1 Kronika 20 - NTSHOB NSI

David kwé tusô Rabba

¹ Ngu'njù nswe lo tume, ndùse fenfen ke nèn tshwèt ntsho là, Yoab kwé mbwe num mo' tonte ntshu ntsho, nkab mbu mum ngô tse nshum Ammon, ndo' ngô Rabba. David na' mb'a Yérusalém. Yoab ma' Rabba ntsho, nsat'é fa.

² David lo' kétmbùm gol s'a be tu neto Milkom nà. Kétmbùm gol là lèt nguan kilô ntshob tàn ṅam ntat. Bo lo kàn ndoṅ tanjoṅ num bwe, nte tu David. A sô ntsha' ntùm tusô yàme.

³ Mbe se' mba benntùn tse bo be ntùm ngô là, a lo' yub nèn yi num mfa' nebag tshu, netswe ntoṅ tùn boa njàm. A ghù be ndaṅndaṅ num memo' ntusô tse nshum Ammon. Yen nà be tôg David bèn Yérusalém bo ze ntshu ntsho fa.

Ntsho boa ba Filistia

⁴ Yen nà be tôg mo' ntsho kam Guizer num ba Filistia. Ndùlala Sibbekai ze Hushat zwi Sippai, mo' mén Rafa. Tuswe ghom ba Filistia.

⁵ Mo' ntsho bèn mbe nsi boa ba Filistia. Elkanan nshum Yair, zwi mfèt Goliat, Lakmi ze Gat, z'a na' ngù mo' kô se mfàn i na' ntswe mba ntom ba' là.

⁶ Mo' ntsho bèn mbe Gat. Mo' mandum lo be bwe ndù a sage, ngù ntu mbu ntôg mba num zit bu i lo, bo mba num zit ku i lo, a be ntu ntshob kuà ṅam mbàa fa. Mba yi tum à ntùm tunndà Rafa.

⁷ A tshabte Israél; ndùlala Yonatan nshum Shiméa mfèt David zwi i.

⁸ Tshen ben ni na' mb'a bon Rafa Gat. Bo kwùte njoṅ yub fa mum mbu David mba mum mbu ghafa' tse.