nukebwô, ntshùb nkub ntshu mi num nkùnkù,

¹¹ a kù nukebwô, ngù numebwô, a diag fite, ntam njam i;

¹² nummbe Tshùaben te miag mi num ben netsine, nkù' ntoṅ num le'te Nsi mube, là Tshùaben nyamte se i mbwe ghaghù nukebwô.

¹³ A be ze bin kô numebwô là, mba we z'a nsi ghùtni zin à?

¹⁴ Là, a be ze bin yen mba nge' num nunetsin nà, mba bin b'a ghafen. Kà bin bwôg yube, kà tu tsin tshu',

¹⁵ là bin lànte Tshùaben Kristô ntùm ntù tsine, bin be tswe nke mbébe, a be ze mèn bètte zin nu num nenywinte z'a be num bin nà, bin kwé nta,

¹⁶ là ntùm fite mba nebwôge, ngù nzentù mebwô, ndù tuswe ko ben tse bo num ntshabte zine, nke ntete nu num nzin min mi mebwô num Kristô là.

¹⁷ Nummbe a bwô neyen nge', a be z'a b'a ze nekô Nsi là, ngù numebwô ntshùa neghù nukebwô.

¹⁸ Be ndaṅndaṅ, mba Kristô lo kwù yoṅ ntshù' num njoṅ yoṅ tse fa num nukebwô, yi mèn netsine, num ben ketsin, ndù a tshag zin mbaṅ Nsi; bo lo zwi i ntùm mbàb wut, a bèn ntù' ntùn ntùm Ywèle,

¹⁹ ntùm tshen Ywèt là, a lo nèn ntshob ntshob Nsi mba ba ywèt tse bo be ndàtsha là,

²⁰ ywèt tse bo be ke ju' ntshu Nsi fe mbwe, ntùm ngelaṅ nefènte Nsi, ntùm lé'njù tse Noa kom kenu se metsit bwoṅ benntùn, yôg ntse ntùm bwe là.

²¹ Yen nà b'a se kwéntse z'a tshwèt njôg zin ndonni là, yen kwéntse là ke' be sôg à ṅu' mbàb wut, là, a b'a nzentù mebwô ze mèn be mbètte mbwe Nsi njam nebam num vù Yésu Kristô,

²² yi z'a nèn kamànyam, ntswe num bag bu Nsi ze zwim, ba Angél, ba ngù' mba ba neta fà wut nsi mbwe i là.