1 Kronika 18 - NTSHOB NSI

David tshùa ba ndùla' ntsho

¹ Yen nà lo be tôge, David le' ba Filistia ntsho, ntshùa yube, nkwé Gat boa ntusô mi a ghebte bwe là mum mbu mube.

² David ton ba Moab ntsho, bo bam nte' nke mfa' yi njoṅ ndù fa.

³ David ton Hadarézer mfen Tsoba ntsho, nze mbaṅ Hamat, ndùs'a ke nèn te ze netô num ta'ntse Efrat là.

⁴ David kwé nkalig yi ntsha' mbùm, ghako' nyàmdiaṅ ben ntsha' sammbàa, benntùn ntsha' ṅam mbàa; soyé tse bo tshwèt nzin nku là. A ghù bo kebte nga nku nyàmdiaṅ tse bo ke nsoṅ nkalig là, k'a faṅ à nda' tse nkù.

⁵ Ba Siria tse bo be Damas là se' ywimte Hadarézer mfen Tsoba, David zwite ben ntsha' ntshob bàa ṅam mbàa netèt ba Siria.

⁶ David tete ba mbàn ntsho taṅ Siria z'a Damas là. Ba Siria bam nte' David, nke mfa' yi njoṅ ndù fa. Tshùaben lo ke mbéb David mba yà lo dù' z'a nèn nà.

⁷ David lo' ntshètntsho gol mi ghafa' Hadarézer ghù là nèn yi Yérusalém.

⁸ David bèn ndo' ntùn fôgtab yàm Tibkat mba Kun, tusô Hadarézer. Salomon lo' men ntùn nà ntswe dibantse tùn fôgtab yi, ba ntom boa tshundà tse tùn fôgtab.

⁹ Tohu mfen Hamat ju' mba David ton ntshu ntsho Hadarézer mfen Tsoba ntsho là,

¹⁰ ntum Hadoram nshum i mbaṅ David ndù a nèn ntsha't'é, nyàmt'é mb'a kam Hadarézer ntsho kà ntshùa i nummb'a lo be Tohu b'a tshwèt ntsho bo Hadarézer. A lo tum mba nzenze nkàb gol, nkàb silba boa mi ntùn fôgtab David.

¹¹ Mfen David fà tshen tshu là Tshùaben, ndaṅndaṅ mba silba bo gol z'a na' nkwé ngôngô fa, Edom, Moab, tse nshum Ammon, ba Filistia bo Amalék là.

¹² Abishai, nshum Tséruya ton ba Edom ntsha' ntshob fom gham ntsho ntùm tômbo' ngwa.

¹³ A tete ba mbàn ntsho Edom, njoṅ ngô Edom fa bam nte' David. Tshùaben nke mbéb David mba yà lo dù' z'a nèn nà.

Ṅwa'ni ndèn ghafa' David

¹⁴ David tô Israél fa, nke ngù nu ndaṅndaṅ bo nunetsin njoṅ ze ngô fa.

¹⁵ Yoab nshum Tséruya na' mbèn nke ntô ba soyé; Yosafat nshum Akilud be ngalé' njoṅ ṅwa'ni fa;

¹⁶ Tsadok nshum Akitub bo Abimélék nshum Abiatar be ghafà tshule'te;

¹⁷ Benaya nshum Yéhoyada be mfen ba Kérét boa ba Pelét; tse bo ke mbéb David là; tse nshum David na' mb'a mbwe kamkam mbaṅ mfen.