1 Kronika 23 - NTSHOB NSI

David tsiagte bon Lévi, njab yub nkam nkam

¹ David ywèn, ngu'njù tse yàm, ndùlal'a te nshum i Salomon num fen ntùm ngô Israél.

² A kùmte njoṅ fenfen Israél fa, ghafà tshule'te boa ben Lévi.

³ Bo siaṅ ben Lévi, neto' num ben bo ghù ngu'njù ṅam ntat là boa tse bo tôg ndùlala là. Bo siaṅ yub ntshù' ntshù', bo tum benntùn ntsha' ntshob fom ṅam ntat.

⁴ David tshob ndù: A bwô ben ntsha' ntshob kuà ṅam mbàa ke mfa' ntùm ndà Tshùaben, tse ntsha' ntôg ke nkite tshunu, nke nsa' kame,

⁵ tse ntsha' kuà ke mbéb nzendà, tse ntsha' kuà ke ngamte Tshùaben boa tshu nebu' ju yi tse me na' nabte neke ndo' nyàmt'é yi là.

⁶ David ghabte yub nkam nkam ndaṅndaṅ mba tse nshum Lévi, Guershom, Kéhat bo Mérari be yi là.

⁷ Netèt ben Guershom: Ladan bo Shimei.

⁸ Tse nshum Ladan: Mfen Yéhiél, Zétan bo Yoél, ntu tshob tat.

⁹ Tse nshum Shimei: Shelomit, Haziél bo Haran, ntu tshob tat. Tshen ben nà b'a fenfen tunndà tà, ntùm tunndà Ladan.

¹⁰ Tse nshum Shimei: Yakat, Zina, Yéush, bo Béria. Tshen ben nà b'a tse nshum Shimei kuà.

¹¹ Yakat na' mb'a mfen, Zina be mbatte bàa; Yéush bo Béria lo ke ghù tshob nshum yàme. Ndùlala bo tamte yub tunndà tà a tù' ntshù' ndùse bo ke nsiaṅ yub là.

¹² Tse nshum Kéhat: Amram, Yitsehar, Hébron bo Uziél, ntu tshob be kuà.

¹³ Tse nshum Amram: Aron bo Mosé. Bo yab Aron nsi ndù bo lànt'é a làn ntshùate, yi boa tse nshum matmat, ndù a ke nton labinda mbwe Tshùaben, nke mfa' fa' se, mbèn nke naṅ mbotni num lén se matmat.

¹⁴ Là, bo siaṅ tse nshum Mosé mèn Nsi à ntùm ze tunndà Lévi.

¹⁵ Tse nshum Mosé: Guershom bo Eliézer.

¹⁶ Tse nshum Guershom: Mfen Shebuél

¹⁷ Tse nshum Eliézer na' mb'a: Rekabia z'a be mfen nà; Eliézer ke bèn ngù tsemo' nshum, là tse nshum Rekabia lo yàm neshu.

¹⁸ Tse nshum Yitsehar: Mfen Shelomit

¹⁹ Tse nshum Hébron: Mfen Yériya; Amaria be mbatte bàa; Yakaziél be mbatte tat; Yékaméam be mbatte kuà.

²⁰ Tse nshum Uziél: Mfen Mika bo Yishiya mbatte mfen.

²¹ Tse nshum Mérari: Makli bo Mushi. Tse nshum Makli: Eléazar bo Kis.

²² Eléazar kwù ke ghù mén mandum; a na' ngù à nda' ngonngon, tse fèt tshob tse nshum Kis sote yub là.

²³ Tse nshum Mushi: Makli, Eder bo Yéremot, ntu tshob tat.

²⁴ Tshen ben nà b'a tse nshum Lévi, mba tshob tunndà tà be là, bo b'a fenfen tunndà tà, ndaṅndaṅ mb'a be mba bo siaṅ yub là. Bo siaṅ yub à ntshù' ntshù'. Bo na' mbèn nke mfa' ntùm ndà Tshùaben ndùse bo ghù ngu'njù ṅam mbàa ke ntôgte lo là.

²⁵ Nummbe David lo tshob ndù: Tshùaben Nsi Israél fà fite ze nzwit mèn, mbe ndù a' tswe Yérusalém ngu'ngu';

²⁶ ben Lévi ke nsi bèn ke ket dù'ntswe boa tshundà num fa' ke zin yi.

²⁷ A miagte ntshob David bèn ngù kà bo nsiaṅ tse nshum Lévi tse bo ghù ngu'njù ṅam mbàa kà ntôgte là.

²⁸ Bo yab yub num tse nshum Aron num fa' ndà Tshùaben. Bo nke ndôte bam ntshundà boa nto'ndà, nke ndànte tshu nelàne, tshu neke mfa' yi ntùm ndà Nsi;

²⁹ bàn le'te Nsi, mbab bàn num tshu bwôntù, makela' ke ntsha', tag tse bo ton num bag ju là, boa tse bo kate là. Tshen tshu là b'a mfi' nzenze;

³⁰ bo lo ke nèn mbwe Tshùaben mba zit nkebnjù bo mfetnjù lo, ndù bo ghamt'é mbèn nyàmt'é;

³¹ mba ndù bo ton njoṅ tshule'te fa Tshùaben, num njoṅ Sabbat fa, njoṅ ntshùa ṅwù fa boa njoṅ njùa fa, num njoṅ ze kàn bètte bo kite là.

³² Bo lo ke nabte ndà mbumte, dù' nelàne, fèt tshob tse nshum Aron nke mfa' ntùm ndà Tshùaben.