1 Kronika 19 - NTSHOB NSI

Bo wag ghantum David

¹ Yen nà lo be tôge, Nakash, mfen tse nshum Ammon kwù, nshum i tô num ze dù'.

² David tshob ndù: M'a' la'te ntù mebwô num Hanun, nummbe mba tàab lo la'te num àm yàm. David tshag ba ntum ndù bo nèn mfite ntù i num vù tàab. Là, ndùse ghafa' David ṅwag ntùm ngô tse nshum Ammon, num nefite ntù Hanun nà,

³ fenfen tse nshum Ammon tshob yi ndù: O kwate mbe David tum ben tse ghafite ntù, bo se' ghù à nku'ni tàan ké? Bo ke se' tsha' à tusô kà sat'é ké? Tshen ghafa' li ke' se' mbaṅ o tom à dù' ké? Bo nsi ghù ndùlala kà yôg kam ntsho.

⁴ Ndùlala Hanun ghom ghafa' David, ngù bo kom tu tshobe, nkebte nzwe tshob tà nkum tun mfat mube. Yen nà be tôg a ta' yube.

⁵ Bo soṅ David ju z'a tum num ben tse là. A tum benntùn ndù bo nèn mbumte boa bo, ntshob bo ndù bo ghô Yériko kà nyiaṅ ntshu tshob bit kà bo bèn njam. A lo be be ndù bo b'a ntùm mo' mà tuswe ndùb.

Bo le' ba Ammon boa ba Aram ntsho

⁶ Tse nshum Ammon yen mbe bo ghù nu z'a bag nkuni là David. Ndùlala Hanun boa tse nshum Ammon tum talaṅto silba ntsha' mbùm num nenèn njunte nkalig boa ghako' nyàm yi ba Siria tse bo Mesôpôtamia là, tse bo be Maaka bo Tsoba là.

⁷ Bo junte nkalig ntsha' ntshob bàa ṅam ntat mfen Maaka mba ze ngô. Bo se' nte mbaṅ mbwe Médeba. Tse nshum Ammon tse'te ntùm ntusô mube, ntam nze nenèn ntsho.

⁸ David ju' yen tshô là, ntum Yoab bo ntshu ntsho ba neta nduku num bo.

⁹ Tse nshum Ammon tum, nkab nsi num ntsho ntshu tusô. Fenfen tse bo se' là lo' dù' mà tshwèt tse tse.

¹⁰ Yoab yen mb'a bwô nekam ntsho à njam mba mbwe. Ndùlala, a nèn netèt tse nduku Israél, ntsho' benntùn bwe nte yub njam ba Siria;

¹¹ a yab mfèl i Abishai tàndà ntsho num tshé' ngô z'a tù' là, nte yub njam tse nshum Ammon.

¹² A tshob ndù: A be ze ba Siria ta ntshùa àm nà, mb'o a' se' ywimt'àm; mbe tse nshum Ammon ta ntshùa o là, mba me nsi se' ywimt'o.

¹³ A bwô be ghù tànntù, nda'te fènntù mum ngô be mba num ntusô Nsi be. A bwô Tshùaben ghù mb'a bwô i là!

¹⁴ Yoab boa tse ben kù' nèn nkam ba Siria, bo kù mbwe i.

¹⁵ Ndùse tse nshum Ammon yen ndù ba Siria kù là, mba bo yub kù mbwe Abishai, mfèt Yoab, mbèn ntùm tusô. Yoab bèn njam Yérusalém.

¹⁶ Ba Siria be yen mba ba Israél tshùa yub ntsho là, ntum bo nèn ndiag ba Siria tse bo be mo' yoṅ ta'ntse là; Shofak, tàndà ntsho Hadarézer na' mbèn mbe tu netèt bo.

¹⁷ Bo soṅ David yen nu là, a tse'te ba Israél fa, ndut ntse Yordan, nte njam bo, nke nabte wul i nekam yube. David nabte wul i num nema' ba Siria ntsho. Là, ndùse ba Siria ma' ntsho boa David là, bo lo nkù num miag Israél.

¹⁸ David biagte ntshu ntsho z'a ghù nkalig ntsha' sammbàa là, nzwite benntùn ntsha' ṅam nkuà, nzwi Shofak tàndà ntsho.

¹⁹ Ghafa' Hadarézer be yen mba Israél tshùa yub ntsho là, nso mbu boa David, mbam nte' yi. Ndùlala ba Siria ke bèn nkô neywimte tse nshum Ammon.