1 Kronika 21 - NTSHOB NSI

David ghù bo siaṅ bon Israél

¹ Satan lo nsi num Israél, ntènte David a siaṅ Israél.

² David tshob Yoab boa fenfen ngô ndù: Bin nèn nsiaṅ Israél, neto' Ber-Shéba nèn nkum Dan, nse' nda'te me, me lèn njoṅ mba bo be ndonni là.

³ Yoab bùnte ndù: A bwô ndù Tshùaben ghù ze nzwit mèn yàm ntshùa mba bo be là yoṅ nkù. Mfen àm mbe tshùaben àm, njoṅ yub fa ke' b'a ghafa' tsho ké? Ke z'a ghù tshùaben àm mbètte yen nu l'à? Be ghù Israél ghù nukebwô numke?

⁴ Mfen saṅlaṅ num nu z'a tshob Yoab là. Yoab nèn, nzin ntùm ngô Israél fa, mbèn mbèn njam Yérusalém.

⁵ Yoab fà njoṅ ze benntùn tum nà David. Bon bandum tum ta' ntshù' ngù ben ntsha' nkù tse bo ku'ni netsho' ṅwi là ntùm Israél, ntum Yuda ben ntsha' bon sammbàa nkù kuà tse bo ku'ni netsho' ṅwi là.

⁶ Yoab lo ke siaṅ ben Lévi boa tse Benjamin, nummbe ntshob mfen na' mbe num miag mi à mba tshùaya'nu là.

Nsi tam nda' tu David num mfànnu mi

⁷ Yen nu li bag Nsi, a lab Israél.

⁸ David tshob Nsi ndù: Me ghù mà nukebwô ndùb mba me ghù yen nu là là! Ndonni a bwô o tshàm ndèn ngafa' o, lagte me, nummbe me ghù yen nà à ntùm femni.

⁹ Ndùlala Tshùaben tshob Gad, ze ngayente David ndù:

¹⁰ Nèn ntshob David ndù: Tshùaben tshob mbe me dù wù mb'a yab nge' mbwe o tat, nke mbètte mb'o tsho' ta' i bwe, a lo' ndab o yi.

¹¹ Gad nèn mbaṅ David, ntshob yi ndù: Tshù mba Tshùaben bètte li:

¹² Tsho'o, k'o kô à ngu'njù nziku' tat, ke maṅwù tat tse ghakeban nsi sat'o, ṅwi tshob vù num o lo, ke lé'njù tat tse ṅwi Tshùaben bo keya' nsi be ntùm ngô lo; mba Angél Tshùaben z'a nsi sate njoṅ ngô Israél là. Ndonni soṅ àm ju ze me nsi bùnte mèn z'a tum àm nà.

¹³ David bùnte Gad ndù: Me b'a ntùm sobni ndùb! A bwô ndù me vù à ntùm mbu Tshùaben, nummbe kondèn i b'a mà ze ndùb. Là, a ke' bwô ndù me vù ntùm mbu benntùn.

¹⁴ Tshùaben tshag keya' ntùm ngô Israél, a zwite ben ntsha' ṅam sammbàa ntùm ngô Israél.

¹⁵ Nsi tum ta' Angél Yérusalém ndù a nèn nsat'é; mb'a ke nsat'é là, Tshùaben lôte, mfém num yen kebwô là, ntshob Angél z'a ke nsate Yérusalém nà ndù: A ku' ndùlala! Sô bu o ndonni. A lo be be ndù Angél tsin mbaṅ dù' netsham nsa Ornan, ze Yébusia.

¹⁶ David bù' miag mi, njen Angél Tshùaben ndù a tsin netèt kamànyam bo tsha'a, ntshùb ṅwi bu i banban, ntshag nze Yérusalém. Ndùlala David boa ghakwé mbwe tse bo tôg nke'bàm nà, vù nsi kabkab.

¹⁷ David tshob Nsi ndù: A ke b'a me na' mbèn ntshob bo siaṅ ngô ké? A me bèn ngù kebwô, mbèn mbèn mfàn nu; là tshen mbwe li ghù yub à ke? Tshùaben Nsi àm, a bwô ndù bu o lab à num àm bo tunndà tàa. A ke' bwô bu o so mfaṅ mum ngô o!

David kut tômbwôg le'te Nsi Tshùaben

¹⁸ Angél Tshùaben tshob Gad ndù a tshob David, a ko' nèn nkut tômbwôg Tshùaben mbaṅ dù' netsham nsa Ornan, ze Yébusia.

¹⁹ David ko' mba Gad tshob num ze ntshu Tshùaben nà.

²⁰ Ornan kaṅ wul i njen Angél, nshumnshum tse kuà lem boa bo. A lo be be Ornan nke ntsham nsa.

²¹ Ndùse David kum mbaṅ Ornan là, Ornan lôte David, njen i, ndùlala ntum dù' netsham nsa, ngwù mbwe David kabkab.

²² David tshob yi ndù: Fà dù' netsham nsa me, me kut tômbwôg Tshùaben bwe. Fà me nsoṅ àm njoṅ nkàb me fà là, ndù mfaṅ z'a be ntùm ngô là tum bwe.

²³ Ornan bùnte David ndù: Mfen àm, mbe tshùaben àm, lo' ngù mba ke lo z'a bwô o là bwe. M'a' fà ba nyàmna' tse bo ton nà, mfà nkalig mi neket ntshwèn yi, mfà nsa num ju bwôntù. M'a' fà njoṅ i fa.

²⁴ Là mfen David tshob Ornan ndù: Nga, m'a' fà nkàb z'a ku'ni njoṅ i là, nummb'a ke' bwô ndù me fà à ju z'a fe wù là Tshùaben. A ke' bwô me ton ju Tshùaben ke be ndù yen nà tsho sàm ju me.

²⁵ Ndùlala David fà ndô nkàb gol Ornan nkù ntôg num dù' i.

²⁶ David kut ta' tômbwôg Tshùaben, nton ba nyàm, mfà tshule'te tse nema' mbu. A tsiaṅ lén Tshùaben, Tshùaben fà mbwôg ndo' mbùnte yi. Mbwôg là swe' kamànyam ngwù num tômbwôg neton nyàm yi.

²⁷ Ndùlala Tshùaben tshob Angél, a so ṅwi ntùm mbàn.

²⁸ Yen ngelaṅ nà, David be yen mba Tshùaben bam le't'é ntùm dù' netsham nsa Ornan, ze Yébusia là, mfà tshule'te bwe.

²⁹ Là dù'ntswe Tshùaben ze Mosé kut kônkwa bo tômbwôg neton ba nyàm bwe là na' mb'a ntùm mbwe' z'a Gabaon nà.

³⁰ David lo ke ku'ni nenèn mbwe sen tômbwôg là diag Nsi, nummbe ṅwi Angél Tshùaben lo kag fétwut num i.