1 Pétro 1 - NTSHOB NSI

Tsha'te

¹ Me Pétro, ngantum Yésu Kristô. Me kite yen ṅwa'ni li à ben tse Nsi tsho' yube, tse bo be ghùn ntùm nesate mà Pontô, Galatia, Kapadôkia, Asia, mba Bitinia là.

² Mb'a be ntùm nkwatenu Nsi Tà tà fe mbwe là, Nsi tsho' yube, Ywèt lànte yube, ndù bo ju' ntshu Yésu Kristô, ngù yub bag i num lem ts'a fètte là. Kondèn mba fite be bin yàme.

Nenywinte benkristô

³ Ghamte be Nsi mba Tà Tshùaben be Yésu Kristô: Ntùm kondèn i ze ndùb, a lo bèn mbwe be njam nelo num vù Yésu Kristô ndù be ghù nenywinte z'a be ntùn nà,

⁴ mba ndù be ghù ntsi' mi a ke' be bagte, mi a ke' ghù lo', mi a ke' be bi là. A lem men ntsi' là bin mfe kamànyam,

⁵ bin tse neta Nsi lem zin njam bamntù num yôg s'a nsi la't'é ngelaṅ mànjam nà.

⁶ Bin tshwèt ntsiaṅte num yen nà, mba mb'a bwô ndù bin nywin ndonni num mo' mén ngelaṅ ntùm nge' nzenze là.

⁷ Nummbe a bwô ndù laṅte bamntù zin z'a tanjoṅ ntshùa gol nebi ze bo laṅt'é mbwôg là, fà nyàmte, nkuni mba ghamte bin, ngelaṅ Yésu Kristô nsi tswite wul i là.

⁸ Bin num nkô i, ke be ndù bin lo yen i; nke mbam i, ke be ndù bin to' yen i, nke ntsiaṅte ntùm tsiaṅte ze be mèn ke soṅ nà, ndù a dun nkuni,

⁹ nummbe bin nsi kwé ntsho'fa' bamntù z'a be yôg ntù tsin nà.

¹⁰ Ghatshob ntshob Nsi tse bo na' ntshob nu num kondèn ze Nsi lem bin nà, lo diag neyene, mba nelèn ju ze sen yôg là be yi là;

¹¹ bo lo diag nelèn mèn mba ngelaṅ ze Ywèt Kristô z'a be num bo, ngelaṅ z'a bwôgmbwe nkwé nta num nge' Kristô mba nkuni mi a nsi tum njam bwe là.

¹² Nsi lo ghù bo lèn ndù a ke b'a num tu wut tshob tse bo tshwèt mfa' ntùm tshen tshu là là, là num bin; ben tse bo tshob nkùn mebwô bin njam Ywèt Nelàn ts'a swe' kamànyam nà, soṅ zin tshen tshu là ndonni, tshen tshu là b'a tse ba Angél kù ntù nema' miag mub ntùm bwe là.

Ntag num yôg nelàn mba nkôni

¹³ Bin taṅ kob tun zenu zine, nzete, nke nywinte kondèn ze bo fà bin ngelaṅ ze Yésu Kristô nsi tswite wul i là, kua' mebwô.

¹⁴ Bin be bon neju' ntshu, ke bèn nelo' fi'te ghe'te ze bin na' ngù ngelaṅ mbwe, ngelaṅ kagni là,

¹⁵ là mba mèn z'a tsiaṅ zin b'a mèn nelàn nà, mba bin tù' ben nelàn ntùm njoṅ nzin min fa,

¹⁶ mba bo kite ndù: Bin nsi be ben nelàne, nummbe me b'a mèn nelàne.

¹⁷ A be ze bin ke ntsiaṅ mèn z'a be ntsho'te mba we lo à num fa' se, ke tôte sàm mèn, ndù tà là, bin zin ntùm bwôg, ngelaṅ bin ke' nkatte njù là,

¹⁸ ndèn ndù bo lo ke lo' à tshu nebagte, silba ke gol lo ntshu' zin yi num yôg banban se bin na' nkwé ba tà tsin nà,

¹⁹ là bo lo' à lem Kristô tse tanjoṅ, yi z'a be mba mén njùmbwe z'a ke' sagte, ke ghù lo',

²⁰ ze Nsi lèn i kà nenabte njù mbe, ze Nsi la't'é num yen miagte ngelaṅ ni num tu bin nà, ntshu' zin yi;

²¹ bin tshùa njam i, mbam Nsi z'a bam i num vù, mfà nkuni yi là, ndùlala ndù bamntù zin mba zin nenywinte be num Nsi.

²² Mba bin lànte ntù tsin ntùm neju' ntshu nunenùn ndù bin ghù nkôni fètfèt ke nkùnkù là, bin ke nkôni bin bin ke bot ntùm ntù tsine,

²³ nummbe bo bèn mbwe zine, ke bwe zin à nzwit ju nebagte, là z'a ke' be bagte là njam ntshob Nsi mi a be ntùn, mi a tswe yoṅ ntshù' là.

²⁴ Nummbe njoṅ mbàb wut fa b'a mba nenà là, njoṅ ghamt'é fa be mba nsàm nenà là; nenà be njume, nsàm mi vù,

²⁵ là ntshob Tshùaben tswe yoṅ ntshù'. Men ntshob nkùn mebwô ze bo na' ntshob bin nà.